Xuuma Hisqeeli 8 - Mataafa Qulqulloota

Keleshaata a lammatta a Hisqeeli akkaade Killowwa waaqaysatta a Yursaalami kara co

¹ An ino' poojammeeyye para lehattatiiyyi ka leya lehatta oppaayye kuyyaata kenattatiiyyi an tikiyyoppa' kuti'eyye qimaya Yihuta ka ana tura' qaa'eneeyye hupna Waaqase' piisa qara qapo ka eeyye ana qara' de'e.

² Anka tooyyade ka wa nama paha akke; wa surraadi paha kela xata apitta ca; surraadi qareelaaw wa sipla pale' paha ka pippildaawna ka caan.

³ Isha ka wa harka paha anopa derayshe ka ana qara nyirfaayyo a matta' qape; hapura ka piiteela moontopeela ana xaashe ka keleshaata Waaqatin Yursaalamipa ana qeede; ka xarrase paapahase karan co opa kullino ka qinda qutatta mina tooyno opa ana qeede; poroose oppaayye killootase Waaqa kara yoota xa'innitto ca.

⁴ Tin ulfeenase a Waaqa Isira'eeli isase an keleshaatan naaba Keepari kara akke ka eeyye ca.

⁵ Ikka ana kide, “Atti to'ampayta namatiiyyi, qinda qutattatin dela tooyyado!” Anka qinda qutattatin dela tooyyade; xarra a pora kalisootati qinda qutattatinni killootase Waaqa kara yoota xa'innitto ka eeyye kittaaw.

⁶ Ikka ana kideewwe, “Atti to'ampayta namatiiyyi, akka tikiyyo a qulqulloota kapa ana sekayshane'e samayta Isira'eeli nyala a akata neeqa a areppa koonaane i'akkini? Ma xoori nyala akata neeqa a sede qaropa qapa'e akkitaaw.”

⁷ Ka xarra paapaha oppopa anan aaneew; eten tooyyadeeyye anka kawwatta paapaha a karan cooti oppa qaawa akke.

⁸ Ikka ana' kide, “Atti to'ampayta namatiiyyi, qaawoseeti xata paayye ka kawwasse kara poote ka paldishe!” Anka paldishe ikka xarra koddite.

⁹ Ikka ana' kideewwe, “Oppan kulle ka nyalasene akata neeqa a koonaane' tooyeew.”

¹⁰ Anka kulle ka tooyni; wa piitandesa titmanna ka pinaana nyale isho killowwa a smayta Isira'eeli' piisa ka qindadda a qussa tikaseti quda' pojaamen.

¹¹ Samayta Isira'eeli oppaayye qimaya kunda tappa ka qa'aden; Asaaniya inna Shafaani ka ishoottoppa ca; ishootta ka matta mina'e, wa kara tankarta qayyannaane harkoppa' qaqqapaden. waasene kara tankarta qayyannaane karaayye qayya ka opeela xa'e.

¹² Ikka ana' kideewwe, “Atti to'ampayta namatiiyyi, hela qimaya a samayta Isira'eeli matta mina'e, wa kaataasso a kara' pahanaadda xaasadene kara tukkantoppa koonaane i'akkini? Ha ishootta ikiini, ‘Waaqa ino akkini in co; Waaqa alle'e ino diishe.’

¹³ Ka kideewwe, “Amma ikki'i nyala a koonaane a sene qara qapa'e akkita.”

¹⁴ Sekkammaayye ikka kullaysuma a xarra qinda qutatta a tika Waaqa a qulqulloota opa anan aane; anka eeyye iskatta a qaa'e ka Waaqaaysho a temuusi kidammo ka to'e pooyno akke.

¹⁵ Ikka ana' kideewwe, “To'ampayta namatiiyyi, sede i'akkiteewwe? Amma ikki'i nyala a sene qara qapa akkitaaw.”

¹⁶ Ikka tika Waaqatiiyyi paapaha a karan co opa anan aaneew; kullaysuma tika Waaqatiiyyi porase oppan tarpinaan isho pora kalisootati otantoppaayye nama kunda lakki keni mina'e ca ka tultaaysho qinda tika Waaqa opa tiitayshen ka fuulaaysho qinda piirtota opa oorshen ka piirtota' sakatanni anka akke.

¹⁷ Ka sekkammaayye ana' kideewwe, “Atti to'ampayta namatiiyyi, sede i'akkite? Samayta Yihuta nyala poroose oppa' koona wa shakka'e? Ma a sede qaran qapto'e karpaanne piita immaken ka qara'ew ana miirayshen. Tin ishootta qinda ishootta ettannitto piisanne ana onni.

¹⁸ Semmalla miiriyyonnen ishootta qara' de'a; umma karittiyyo ishoottan suraysado; umma diissata an ishootta an kodo. Kadi punu nessa kuttan anopa ullupannaaneeyye, ishootta an dakayo.”