Xuuma Hisqeeli 7 - Mataafa Qulqulloota

Eta miira Waaqa

¹ Qaaleta Waaqa ka ana kapopa deete ka kiini,

² “Atti to'ampayta namatiiyyi, Waaqase' piisa qara qapo ipiita Isira'eeliti' kiini, ‘Piraampira a piitoose piisa idesa kaye.

³ Oo piita Isira'eelitiiyyi! Amma piraampiraayti idesa kaye; anti miiriyyon ke qara' tuqa ka akka saantaayti mina ke qara' farata ka wa an jippina a' koote piisa kapa'e, ke qatta'a.

⁴ Umma ilda a suraysattaatin an ke an tooyo; umma an ke' diissata an kodo; ma akka saantaayti ka waasene an jippina a ke kara ca kapa'en ke qatta'a!’ Ishina ka akkan Waaqa kodde upnaattan.’

⁵ Anti Waaqase' piisa qara qapo waan kiina sene; ‘Tin erkannaata qara'ew erkannaata ishin qara' deeta.

⁶ Piraampira idesa kaye; ha piraampira idesa kaye! Piraampira ike qara' xa'e; tin idesa kaye.

⁷ Ishina a piisse oppa kalaatiiyyi pateettaayshin idesa kaye; etaayshin idehaaden; kuyyaatayshin ifoolsatte; umma kuyyawwa a oppa irrowwa qara ililiwtane'en ma kuyyaata a olkelan yaaqyaaqtan.

⁸ Anti dehaynittoppa'en ke qara aariyyo tuqa ka miiriyyo ke qara' qeeda ka akka saantaayti mina'e ke qara' farata ka akka waasene an jippina a' koote' piisa mina ke qatta'a.

⁹ Umma iltiyyo ishinan suraysatto; umma ishina' diissata an kodo; haka waasene an jippina koda tupa' tawnittane'e, akka saantaayshina' qara'en ishin qatta'a; akka sitiiyyi a ishin qattaano akka ana Waaqa koddite upnaattan.’

¹⁰ Tin kuyyaatase! Idesa kayte! Pateetaayshin nefo idehaatte; samayta karpa qara'ew karpa kooni ka qara'ew isi peepa koopsanni.

¹¹ Orra kara kutta mura dukaata itiite ka qara'ew teyantoonni, kurraaysho ka dakaanni; ishoottoppaayye nama takka nefo in caado umma teyantase' xaaysho' koopte in kinnaatto.

¹² Eta idehaaden; kuyyaata nefo idesa kayte; qoota miiriyyo samayta piisa qara' kayo malla, a piddino in xasoonnin, umma a kanno in nyarrahanin.

¹³ Nama piita kate haka cooyye, piitaadi oorsatta in ettansho; keleshaata qoota orra piisati desa lelame pursammi in co; qoota orra piisa juppoota kode malla, toota kela issin paheeta in ettansho.

¹⁴ Qoota miiriyyo piisa qara' kayo malla kadi punu kaasa dawammaayye ka we' piisa dikkisadaneeyye, nama takka nefo oranna'en tuulo.

Qitaateta a juppoota Isira'eeli' minan deeto

¹⁵ Laka tulanne, oranna ca; tikka karanneew paaqa orra pirro isho loota ca; a laka tula ca orannaane piraman; a katama kara ca ka paaqa orra pirro isho lootan piraman.

¹⁶ Oton a peela hase ka qahe'e caayye, akka a elela naaba mina'e irrowwa qaropa sookan; nama piis ka juppootaadi a kode malla pora moomo'a.

¹⁷ Harka piisa qishshaamooda; tammaqta'e sinda ka kamman qitan.

¹⁸ Ikka mehadda dapteeta' kalsadan, tammaqta ka ishootta qapta; jeera ka fuulaaysho oppa akkaada; ikka piisani matta kooshadan.

¹⁹ Ka dakaraasso a pirreeta alle porraappopa dakkan; warqeetaaysho ka wa nyale kapa' dikamta; kuyyaata miira Waaqa'eyye dakaraaysho a pirreeta isho warqeetaaysho ishoottan paha in ettanishan. Umma ishootta karittaaysho'en immakan ka doxa kela shoottannen pahan; maana malla akka juppootoppa pi'ane'e ishootta tura kehayta koddeneey.

²⁰ Siraasso a paxaaratinni isi jeejjini ka oppaayye killannasene xaaysho jippame ka nyale kodaden. Semmalla anti wossen xaaysho'en nyalaapa oorsha.

²¹ Anti akka orra hapta ishootta sarado'e ukkuttowwa a piita ka ishootta pootadane'en ishootta turopa tuukka; ikka ishootta nyalshan.

²² Anti fuuliyyon alle ishootta qara tiitaysha; ishootta ka poriyyo an akata jaalanno nyalshan; sarampaya ka karopa kullan ka nyalshan.

²³ Piita ishin dapayta a diika tuqaatinni immakaatte; katama ka karpaan immakaadeneey, sansalaata tume.

²⁴ A mankistewwaappa akata neeqaatinnin de'a, ikka tikkaasso' lehadan ka porraasso a qulqullaawe nyalshan. Anka isi peepa a irreelaya alle pashsha.

²⁵ Oto tammaqta detooyye, ikka nakayta pora fadan umma in akkadan.

²⁶ Erkannaata qara'ew erkannaata ka deeta; otoota a neeqa qara'ew otoota neeqa'ew ka deeta; ikka xuumampayta qara keleshaata fadan; seera ka qeesitta kapaayye dapada; dehaamta ka qimaya kapaayye dapada.

²⁷ Nuqusa ipooya, taanynya a kutta ka xasa mura; harka samayta piita ka tammaqtan qishshaamoodan; anti ka akka saantaayshoti' qara ishootta qara' koda ka akka muraassoti' mina ishootta qara' farata. Ikka akkan Waaqa kodde upnaadan.”