Xuuma Hisqeeli 6 - Mataafa Qulqulloota

Waaqa akka killanna waaqaysatta dawre

¹ Qaaleta Waaqa ka ana kapopa deeta ka kiini,

² “Atti to'ampayta namatiiyyi, irrowwa Isira'eeli opa fuulaayti tiitayshe ka ishootta qara' xuuma haasawado.

³ Ka kide, ‘Ishina irrowwa a Isira'eelitiiyyi qaaleta Waaqase' piisa qara qapoti' dakaya; Waaqase piisa qara qapo irrowwa'e ka kunkunnawwa'e ka fishshanna isho naabba'e kiini, “Tin anti orannaan ishin qara' qeeda ka porra a ishin qara ca a orra qara killanna' sakatanna alle' pashsha.

⁴ Porroosen a kalisowwa ishin qara ca, ipootaman; porroosen qara' tankarta qayyannaane iqitqitan; anti killannasene ishin qara ca tura'en orra ishootta' sakatanno leysha.

⁵ Pukkada a samayta Isira'eeli in killannaasso kapan desa dakka ka lafaasso porraasso a kalisoota kapan desa fida.

⁶ Ishina samayta Isira'eelitiiyyi, porrasene a kalisoota akka qitqitan ka patane'e, killowwaassin ka mammaajamane'e, porraassin a qara tankarta qayyannittane ka patane'e, wa harkaassinan kodattene' piisa ka patane'e, porra a oppa kaltane pisa oppaayye katamaddaassin lulle hasan; porraassin a sakatatta a kunkunnawwa qara ca ka patan.

⁷ Orraayshin a leysame piitaayshin oppan desa dakkama; akka akkiman anti Waaqa kodde upnaattan.

⁸ Ma xoori oto orra oranna' kela pahatan ka mankistewwaappa' pastaneeyye, ishin oppa orra deemon hattisha.

⁹ Ishin oppaayye a toota kela pahe ka piita pila opa poojame, piitase a oppopa poojameneeyye, matte ana oorsadan ka ete ana jippen ka killanna' sakatadeneeyye, a atta kitto akkima ana nyarrahasiisen upnaadan ka nyalaasso isho neequmtaaysho a koden piisa minanne isi nefo jippan.

¹⁰ Ka akkiman Waaqa kodde upnaadan; sede an kide neequmtan ishootta qara' qeeda paata patta asse an kiine.’

¹¹ Anti Waaqase piisa qara qapo in kiini, ‘Samayta Isira'eeli qoota nyalaasso a neeqa piisa minanne, oranna ka loota isho paaqa orra pirron piramo malla, ‘Oo ishootta kido!’ Kide ka miiran qupittaayti kiskise ka piita diittado.

¹² A pora sekaayye co paaqa orra pirronne to'a; a pora dehaayye co ka orannaappa' to'a; a pahe ka peela hase nefoow lootanne to'a; anti assen ishootta qara' miiriyyo a kutta qeeda.

¹³ Ishoottoppa orra a le'e oto pukkadaasso killowwaasso isho porraasso a kalisoota kapan desa seehan ka kunkunnawwa a deddera isho kuutta a irrowwa qaran desa seehan ka qora ilaawa isho a paajane ka haashsha qapa kelandesa seehan ka porra oppaayye killannaasso' piisa'e kalisoota alaawnitto ka ishootta xasannitto dehaannaan pisa oppan desa seehaneeyye, ishina akkan anti Waaqa kodde upnaattan.

¹⁴ Anti ka ishootta qaropa harkiyyo a kokkoka xaasha ka piitadda a oppa kalane' piisa, koommayte paayyatte haka katama ripilaati'i piitaaysho lulle hattisha; ishootta ka akkiman anti Waaqa kodde upnaadan.”