Xuuma Hisqeeli 5 - Mataafa Qulqulloota

Hisqeeli akka nyirfaadi kooshade

¹ Atti' to'ampayta namatiiyyi, koraateta a qarta qapto qeede ka akka kooshshota' mina'e nyirfa mattaayti ka kawsaayti kooshado ka nyirfasene hiilan ekkaysado ka pora sessa' qoote.

² Ka oto kapa murama katamooseneti' qa'adooyye, nyirfasene a' pora sessa' qootte oppa harka takka qeede ka pahana katamaasene a' xa'isse kara' kupe ka harka sessaappa a lammatta' qeedew ka katamaasenetiiyyi laka tulan oppa muje ka katamaasene kapan desa seehshe. Ka harka a kela hase a sessatta' qeedew ka xayxaytoppan dela purraahe; anti koraatetannen ishootta kamma daanaay.

³ Ka nyirfasene a' xayxaytoppandela purrahate quda lamaya qeede ka mehaddaatti a' kalsannittaati kaamaara mina' sukke.

⁴ Ka amma nyirfasene quda shakkaya qeedew ka apittoppa tuqe ka kupe; seppaayye apitta xa'a ka samayta a Isira'eeli piisa kara' fidama.

⁵ Anti Waaqase piisa qara qapo in kiini, ‘Yursaalamise an mankistewwaayye otantoppa' xaaye ka piitadda an kapa qobbayshe pahanaadi sene.

⁶ Yursaalamise a mankistewwa pila qaran qapto'e seeriyyo falqite ka neequmta koote; ka piitadda isheetta kapan desa ca qaran qapto'e taantetiyyo falqite; maana malla ishootta seeriyyo jippeneey umma taantetiyyonnen kallaanneey.’

⁷ Semmalla anti Waaqase piisa qara qapo in kiini, ‘Mankistewwa a ishin kapan desa ca qaropa qapto'e, qoota seera dapten malla, ka taantetiyyon a kallaannin ka seeriyyo'e a ajajammin malla ka seera a mankistewwa a ishin kapan desa kala' qapane nefo a' tooytanne.’

⁸ Semmalla Waaqase' piisa qara qapo ikiini, ‘Tin ana mattiyyo ishin qara' xa'a ka fuula mankistewwa' tura ishin qara' firteeta daasha.

⁹ Waasene an needda a' koote piisa minanne, waan haka ammati an qeennini ka itturopa nefo an qeennini' piisan ke qara' qeeda.

¹⁰ Semmalla ishin oppaayye aappada hellaasso'e daman; hellaa ka aappadaasso' daman. Anka ishin qara' farata ka a ishin oppa peela hase qindadda piisan desa alle' fida.’

¹¹ Semmalla Waaqase' piisa qara qapo ikiini, ‘Anti caattampayta, kodeetiyyonnen xaxanni; qoota ishina waasene xaayshin jippamma ka nyalaassinan tikiyyo a qulqulloota nyalissen malla anti alle'en ishin tawsha, umma nama takka nefo'e an diisho umma an suraysado.

¹² Ishin oppaayye harka sessa oppa harka takka paaqa orra pirro isho lootanne pirama; harka sessa oppa takka'ew, oto katama kara alle qahanooyye, nyaapa ishootta pira; harka sessa oppa takka'ew, qindadda piisan desan alle ishootta pasisha ka ishootta kamma daana ka ishootta leysha.

¹³ Miiriyyo ka seden harfa, anti ka miiriyyo a kutta ishootta qara' qeeda ikka sitiiyyi anoppa utta. Oto miiriyyo qa'ado kammaayye ikka akkiman anti Waaqa kodde ka yootan haasawade upnaada.

¹⁴ Mankistewwa a ishin kapan desa ca oppa ka fuula a orra ishin kapan tarpino tura'e anka lulle ishin hattisha; akka qora a qara lelatta' kodditan.

¹⁵ Oton miiriyyo isho aariyyon ishin qara' firteeta qeedooyye, mankistewwa a ishin kapan desa ca tura'e akka qora a qara tammaqta ka a qara xosalta ka a otitta ka pahana orra afaa ana' dakayni in kinnini kodditan. Ana Waaqa sede haasawadeey!

¹⁶ Ishin patissa'e oton lawasene a loota orra lenna ka orra pirra ishin oppopa pokkooyye ka loota ishin qara' koopissaan aanooyye ka damta ishin qara murooyye,

¹⁷ loota isho pinaanaan ishin oppa' diisha; ikka ishin kela hellaa piran; anka oranna ishin qara' qeedaaw ka paaqa orra pirro ishin qara' qeeda; akka karpa karpaan oli lessan; ana Waaqa sede haasawdeey!”