Xuuma Hisqeeli 47 - Mataafa Qulqulloota

Pishasene tika qulqulloota kela paadina

¹ Sekkamma namase ka xarra tika qulqulloota oppopa anan oore; anka eyyeeyye pisha a kirittase a tika qulqulloota kela xata qinda piirtota opa urqina akke; maana malla xarra tika qulqulloota qinda piirtota opa tiitaaweey pishasene nefo kiritta tika qulqulloota a qinda tupattatinni urqini.

² Namase ka xarra a qinda tika qulqullootati' qato oppan anan sooke ka paapahase lakan co qinda piirtota' mina tooynooyye laka tulan ana tiitayshe; tin anka pishasene qinda tupattatin tojna akke.

³ Namase ka wataroota a paatan ekkaysannaan harkoppa' qapade ka qinda piirtota opa aane ka metireeta dippa keni ekkaysade ka pishasene oppan desa anan aane ikka mommoqtowwaappa ana' kayni.

⁴ Ikka metireeta dippa keni ekkaysade ka pishasene oppandesa anan aane; ikka kilpallaappa ana' kayni; ikka metireeta dippa keni ekkaysadeew ka pishaasene oppandesa anan aaneew; ikka surraappa ana' kayni.

⁵ Ikka amma metireeta dippa keni ekkaysadeew; qoota pishaasene opeela xa'en malla, ikka kirra an oppan tuulla an ettaninnin kodden; ishootta oppandesa anta in koddan; ma pisha a daana kaye mina'e karanxata seki.

⁶ Namase ka ana' kide, “Atti to'ampayta namatiiyyi, hela sede i'akkini?” Ka kamkamaasene a kirra qaropa anan tiitaawe;

⁷ eten kamkamaasene' qaropa tiitaaweeyye, anka kirrasetiiyyi qindaddaan qora lekaya akke.

⁸ Namase ka ana' kideewwe, “Pishoosen piita a qinda piirtotatin kittopa urqini ka naaba Yurtaanoosi opa lekkanni ka pakateeta sookitta oppopa tawni ka oto pakateeta sookitta oppopa tawaneeyye, pishasene a pakateeta sookitta ka paxaarnaanni.

⁹ Porase a oppopa kirrase urqino pisa oppaayye, uumata a pakateese kela kalo piisa ka kinnaada; qoota pishaasene oppopa urqan malla, murkuja akata leka ka oppa kinnaada; pisha a pakateeta sookitta kuli ka paxaarnaadan; pora oppopa kirroose urqino piisa oppaayye, we' piisa ka caadan.

¹⁰ Orra murkuja qapanno ka pakateese kapa' qa'ada. Enikeeti paayyatte haka Eni'ekilaaymiti'i, ikka oppa nyupura a murkujaan qapannaane qaasan; murkujaadi ka murkuja a Mediteraaniya' mina ika lekayta kodda.

¹¹ Ma xoori pishasene piita laalahayshe ka oppa' qa'ade in paxaarnaadan, ma sookitta koddan.

¹² Kamkama qara qinda qindanne, qora a dammaane ika piisa deha; umma haashshasso in kokan, umma luukkata dala in diishan; qoota tikase a qulqulloota kelaxata pisha ishootta urqinaan malla, leya piisa oppa'e luukkawwa haaraya dalan; luukkawwaasso ka damta koddan; haashshaasso ka paaqoppa orra dinshan.”

Xeella a piita qootatta

¹³ Waaqase' piisa qara qapo ikiini, “Xeela a ishin kaffaasene a Isira'eeli kudanka lakki piita qootto sede: kafa Yoosefi qoottota lakki qapnaada.

¹⁴ Piisse an anti akkan aappadaassina a xattati' daasho' xaxade, ishina oli qitteeta qootada; piisse ka lehandaassin koddito.

¹⁵ Xeela piitooseti nefo, qinda qutattatinni, pakateeta Mediteraaniyati xaani ka pora Hetiloonitinni, tuullaysuma Haamaatitin anni ka setaati kayni;

¹⁶ ka qinda katamaddasene a Peroota isho a Sipiraaymitinni, otanta Tamaasqo isho a Hamaatiti xaala qara caatin anni ka katamasene a Tikooni xaala Hawraani qara ca' kayni.

¹⁷ Semmalla xeeloose pakateeta Mediteraaniyati xaani ka katamasene Hasaari - eenoniti qinda qutattatin xeela Tamaasqo isho Haamaati mina co kayni; sede tooy xeela a qinda qutattatin qato.

¹⁸ Qinda piirtotatinniiw xeeloose katama hawraani isho a Tamaasqo otantoppanne tarpa ka kirra Yurtaanoosi olli aana ka piita Isira'eeli isho a Kele'adi otantoppan tarpa ka pakateeta sookittatin aana ka katama Tamaari' kaya; sede tooy xeela qinda piirtota.

¹⁹ Xeela a qinda tupatta'ew, katama Tamaarittiiyyi xa'a ka pisha ela Meripa a Qaadeesi' kaya ka eeyye xa'aw ka naaba Kipsi olli anna ka pakateeta Mediteraaniya' kaya; sede kan xeela tupatta.

²⁰ Qinda dumaatatinniiw xeelaadi pakateeta Mediteraaniya ka kullaysuma Hamaati mina kayni; sede kan xeela a qinda dumaata.

²¹ Semmalla piisse kaffa Isira'eeli' mina' qootada.

²² Ishin isho kalayta a ishin oppa kalo ka ishin oppa hellaa qapo, piisse lehanda' kodada ka qara' qoyritta katada; kalaytose ishin oppa kalo, akka nama piita' mina'e hellaa Isira'eeli kapa'e dikama ka kaffa Isira'eeli olliiw piita lehada ka qara' qoyritta katada.

²³ Kalayta a ishin oppa kalo, qoottotaadi a kafa quda kuti'e oppopaaw ishi' qoottamto; sede ana Waaqase' piisa qara qapo asse haasawade.”