Xuuma Hisqeeli 45 - Mataafa Qulqulloota

oto piita qootammittooyye qerayta Waaqa' reexame

¹ “Oto lehanda piisse qootannittaneeyye ka qara' qoyritta katannittaneeyye, haminta qulqullaawte' koda ka Waaqa' xawwi piita reexxa; piisse a' reexxitan derumaadi kiilomeetireeta kudanka lakki ka paka ka paldumaadi kiilomeetireeta kudani koddita; isheetta piisa ka karandesa a qulqullaawte koddita.

² Eeyye karaayye qorrima a qindaddaadi afuri piisa a metireeta dippa lakki ka kunda keni kayno' murritan ka torkarraadi afuri piisan pora palduma metireeta kunda lakki keni kayno asseew hattissan.

³ Ka porase ekkaysatame oppaayye, pora a deruma kiilomeetireeta kudanka lakki ka paka ka palduma kiilomeetireeta keni kayno ekkaysada; tikase akata qulqullaawte ka oppa' qupamto.

⁴ Piitoose oppaayye sede qoottota a akata qulqullaawte koddita ka qeesewwasene tika qulqulloota kela koda kodeeta Waaqa turopa dehaanna ka teyyadan; tikkaasso ka oppa' qupaman, ikka porase qulqullaawe a tika qulqulloota oppa qupamto koddita.

⁵ Piitase qudaayye pakase hase isase a derumaadi kiilo metireeta kudanka lakki ka paka kayno, paldumaadi ka kiilometireeta keni kayno, Lawaata a tika qulqulloota kela koda koonitto lehada; katamadda a kara kallaatta ka oppa' qupaman.

⁶ Porase a' qulqullaawe kidame ka xawwi' reexxame quda desa, piita a samayta Isira'eeli piisa' koddito, a katama oppa qupaman a derumaadi kiilomeetireeta kudanka lakki ka paka, paldumaadi ka kiilomeetireeta lakki ka paka kaynaane xawwi reexxitan.”

Qoottota saara kuttati

⁷ Saarase kutta a piitati'iw, piita a paldumaadi qoottota kafa takka mina kitto, piisse qulqullaawte isho a oppa' katamadda qupan qudan xata, qindadda piisan, qinda piirtota ka a dumaatatinni, a xeela piita mina paayyado ka qinda piirtotatin xeela piita' mina kayo.

⁸ Piisse ka piita Isira'eeli kara qoottotaadi koddito; umma kulipaata saarraayyo a kukutta samaytiyyon' miinin; ma piita a kela hasse piisa kaffa samayta Isira'eeliti' diishan.

Taanteta seera a saara piita a kuttati

⁹ Waaqase' piisa qara qapo ikiini, “Ishina' saarra kukutta a Isira'eelitiiyyi, ha ikoddite! Karpa kodeeta ka miiddota alle' diisha! Ka dukaata ka hanqeeta koda; piitaaysho oppaayye alle samaytiyyo in daanan; sede ana Waaqase' piisa qara qapo asse haasawade.

¹⁰ Wa a ishin wa koke ka a qoyya kurrittane a amaname a kodden;

¹¹ Ifi isho paadoosi hiilaysho a takka koddo; paadoosi komori qudaayye harka kudan oppa takka. Ifi asseewwen komori quda harka kudani oppa takka; orra piisa a komorin paata kurado.

¹² Hiilaayshin, keera kunda lakki sheqileeta takka; sheqileeta kunda lehiiw, minaani takka a koddo.

¹³ Oto kappa isho poortaayshin mujattan kammaayye, kappaayshin qaraayye harka kunda lehi oppa takka Waaqa' kalsha ka poortaayshin kuli qara asseew kalsha.

¹⁴ Ka sayteeta a akkannittan oppaayyeew harka dippa oppa takka Waaqa' kalshaaw.

¹⁵ Ka porroosen a Isira'eeli a pisha ikna oppaayye, xelloota kahirra isho a tela qaraayye dippa lakki oppa kaharta taaki telteeta takka ana' kalsha; akka juppootayshin ishina' hasso'e, oto' kalisoota a unta ka a kupannitto isho a takkumta kalinnittaneeyye senenne' deetan.

¹⁶ Samayta piisseti piisa, saarase a Isira'eeli kutta'e sede daasheta'e kitteeta ishootta qara ca.

¹⁷ Xayso nessumaddaappa ka xa'atimadda a leya qara ka kuyyawwaassin a sampataati ka xayso nessumadda a ishootta xoora qapamene a samayta Isira'eeli qaraayye, kalisoota a kupannitto ka a unta isho a ikkayta harmissa, sede koda saarase kuttati; samayta Isira'eeliti haseenta juppoota koda'e, isha kalisoota juppoota ka a unta ka a kupannitto isho a takkumta'e qobbeessa.”

Xayso nessumadda ulfeessa

¹⁸ Waaqase' piisa qara qapo ikiini, “Leya paayyotati kuyyaata paayyota oppa haaritta xorma a toobuma in qapnin takka' qalta ka tika qulqulloota jaqqita.

¹⁹ Qeesitta kalisoose a haseenta juppoota quda diika shakkayta qeeda ka qora xarra tika qulqulloota ka qeppeelliyya a kaamara pora kalisoota isho xarra paapahase karan co opa kullinaaneeyye qora a xarra' quda' daata.

²⁰ Nama a in dikannin ka a in upnin mali juppoota kode piisa'e kuyyaata tappattati asseewwe' koota ka qinda tika qulqullootati desa, haseenta juppoota' koota.

²¹ Leya paayyotatiiyyi kuyyaata kudanka afrattatiiyyi xayso nessuma a qarantarpeeta'e ulfeessitan ka kuyyaata tappa kara'e, laaqqota a kara haddaya in qapnini damtan.

²² Kuyyaasetiiyyi saarase kutta, isi ka samayta a piita Isira'eeli' piisa'e, haseenta juppootati'i, haaritta xormatin de'a.

²³ Ka kuyyawwosen tappa a xayso nessuma' kara'e, kuyyaata mina'e haariyya xormada tappa ka laahadda tappa a toobuma in qapnini' kalisoota a kupannitto' koda ka Waaqa ishin de'a ka kuyyaata mina'ew qolpayta takka kalisoota a haseenta juppootati' koda ka ishin de'a.

²⁴ Ka xorma takka takka kapa'e, kalisoota untati'i daamma kiilota kudanka takka kalsha ka laha takka takka kapa'e, kalisoota untati'i daamma kiilota kudanka takka dehaysha ka daamma kiilota sessa kapa'e, sayteeta nitiroota takka dehayshaaw.

²⁵ Leya tappatta oppa kuyyaata kudanka kenattaatiiyyi xayso nessumoosen a kuyyaata tappa karaayye kalisoota haseenta juppootati'i ka a kupannitto'e isho a untati'i, a kalisoowwosenew dehaysho.”