Xuuma Hisqeeli 44 - Mataafa Qulqulloota

Koda xarra a qinda piirtotati' qato

¹ Sekkamma namase ka xarra tika qulqullootati lakan co opa anan tiitaawe; xarrase a tika qulqulloota ka dufamaan ca.

² Waaqa ka ana' kide, “Xarrose ana Waaqa Poqalla Isira'eeli'i oppan kulleey, dufama quda'e tawa diisheey in panamo; umma nama takka nefo oppanne in kullo; ikka asseew dufama tupa' tawa.

³ Saarase a samayta' kutta patta eeyye kara kutiitta ka fuula Waaqa' tura laaqqota dameeta ettansha ka silaytase a xarra' kelan tarpinaan oppan karopa kulleeta ka sookeeta ettansha.”

Seera isho taanteta a ishin tika qulqulloota' karopa kullinaan

⁴ Namase ka pora a xarra qutatta opa anan oore ka tika qulqulloota' turopa anan aane; anka tooyyade ka ulfeena Waaqa a tika qulqulloota a Waaqa immake akke. Anka piitopa pi'e ka miinta piitan kaye.

⁵ Waaqa ka ana' kide, “Atti to'ampayta namatiiyyi, qoota taantewwa ka seera a tika qulqulloota a Waaqati desa, waan ke' lella' piisa ildaattin akke ka nappaattin dakaye ka qanqannissa qalpeeffado ka tika qulqulloota kelopa kulleeta ka sookeeta orra a atta paho akka faqqatammitto ka faqqatammi in kinnin qanqannissa qalpeeffado.

⁶ Ka tiyyoolayasene a samayta, samaytase a Isira'eeliti' kide, ‘Waaqase' piisa qara qapo ikiini, “Ishina samayta Isira'eelitiiyyi, arepadesa nyalaasene' xaayshin a qa'aden!

⁷ Nyalaassin piisa maliiyyi, oto hallaaka isho diika a kalisoota damtati' koonittan ka ana' dehannittaneeyye, sedenne hapta dawraasso' qara in murannin ka ana ajajama in heennin poriyyo a qulqulloota karopa kullissaanne tikiyyo a qulqulloota nyalissen ka kodayteetiyyo pootten.

⁸ Waasene xayyo qulqullaawe an qara saarra ishin kode a' tooytaanne; tikiyyo a qulqulloota' kelaayye waasene an qara' saarra ishin kode, orra pila'e qara' saarra' kooten.’”

⁹ Waaqase' piisa qara qapo ikiini, “Hapta a dawra qara in murannin ka ana' ajajama in heennin, a samayta Isira'eeli oppa kalo oppaayye takka nefo tikiyyo a qulqulloota' kelopa in kullo.”

Akka Lawaata koda qeesuma qara daanamte

¹⁰ A Isira'eeleta saantiyyo qara maqqiteeyye, Lawaata a saantiyyo qara maqqite ka ana kapa sekaatte ka killanna' sakatatte in qatta'a.

¹¹ Ma xoori tikiyyo a qulqullaawte kelaayye koda ikodan; xarra tika qulqulloota nefo itooytan; horeeta a kalisoota' kupannitto dehaannitto isho a kalisoota pilaati' dehaanitto kuli iqalan; samayta tura iqa'adan ka ishootta' koda kodan.

¹² Qoota akka samayta killannaasso waaqaysado' koden malla ka samayta Isira'eeli kehaytishen ka juppootoppopa katen malla, Waaqase' piisa qara qapo ikiini, ‘Anti' qootaayshoti desa in xaxadeey, iqatta'aman.

¹³ Ishootta koda qeesuma' koda'e ana turopa in dehaadan; umma meehiyyo a qulqullaawe isho a akata qulqullaawe quda in kayan; ma jeeraaysho isho nyalaasso a kodene'e haadadan.

¹⁴ A koddito ma a koda tika qulqulloota' qara tooyna ka a koda kara kodammo piisa koona, akka kodane'en ishootta kita.’”

Seera a qeesewwa' daasame

¹⁵ Waaqase' piisa qara qapo ikiini, “Ma xoori a samayta Isira'eeli ana kapaayye alle qindopa maqqeeyye, qeesewwasene a Lewaata sanynyeeta Sadooqi kodde ka tikiyyo a qulqulloota kelaayye amanteetan ana' koda kode, ana kapopa de'an ka kodiyyo ana' kodan ka fuuliyyo tura' qa'adan; ka kalisoota a hallaaka isho a diika ana' kalshan.

¹⁶ Ishootta poriyyo a qulqullaawe karopa ikullan ka ana' koda kodaa'e, tomiyyo kapopa xooran, ka ajajiyyo tooytadan.

¹⁷ Oto xarrada a paapahase karan co oppan kullinaaneeyye, mehadda a xaynaata a qora talpa oppa dawame kalsadan; oto xarrada a paapahase karan co isho tika qulqulloota kara koda koonaaneeyye, mehadda a nyirfa kahirra oppa kodame takka nefo kalsatta ishootta faani in kitto.

¹⁸ Mattaaysho qara'e parroota a xaynaata qora talpa oppa dawamte maraden ka muttana a xaynaata qora talpa oppa dawame iskamma' kalsaden; ma xoori surraappa salpata orra ditiitinno takka nefo in hiddannin.

¹⁹ Oto paapahase lakan co oppopa samayta turopa sooknaaneeyye, akka samayta quda in kaynin ka rakkoota qara in pi'inini'i, a mehadda kodaan kodene isquda sookshen ka kaataddasene qulqullaawe kara' xaayen ka a pila kalsaden.’

²⁰ Qeesewwa mattaaysho in kooshannin, umma in jifsannin; ma a qara mujaden.

²¹ Oto paapahase karan co opa kullinaaneeyye, nama a qeesitta kodde taadeta wayneeta in ikkinin.

²² Qeesewwa hiyyetteeta a diirta qara to'e taaki iskatteeta a diirta alle isheetta diishe in heminin; ma xoori sanynyeeta Isira'eeli oppa enenta a issin kitto taaki a diirtaadi qeesitta kodde ka qara to'e hema i'ettanshan.

²³ Qeesewwa wa xawwi reexxame ka in reexxammini ka wa nyale ka in nyallini, atta akkima olkela reexan, a samaytiyyo kollishen.

²⁴ Oton wa qara oli shiishnaane'e xa'ayye, qeesewwa a taanynyada kodden ka taantetiyyon deexa muren ka xaysonessumaayyo a ishi' xoora qapamene piisa oppaayye, a seeriyyo ka taantewwaayyo tooyten ka kuyyawwaayyo a nessuma xawwi reexxen ka tooyten.

²⁵ Qeesewwa pukka qudopa dehattanne isi nyalissa ishootta parpaaccisni in kitto; ma xoori oto pukka aappaayshoti, taaki a aayyaassoti, taaki a innaadi taaki a enentaadi taaki a innaassoti taaki a enentaaysho a in hemamminiti' quda kayeeta i'ettansha.

²⁶ Ma xoori oto jaqqamo nefooyye kuyyaata tappa jara.

²⁷ Kuyyaata oppaayye koda kodeeta'e porase qulqullaawe a paapahase karan co opa kullinooyye, juppootaadi'i kalisoota juppoota dehassa isha faani; sede ana Waaqase' piisa qara qapo haasawade.

²⁸ Sede lehanda qeesewwa; lehandaasso nefo ana! Isira'eeli kara anan lehandaasso'ey, ishootta lehanda a' daassan; anan lehandaasso'ey.

²⁹ Ishootta kalisoota unta ka a haseenta juppoota isho a ishin dapayta' dehaannitto daman; wa Isira'eeli kara ana' xawwi reexxame' piisa ka a xaaysho koddan.

³⁰ Untaayshin piisa qaraayye, isase fayya heddaamte a qarpatta' koonittan ka ana kalinnittan ka kalisoowwaassina a pila a ana' kalinnittane' piisa, a qeesewwa'e koddan ka daammaayshin qaraayye qarpatta a sookno, qeesewwa'e daassan; anti orra asse koono tikkaasso' sakannen immaka.

³¹ Qeesewwa xampirteeta taaki leetteta a issin toote taaki a pinanta qape dameeta ishootta parpaaccisni in kitto.”