Xuuma Hisqeeli 43 - Mataafa Qulqulloota

Akkima ulfeena Waaqa tika qulqulloota karopa oore

¹ Kamma' desa namase ka xarrase a oxinta qinda piirtotati' qatopa anan aane.

² Anka a ulfeena Waaqa a Isira'eeli a qinda piirtotati desa deeno akke; nessa a deenaadi kela xaano ka a malxa kutta' mina kuuminni. Ulfeenaadi ka piita qara' la'aye.

³ Keleshaatose an akke keleshaatase an awta Waaqa katama Yursaalami' patissa de'eyye akkeew paha ka asseew keleshaatase an kaba Kepaari kapa akke paha; anka piitopa pi'e ka fuula piitan kaye.

⁴ Ete ulfeena Waaqa xarrase qinda piirtotati' qaten tika qulqulloota' kelopa kullinooyye,

⁵ Hapura ka opeela ana qeede ka paapahase karan co opa anan aane; tin tikase a qulqulloota ka ulfeena Waaqatin immakaatte.

⁶ A namase ana kapa' qa'annooyye, anka a nama pila tika qulqulloota kelaxata ana' haasawanno dakaye.

⁷ Ka ana' kiini, “Atti to'ampayta namatiiyyi, poroose are co pora suufaaniyyo ka pora a loqtiyyo oppa yetatto, anka haka paraparati otanta samaytiyyo a Isira'eeli oppa' kallaado; umma kulipaata samayta maxxase' xayyo qulqullaawe in nyalsho, umma samayta Isira'eeli isho nuqussaasso killanna' sakatattaanne ka oto nuqussaasso le'aneeyye wa a koonaanetinni maxxiyyo in nyalshan.

⁸ Ishootta' xarra tikaaysho a killoota'e xarra tikiyyo oppopa dehaysaden; otantoppa qussa patta ka ca ka nyalaasso a kodeneetinni maxxiyyo a qulqullaawe' nyalshen; semalla anti ka miiriyyon ishootta pire.

⁹ Amma oori killanna' sakatattaaysho isho pukkada a nuqussaassoti a ana kapa sekayshen; anti haka paraprati otantaaysho oppa'en kallaadaay.”

¹⁰ Ka sekkamma ana' kide, “Atti to'ampayta namatiiyyi, qoota qupeeta tika qulqullootati desa, samayta Isira'eeliti torre ka akeekaadi kuli ishootta' la'ayshe; ikka juppootaayshotin jeeren.

¹¹ Oto wa kodene' piisa minan jeera ishootta' dakaannooyye, akeekase a tika qulqulloota ishootta akkishe ka atta akkima qupamto ka poraadi a sooketa ka a kulleeta ishootta la'ayshe ka akka ishin kallaadane'e, akeekaadi piisa ka taantewwaadi isho seeraadi ishootta tura' taafe.

¹² Tin sede seera a tika qulqulloota: haminta a kuuta irroota qara kitto ka tikase a qulqulloota kapa tiitasse piisa, a akata qulqullaawte koddita.”

Poqa kalisoota

¹³ Poqasene a kalisoota asse ekkaysatammi: pora a qara poqasene a kalisoota' dawame, derumaadi metireeta quda paka; paldumaadi metireeta quda paka; palduma a kaamaraadi a kapa tiitayshe, senti meireeta dippa lakki ka kunda keni; deruma a poqasene a kalisoota moontandela asseew metireeta quda paka.

¹⁴ Kirittaadi a piita qara co paayyatteeyye haka kaamaraadi a xata qatooti'i, derumaadi metireeta takka ka paldumaadi metireeta quda paka; kaamaraadi a xata qatooyye paayyatte haka kaamaraadi a ela qatooti'i, moontandela, derumaadi metireeta lakki ka paldumaadi metireeta quda paka.

¹⁵ Qindase tula qara' qato a poqa a kalisoota a qara' kalisoota kupnaan, moontandela derumaadi metireeta lakki ka kaassa afuri qapa.

¹⁶ Poraadi a qara' kalisoota kupnaan qindaddaadi oli mina'e caan; derumaadi a piitandesa metireeta lehi ka paldumaadi metireeta lehi.

¹⁷ Kaamaraadi a moonta' qato, qindaddaadi afuri asseew olmina' caan; derumaasso metireeta tappa ka kaamara a seneti a metireeta kunda lakki keni kayno isi mina qapaneew; ashanta a porase kalisoota karan xata metireeta quda paka ka qinda piirtotatin fayma qapa.

Pora kalisoota akka qulqullaawe

¹⁸ Ka ana' kideewwe, “Atti to'ampayta namatiiyyi, Waaqase' piisa qara qapo ikiini, ‘Oto poqasene a kalisoota dikkadooyye, qara' kalisoota a kupannitto dehassa'e ka qara' diika fida'e, taantewwa a qara' kodane' sene.

¹⁹ Qeesewwasene a Lewaata a sanynyeeta Sadooqi kodde a ana turopa dehanna ka ana kela koda koonaati'i, xelloota horeeta oppa hasenta juppootati'i xorma takka daashe.’ Sede Waaqase' piisa qara qapo asse haasawade.

²⁰ Atti' diikaadi quda shakkayta' qeetta ka kaassasene afuri a pora kalisoota ka qeppeelliyyasene afuri isho kaamarra a qorrima qarandesa daatita ka asse porase a kalisoota jaqqita ka ishi' haseenta juppoota' koota.

²¹ Atti' xormase haseenta juppootati' qalame' qeettaaw ka porase qulqullaaweyye laka tulaayye, porase a tika qulqulloota ishi reexxame oppa' kupta.

²² Kuyyaata lammattatiiyyiiw qolpayta a toobuma in qapnin takka' qeettaw ka haseenta juppootati' qaltaaw; akkima poroose a kalisoota' diika xormatin jaqqame mina'e, asseew diika qolpaytaseetin jaqqitaaw.

²³ Oto' porase a kalisoota jaqqeeta dikkissooyye, xelloota lo'alla oppaayye xorma takka a toobuma in qapnin, ka xelloota kahirra oppa laha takka a toobuma in qapnin qeede ka kalisoota' kalshe.

²⁴ Atti Waaqa tura'e' dehassa; qeesewwa ka qara' sookitta fidan ka Waaqa'e kalisoota apittan kupannitto' kodan ka dehaayshan.

²⁵ Haka kuyyaata tappati'i kuyyaata mina'e' haseenta juppootati'i, qolpayta takka takka' dehassa ka xellootoppaayye xorma takka isho laha a toobuma in qapnin takka dehassaaw.

²⁶ Kuyyaata tappa kara'e' poroose a kalisootati'i haseenta juppoota kodan ka jaqqan ka seden xawwi' reexxan.

²⁷ Oto kuyyawwosen dikkadan kammaayye, kuyyaata settattatiiyyi paayyatte, qeesewwa a qara' kalisootaaysho a kupannitto isho a takkumta' dehaayshen; anka ishinan xasoodo.” Sede ana Waaqase' piisa qara qapo asse haasawade.