Xuuma Hisqeeli 42 - Mataafa Qulqulloota

Tikkasene lakki tika qulqulloota kapa' qupame

¹ Sekkamma namase ka qinda qutattatin paapahase laka tula co oppopa anan aane ka tika a tikase isho porase asse patta co ka tika qulqulloota kammeela kitto mina tooynittopa anan aane. Tikase isho porase asse patta hase nefo, tikasetiiyyi qinda qutattatinni akkaanni.

² Tikase a xarraadi qinda qutattatin co, derumtaadi a piitan desa metireeta kunda keni; paldumaadi kan metireeta kunda lakki keni.

³ Paapaha a karan co a paldumaadi metireeta kudani kaynaan minandesa ka dakase afame a paapahase laka tulan co minan desa, tika a fooqeta sessa koddite ka qupamte ca; fooqewwasene ka matta mina' silaya qapan.

⁴ Tikkasene oppa qoqqootame turaayye pora oppan tarpinaane ca; paldumaadi nefo metireeta keni, derumaadi kan metireeta kunda keni; xarradaasso' nefo qinda qutattati'i qatan.

⁵ Tikkasene oppa qootame a tula qara ca ikikilla'i; sede nefo qoota tikka a piita' qata isho a otanta' qata kapaayye a tula qara' qata silaytaaysho paldaanno malla.

⁶ Ishootta' qoota fooqeta sessaan olqara' qupamen malla ka tuudda silayta a paapaha paha in qapnin malla; tikka a tula qara' qate lakki a oli qareela ca karopa desa kakkalen ka qupamen.

⁷ Tikase' minandesa laka tulanne, qussa takka ca ka arta tikaseti isho a paapahase a laka tula co karan desa anni; derumtaadi ka metireeta kunda lakki keni kayni.

⁸ Maana malla tikkasene paapahase laka tulan co oppa ca' piisa, olloppa dedderumaasso metireeta kunda lakki keni; a porase qulqullaawe minaayye ca'ew, derumaasso metireeta kunda keni.

⁹ Oto paapahase a laka tulatiiyyi karopa kullinaaneeyye, tikkoosene kela xata qinda piirtotatinni, xarra kullaysuma takka ca.

¹⁰ Tika qulqullootati qinda tupattatinni akka a qinda qutatta' mina'e, tika a kifilewwa qapto ca; kifilewwosen nefo, tikase isho porase asse patta hase ka tika qulqulloota kamman co mina tooyni.

¹¹ Tikkasene qoqqootame turaayye pora oppan tarpeeta ka ca; tikkasene qoqqootame a qinda qutattatin ca'ew, pahan; derumaasso ka paldumaasso nefo takkaaw; poraaysho a karan sookeeta ka olmina' qunamaaysho isho xarradaasso kan takkaaw.

¹² Akka tika pila qinda qutattatin xarrada qapto mina'e, tikoose asseew qinda tupattatin xarrada qapta; tikoose isho qussase olkela ishootta qoonno arta karaayye, pora a karan tarpinaan ka ca, pora oppa poroose a karan tarpinaan paayyanno oppaayye xarra a nama karan kullino ka ca; xarrose nefo qinda piirtota opa tiitaawe.

¹³ Namase ka ana' kide, “Tikkasene qoqqootame a qinda qutatta ka a tupatta isasene porase asse patta co mina tooyna, tikka qulqullaawe qeesewwa Waaqa kapopa dehaanna, eeyye kara kalisoota akata qulqullaawte daman ka eeyye kara' kalisoowwasene akata qulqullaawe a unta ka a juppoota isho a ishin dapayta' xaayadan; maana malla porase a qulqullaawey.

¹⁴ Oto qeesewwa porase oppopa kullaneeyye, a mehadda a kalsannaane ka ishin koda koonaane a eeyye kara'en xaaynin maliiyyi paapaha laka tulan co oppopan sookan; maana malla mehadda qulqullaaweey; a pora samayta oppopa in sooknin turanne, mehadda a pila kalsatta ishootta faani.”

Porase a oppa tika qulqulloota qupamte atta akka co

¹⁵ Namase ete porase a oppa tika qulqulloota qupamte qinda karatin ekkaysade kammaayye, xarrase a qinda piirtotati qato karanne anan sooke ka porase a oppa tika qulqulloota' qupamte laka tulan tiitaawwaataadi ekkaysadeew.

¹⁶ Ka qinda a piirtota' qato uleeta a paatan ekkaysannaanen ekkaysade, ikka metireeta dippa lakki ka kunda keni kayte.

¹⁷ Ikka uleetase paatan ekkaysannaanen qinda qutatta ekkaysade, ikka metireeta dippa lakki kunda keni kaye.

¹⁸ Ikka qinda tupatta ekkaysadeew, ikka metireeta dippa lakki ka kunda keni kayeew.

¹⁹ Ikka qinda dumaateta ekkaysadeew, ikka metireeta dippa lakki ka kunda keni kayeew.

²⁰ Ikka qindaddoosen afuri piisan ekkaysade; pora a xawwi reexxame, a in reexxammin kapa purissa'e kawwatta otantoppa ca; deruma kawwasseeti metireeta dippa lakki ka kunda keni; paldumaadi kan dikla metireeta dippa lakki kunda keni.