Xuuma Hisqeeli 41 - Mataafa Qulqulloota

¹ Sekkammaayye, namase ka tika qulqulloota kela pora a qulqullaawe oppopa anan kulle ka tuudda ekkaysade; qindadda lakki piisanne ikka metireeta sessa sessa kayen.

² Palduma a kullaysumaadi, metireeta keni; palduma a qussaadi a qindan cooti, metireeta lakki ka paka; ikka porase qulqullaawe ekkaysade, ikkan metireeta kunda lakki; paldumaadi kan metireeta kudani.

³ Ikka qulqulliteeta qulqullowwa' karopa kulle ka tuuda kullaysuma ekkaysade, ikkan metireeta takka takka ka xarra ekkaysade, ikkan metireeta sessa ka xarrosetiiyyi qussa a qindaddaan co ekkaysade, ikkan metireeta sessa ka paka.

⁴ Ikka kaatasene ekkaysade; derumaadi kan metireeta kudani; ikka ana' kide, “Sede qulqullitteeta qulqullowwa.”

Tikka a tikase a qulqulloota quda laka tulan qupame

⁵ Ikka korduma a qussa tika qulqulloota ekkaysade, ikkan metireeta sessa; ikka palduma a tikkasene tikka qulqulloota kapa qorrayshe ekkaysade, ikkan metireeta lakki.

⁶ Tikkasene' kapandesa ca, olqarandela sessa'e qupamen ka piitandesa kunda sessa kayni; tikkoosen olqarandela qupame kela desa xarna ishootta haana'e sossooke, ma xarnoosen qussa tika a qulqulloota quda in kayne.

⁷ Palduma a tikkasene tika qulqulloota' kapandesa qupame, opeela paldumanne anni; qoota opeela paldumaan annaan malla, tikase' piisa ka paldattaan anni;

⁸ tikase a qulqulloota kirittaadi a moontandela metireeta sessa kayno qara'e qupamte; tikkasene olqarandela qupame ka isheetta kapa tiitayshe ka kirittaadi qara'ew qupameneew.

⁹ Korduma a kawwatta a laka tulan kitto a kaataddasene qindaddaan caati, metireeta lakki ka paka; tikkasene olqarandela qupame kapandesa laka tulanne pora asse patta hase a paldumaadi metireeta lakki ka paka kaynaane ca.

¹⁰ Kirittase a tika qulqulloota isho tikkasene a qeesewwa kara koda koonaane arta kara, pora asse patta hase a metireeta kudani kayno ca.

¹¹ Xarrada a kaataddasene a qinda qindan caati, qinda porase arta kara' hase opa panammi; xarra takka qinda qutatta opa panammi; xarra takka'ew qinda tupatta opa panammi; palduma a porase kiritta qara cooti ka arta kara' hase, metireeta lakki ka paka kayni.

¹² Qinda dumaatatinni tikase' pora a xawwi co mina tooynitto, derumaadi moontandela metireeta kunda sessa keni; korduma qussaadi kapa tiitayshe, metireeta lakki ka paka; derumaadi a piitandesa kan metireeta kunda afuri keni.

Akka tika qulqulloota ekkaysaden

¹³ Sekkamma ikka tika qulqulloota ekkaysade; derumtaadi metireeta kunda keni; tikase a qulqullootati tultoppanne porase asse patta hase karanne qinda dumaatetatinni haka piraampira tikasetiti'i ete ekkaysadeeyye, ikka derumtaadi metireeta kunda keni kayni.

¹⁴ Ikka qinda piirtotatin tika qulqullootati fuula turandesa porrasene asse patta hase olloppa ekkaysade; derumaadi kan metireeta kunda keni.

¹⁵ Ikka tikase tika qulqullootati tultan kitto ka pora arta kara' hase mina tooynitto isho' poraadi a karan tarpeeta a qinda qindan co olloppa' derumaasso ekkaysade, ikkan metireeta kunda keni. Poroose qulqullaawe ka silayse kelan tarpinaan paapaha oppopa sookno,

¹⁶ ishootta piisa maskootewwa a shakkayta karopa desa kale ka a kaamarra a quda tiitayshe qapa'e qapan; qussaaysho piite paayyatte haka maskootewwaati'i, shammanne quda uwwishen; maskootewwaasso ka quda dekamen.

¹⁷ Xarra qareela qussa tika qulqulloota qinda laka tula ka a karatinni, sira a kollatameetinni siren.

¹⁸ Pahana a kirupeelewwa isho a qoyra sampaapa ka qara' xaasamen; opanka qara'e, pahana kirupeelewwa isho a qora sampaapa olkaran pujen; kirupeelewwasene ka matta mina' fuula lakki lakki qapan.

¹⁹ Qoyra sampaapa a qinda takkan co opa fuula nama'e tiitasse ka qoyra sampaapa a qinda takkan co opa fuula haaritta karma' tiitasse; opanka tika qulqulloota' piisa quda' pojen ka qudan tiitayshen.

²⁰ Piite paayyatte haka qussa a xarra qareela cooti'i, pahana a kirupeelewwa isho qora sampaapa'e quda' pojaame ka qussa a pora qulqullaawe piisa quda pujame.

²¹ Qora a xarra pora qulqulloota quda dishame, kamaarra afuri afuri qapan; a xarra qulqullitteeta qulqullowwa' tura' dishame ka asseew qapan.

²² Pora kalisoota a qoyroppa kodame ka caaw; derumaadi moontandela metireeta takka ka paka; paldumaadi a piitandesa metireeta takka; derumaadi a piitandesa metireeta takka; qeppeelliyyaadi ka kiriyyaadi isho qussaadi qoyroppaaw kodamen; namase ka ana' kide, “Ha sede tarabbeesa a fuula Waaqa' tura kinnaanno.”

Xarradasene

²³ Porase qulqullaawe isho qulqullitteetase a qulqullowwa xarrada lakki lakki qapan.

²⁴ Xarrada lakki qinda laka tulatinni caan, xarrada lakki ka qinda tika karatin caan ka oto dufammaaneeyye olminopa dufammi ka oto panammaaneeyye shuuraraaysho quda shuuraari ka panammi.

²⁵ Xarradasene pora a qulqullaawe tura ca qudaayye, pahanasene a kirupeelewwa isho a qora sampaapa isasene qussa quda' pojene paha'e quda caaw; laka tulan silaytase' kelan tarpinaan turaayyeew oxinta shamma ka kittaaw.

²⁶ Qussa a silaytase kelan tarpinaan quda'e, qinda qindanne, maskootewwa a kikilla'a'e koden ka quda' pahana qoyra sampaapa pojen ka kaataddasene a tika qulqulloota isho a qudan shamma qapene quda asseew poojen.