Xuuma Hisqeeli 40 - Mataafa Qulqulloota

Keleshaata qoota tikase a qulqulloota itturopa qupamto desa akkaade

¹ An poojamme para kunda lakki kenattaatiiyyi ka a katama Yursaalami qara pirameneeyye para kudanka afrattatiiyyi, ka leya paayyotati ka leyoose oppa kuyyaata kundattatiiyyi, awse kuyyaasetiiyyi hupna Waaqa ana qara lekkade; ka katama Yursaalami opa anan aane.

² Ka keleshaata Waaqatin piita Isira'eeli opa anan aane; ka irroota takka akata dera qara ana xaaye; wa katama paha ka irrootasete qinda tupattatin caan.

³ Ete eeyyepa anan aaneeyye, anka nama takka sipla a puddayaysa paho ka warwarro akke; namoose ka wataroota a xaynaata qora talpa oppa soohamte isho uleeta a paatan ekkaysannaan harkoppa' qapde ka pora xarra tika qulqulloota oppa qa'ade.

⁴ Ka ana kide, “Atti to'ampayta namatiiyyi, wa malla arepa qeedamte akkan we takkan ke akkisho mallaay, waan ke akkinna qanqannissa tooye; ka qanqannissa dakkaysado; ka qanqannissa qalpeeffado ka wossen piisa samayta Esra'eliti lele.”

Xarrase a oxinta a tika qulqulloota a qinda piirtotatin qato

⁵ Anka oxinta kawwatta a tika qulqulloota piisa kapa tiitasse akke; namase ka qoyra a paatan ekkaysannaan harkoppa qapade, qoyroose nefo derumaadi metireeta sessa; ikka kawwattase a oxinta ekkaysade. Moontandela ikkan metireeta sessa, kordumaadi kan metireeta sessa.

⁶ Ka sekkammaayyeew oxintase a kawwatta qinda piirtotati qato opa aane; ka faymaadindela fayyade ka siiba mina paayye ka korduma kawwattaseti ekkaysade; ikka metireeta sessa kayte.

⁷ Tikka a tooytampaya a derumaasso isho paldumaasso meetireeta sessa sessa kaynaane ka caan; tikkoosen a tooytampaya, otanta karaayye qussa kawwatta a metireeta lakki ka paka kayno ca. Ikka xarrase tika tooytampaya a karan kitto isho silayteeyye otanta kara kitto ekkaysade; ikka metireeta sessa kaye.

⁸ Sekkammaayye ikka silaytase a kullaysuma xarra qinda karatin qato ekkaysade; ikka metireeta afuri kaye.

⁹ Ikka silayta isho paapaha otantoppaayye korduma kawwatta ekkaysadeew ikka metireeta takka kayte; silaytose a kullaysuma, xarreeyye qinda karatinni ca.

¹⁰ Tikkasene a tooytampaya olmina'ew cecca ka xarrase qinda piirtotatin qatooyye akkitta ka pittittan ca, oli mina tooyni; korduma a qussaayshoti a qindaddaan co ka oli mina'ew ceccaan.

¹¹ Sekkamma ikka palduma a kullaysuma xarra ekkaysadeew; ikkan moontandela meetireta keni, ikka tikkasene oli mina tooyna arta karaayye palduma ca ekkaysade; ikka metireeta lehi ka paka kayte.

¹² Tikkasene a tooytampaya turaayye kawwatta a derumaadi ka kordumaadi metireeta quda paka paka kaynaane ca; tikkasene a tooytampaya qindadaasso afuri piisa oli mina'ew caan; deruma qindaddaassoti, moontandela metireeta sessa sessa kayni.

¹³ Ka sekkaammayyeew, tikkasene a tooytampaya oli mina tooynaatiiyyi qussa tulta a tika takkatti paayyatte haka qussa tulta a tika pilaati ekkaysade; ikka metireeta kudanka lakki ka paka kayte.

¹⁴ Ikka xarrase a kullaysuma silayte paayyatte haka paapahati co moontandela ekkaysade; ikka metireeta kunda sessa kayte; qoota tikase karan kullinaan paapaha karandesa kalte malla, tikasetiiyyi paapaha qinda sessaanne caade.

¹⁵ Ikka porase a karan tarpeeta kawwatta kela tulta paayyatte ha ka pirampira tikasetiti'i, ekkaysadeew; ikka metireeta kunda lakki keni kayte.

¹⁶ Tikkasene a tooytampaya qussa a tultan qate isho a karan qate qudaayye, maskootewwa qapan. Qussada a tikkaseneti qudaayyeew, pahana a qora sampaapa'e ca.

Paapaha a laka tulan qato

¹⁷ Sekkamma namase ka paapahase laka tulan co oppopa ana qeede; paapahase dakanne afame; kapandesa tikka ka caan; tikkoosen nefo kunda sessa kayni.

¹⁸ Dakaase afame, tiitaawwaatase a paapaha'e kayni; paapahase laka tulan co, paapaha a karan co kapaayye opaxata ca.

¹⁹ Namase ka xarra laka tulati qinda a karan qato paayye ka haka xarra a karan cooyye qinda laka tulati'i, paldumaadi ekkaysade; ikka metireeta kunda keni kayte. Xarra qinda piirtotati' qate kammaayye, anka qinda qutatta opa anneew.

Xarra a qinda qutatta

²⁰ Namase ka xarra a paapaha a laka tula isase qinda qutattati' qato derumaadi ka paldumaadi ekkaysade;

²¹ akka xarra paayyota mina'e, Xarraaysho qinda qindanne tikka a tooytampaya sessa sessa qapa; ka oxinta kawwatta isho silayta a karan tarpeeta a xarra paayyota olmina ca'ew qapa; derumaadi metireeta kudanka lakki ka paka, paldumaadi metireeta kudanka lakki ka paka kayni.

²² Maskootewwaadi ka silaytaadi a karan tarpinaan isho pahana a qoyra sampaapa a quda xaashene, a xarra qinda piirtotati' qato quda ca mina'ew ceccaan; samayta ka fayma tappa qaran karopa fayanni; silaytase karan tarpinaan ka xarreeyye qinda karatin kinnaanni.

²³ Akkima xarra a qinda piirtotati qato co mina'e, xarra a qinda qutatta minandesa, xarra paapaha a karan co'e ca; namase ka xarra takkaayye desa haka xarra pilaati'i, lekumaadi ekkaysade; ikka metireeta kunda keni kayte.

Xarra a qinda tupatta

²⁴ Sekkammaayye ikka qinda tupatta opa anan aane; anka eeyye xarra tupattan xata sookno akke; namoose ka qussa a karan co isho silaytase kelan tarpinaan ekkaysade; ikka xarrada a taakane mina'ew ca.

²⁵ Qussase karan co isho silaytase kelan tarpinaan, a taakkane mina'e maskootewwa a ishootta quda tiitayshe qapan; derumaadi metireeta kunda lakki keni, paldumaadi kan metireeta kudanka lakki ka paka.

²⁶ Fayma a xarrase opeela oppan fayyannaan tappa ka ca; silayta a karan tarpinaan ka xarreeyye qinda karatin kinnaanni; ishootta mina desa qussa a karan co qudaayye, pahana qoyra sampaapa ka qindadda piisan ca.

²⁷ Paapaha karan cooyye qinda tupattatinni, xarra a pila ka caaw; namase ka xarroseti paayye ka haka xarrase qinda tupattati lakan cootiti ekkaysade; ikkan metireeta kunda keni.

Xarra tupatta a paapaha a karan cooti

²⁸ Namase ka xarra a tupatta qatoppanne paapahase karan co opa anan aane; ka xarrase tupatta' qato ekkayysade ikka xarradasene a taakkane mina'ew ca.

²⁹ Tikkasene xaadi a tooytampaya isho qussadaadi a karan ca, ka silaytase xaadi kelan tarpinaan a taakkane mina'ew ceccaan; silaytase xaadi kelan tarpinaan ka maskootewwa a quda tiitayshe qapa. Derumaadi metireeta kunda lakki keni; paldumaadi kan metireeta kudanka lakki ka paka.

³⁰ Silaya a kelan tarpinaane ka kapa qorrayshen; derumaasso metireeta kudanka lakki ka paka, paldumaasso kan metireeta lakki ka paka.

³¹ Silaytaad a kelan tarpeeta paapaha a lakan co mina tooyni; pahana a qora sampaapa ka qussaadi a karan co quda caan; pora oppan opeela fayyannaan ka fayma sette qapa.

Xarra qinda piirtota a paapaha karan cooti

³² Sekkamma namase ka paapahase karan co a qinda piirtotatin qatopa anan aane; ka xarrase ekkaysade ikka xarradasene a taakkane mina'ew ca.

³³ Tikkasene xaadi a tooytampaya isho qussaadi a karan co ka silaytase xaadi karan tarpinaan ka a taakkane mina'ew ceccaan; xarrase isho silaytaadi a karan tarpinaan ka maskootewwa a quda tiitayshe qapa; derumaadi metireeta kunda lakki keni. Paldumaadi kan metireeta kudanka lakki ka paka.

³⁴ Silaytaadi a kelan tarpeeta paapaha a laka tulan co mina tooyni; pahana a qora sampaapa ka qussaadi a karan co qudaayye qindadda piisan caan; porra oppan opeela fayyannaane ka fayma sette qapa.

Xarra qinda qutatta a paapaha karan cooti

³⁵ Sekkamma namase ka xarra a qinda qutattati qatopa anan aane; ka xarrase ekkaysade ikka xarrada a taakkane mina'ew ca.

³⁶ Tikkasene xaadi a tooytampaya isho qussaadi a karan co ka silaytaadi a kelan tarpinaan, a taakkane mina'ew caan; ka maskootewwa a quda tiitayshe qapa; derumaadi metireeta kunda lakki keni; paldumaadi kan metireeta kunda lakki ka paka.

³⁷ Silaytaadi a kelan tarpeeta, paapaha a laka tulan co mina tooyni; pahana a qora sampaapa ka qussaadi a karan co qudaayye qindadda piisan caan; pora oppan opeela fayyannaan ka fayma sette qapa.

Tikka a xarrada karan ca kapa ca

³⁸ Silayse kelan tarpinaan qinda qutatta kapa co kapaayye, tika pila'e caaw; ka xarra qapta, opanka eeyye kara'e so'a a kalisoota a kupannitto jaqni.

³⁹ Silayse a xarra kelan tarpinaan, a xarra kapa co kelaayye, qinda karatinni tarabeesa lakki a qinda qindan xaayame ca; opanka qara kalisoota a kupannitto ka a juppoota isho a ishin dapayyta qalli.

⁴⁰ Qinda qutattatinniiw, oto kullaysuma a xarra qutatta opeela fayyannaaneeyye laka tulanne, tarabeesa lakki xaayame; silaytose kelan tarpinaaneeyye qinda pilaatinniiw tarabbeesadda lakki xaayame ka oli mina tooyni.

⁴¹ Xarreeyye qinda lakkinni, tarabbeesa afuri qinda qindan xaayame; opanka olloppa'e, tarabbeesa sette qara kalisoota qalli.

⁴² Tarabbeesadda a dakaappa xefene opanka qara kalisoota a kupannitto dehannaan afuri ka caaneew; derumaasso a piitandesa saantimetireeta kunda tappa keni; paldumaasso saantimetireeta kunda keni, ka moontandela saanti metireeta kunda keni; ofanka qara mehaddasene horeeta kalisoota a kupannitto isho a pilaati dehaanitton qallaan xaayni.

⁴³ Tika karanne rakkumaya a paldumaasso miili metireeta kunda tappa keni kayna'e ca; opanka qussa qudan tiitayshen ka hiden; so'a kalisoota ka tarabbeesaddasene qara' xaayammi.

⁴⁴ Sekamma isha ka paapahase karan co karopa anan kulle; eeyye kara tikka lakki ka caan; tika a xarrase a oxintati qinda qutattatin kitto ka fuulaadi qinda tupatta opa oorisse; a xarraseti qinda tupattatin kitto ka fuulaadi qinda qutatta opa oorisse.

⁴⁵ Namase ka ana kide, “Tikase fuulaadi qinda tupatta opa oorisse, qeesewwasene tika qulqulloota kara saaruma qapa, oto koda de'aneeyye kela koda koda.

⁴⁶ Tikase fuulaadi qinda qutatta opa oorisseew, qeesewwasene pora kalisoota qara saaruma qapa'e kela kodaa koda; ishootta nefo, sanynyeeta Saadoqi a Lewaatoppaayye a fuula Waaqa turopa dehaada ka koda koda ettansha ishootta patta.”

Tika qulqulloota isho paapahase karan co

⁴⁷ Namase ka paapahase ekkaysade; derumaadi a piitandesa kan metireeta kunda keni, paldumaadi kan metireeta kunda keni; qindaddaadi afuri piisa oli mina'ew caan; poraadi a kalisoota ka tikaadi a qulqulloota turaayye ca.

⁴⁸ Namase ka silaytase kelan tarpinaan a tika qulqulloota opa anan aane; ka qussa a xarra kapa a qudeela kullinaan ekkaysade; qindadda lakki piisanne, kordumaadi kan metireeta lakki lakki ka paka paka. Derumaadi kan metireeta takka ka paka paka.

⁴⁹ Deruma a silayta a kelan tarpinaane metireeta kudani; paldumaadi kan metireeta lehi; samayta ka fayma kudan qaran oppopa fayyanni; qussada a xara kapa a quda desa kullinaane qudaayye, tuudda ka caan.