Xuuma Hisqeeli 4 - Mataafa Qulqulloota

Hisqeeli akka Yursaalami kapa muramto pahanaan haasawade

¹ Ka ana' kideewwe, “Atti' to'ampayta namatiiyyi, piita okta a laaqqamte qeede ka istura' xaaye ka pahana katama Yursaalami qara akkishe;

² ka akkima katama Yursaalami a keeto koddite, xela oranna ka qinda piisa desa isheetta torpino, nama takka nefo ka kela pahani in kinnin akkishe ka akka kawwattaadi qitqinnitto qara' xaashe.

³ Ka peyqa sipla qeede ka ke isho katamasene otantoppa'e kawwatta siplati' kode ka qaatishe ka katamasene opa fuula tiitayshe ikka a kapa murame' kodden. Ka atti'iw ishootta kapa mure; sede ka samayta Isira'eeliti' milikkita koddito.

⁴ Ka atti qindaayti a pittitta qara' mukke, anti juppoota samayta Isira'eeli'in ke qara' xaaya; kuyyawwa oppa muknitta' piisa kara'e atti ka qitaateta juppootaayshoti' haadatta.

⁵ Anti parrasene a ishootta kara juppoota koden kapa'en kuyyawwa a' kara qitaatetaayasho haadatto ke' kite. Semmalla kuyyaata dippa sessa ka kunda sakali qitaateta samayta Isira'eeli haadatta.

⁶ Oto kuyyawwosen pirtooyyeew qindaayti a akkitta qara'e' mukkitaaw ka qitaateta a samayta Yihuta' haadattaaw; parra a kara juppoota koden kapa'e kuyyaata takka takkan ke dikeey kuyyaata kunda afuri kara'e qitaatetaaysho' haadatta.

⁷ Yursaalamise kapa muramtepa fuulaayti a miira tiitassaaw ka harka xootetaayti opeela marratta ka isheetta qara' xuuma haasawatta.

⁸ Haka kuyyawwa a kapa muramte dikkannaan kara'e, akka a qinda pila opa karkala a ettaninnini'i tin anti watarootannen ke hida.

⁹ Atti kappa ka poorta ka paaqela ka missira ka shuulayta isho ajja' qeetta ka meeha takka kara ishootta xaayta ka dama' anqalatta. Kuyyawwosen dippa sessa ka kunda sakali a' muknitta kara'e sene' damta.

¹⁰ Damta a kuyyaata kuyyaatan dammitto hiilaadi kiraameta dippa lakki ka kunda sessa; akka kuyyaata kuyyaatan sede damta.

¹¹ Pishaatti a iknitta hiilaannewwe ikta. Kuyyaata kuyyaatanne nitiroota quda paka patta ikta.

¹² Ka uta nama a qora' mina xaayyatta ka fuula orra piisa' tura'e akka laaqqota poorta' dammitto mina' laaqqotaayti ishin palaysatta ka damta.”

¹³ Waaqa ka kide “Oton samayta Isira'eeli orra ana amanni in kinnin oppopa alle' pittinnaysheeyye, tooy asse damta a nyalte damen.”

¹⁴ Anti ka kide, “Waaqqo ke a piisa qara qapo, oo ana kido! Tin anti apari issi an nyalinne; umma an shakki paayyatte haka awweti'i wa issin to'e taaki wa a pinanta qapte an damme; umma so'a a nyale afaappan an kayne.”

¹⁵ Isha ka ana' kide, “Asseeyye akka uta nama alle' diisso ka xoopnatta lo'allaatin laaqqotaayti palaysatto'en koda.”

¹⁶ Ka semaliiyyiiw ana' kide, “Atti' to'ampayta namatiiyyi, tin anti Yursaalami qaraayyen alle' damta mura, ikka qaapa ka fuuraan immakaatta ka damtaadi hiilan damta ka pishaadi hiilanneew ikta.

¹⁷ Akka damta isho pisha dapan ka olqara tatammaqan ka juppootaaysho' minan nyorpane'en asse koda.