Xuuma Hisqeeli 39 - Mataafa Qulqulloota

Akka Kooki' putamto

¹ Atti to'ampayta namatiiyyi, Kooki qara' xuuma haasawado ka kide, “Waaqase' piisa qara qapo ikiini, ‘Atti Kooki! Ke samayta Mesheeki isho a Tupaali qara saara a kutta kodde, tin anti ke qara'en xaani.

² Isi kammandesan ke tiitaysha ka itturandesa ke ansha; siiba qutattatinnin ke qeeda ka akka irrowwa Isira'eeli' qara oranna qitisso ke koda.

³ Ka ke daysha ka harkaayti a pittitta oppaayye paantaayti kata ka lawaddaatti harkaayti a akitta oppaayye alle' tuqa.

⁴ Ke isho xelaayti a oranna ka samayta a ke quda co piisa irrowwa Isira'eeli qara'e leetan; anka akka xampira moonta ika lekayta isho pinaana koommayta ishin damane' koda.

⁵ Akka lakoppandesa seehtan; ana Waaqase' piisa qara qapo sede haasawadeey.

⁶ Anti orra Makooki isho a qaapa mali pakateeta kapa kala' qaropan apitta erka; ikka akkiman anti Waaqa kodde upnaadan.

⁷ Anka maxxase' xayyo qulqullaawe akka samayse' xayyo a Isira'eeli oppa upnaysamo' koda; umma arepadesa maxxase' xayyo akka otamo an kodo; mankistewwa ka akkiman anti Waaqa qulqullitase a Isira'eeli kodde upnaadan.”

⁸ Waaqase' piisa qara qapo ikiini, “Tin deena qara kitta ka dukaatan koddita; isheetta' nefo kuyyaatase an qootaadi desa haasawade sede.

⁹ A katama Isira'eeli kara kala ka sookan ka mehaddaasso a oranna a piitopa' xaayadan ka kontalewwa isho kaashshanna ka paantada isho lawadda ka kumaya isho oranna, para tappa kara' xaayyadan.

¹⁰ Semmalla lakoppa qora qorootatta ka muroppa qora qorootatta ishootta parpaaccisni in kitto; maana malla mehaddaasso a oranna'e xaayyadaneey ka a ishootta qara pooje' poojan ka a ishootta sare' saran.” Waaqase' piisa qara qapo asse haasawade.”

Hawla a Kooki

¹¹ Kuyyaasetiiyyi piita Isira'eeli kara naabase a orra pora annooti, a pakateete qinda piirtotatin co kara'en Kooki' pora mooka' daasha; qoota Kooki isho xelaadi a oranna' piisa eeyye kara' hawlaamo malla, ikka orra anno tura' pora dufa. Naabase ka laka xela oranna a Kooki kidama.

¹² Samayta Isira'eeli ka piitase jaqqeeta'e, leya tappa ishootta mooka.

¹³ Samayta piita' piisa ka ishootta mooka; kuyyaata an anti ulfeeniyyo akkinnooyye, ikka ishin kalataysaman; sede ana Waaqase' piisa qara qapo asse haasawade.

¹⁴ Leya tappatta kammaayye, oton pukkada tarra qara' hase'e caayye, orra a kuyyaata mina pora tittiitaawo ka fado ka hawlo ka seden piitoose' jaqqo kitan.

¹⁵ Isasene piitoppa tittiitaawna oto lafa nama akkaneeyye kapa'e milikkita dishan; orra hawlino ka qeeda ka naaba Namoon kooki kara' hawla.

¹⁶ Katamoosen kuli ka Hamoona kidaman; ikka asse piitoose jaqqan.

¹⁷ Waaqase' piisa qara qapo ana kide, “Atti to'ampayta namatiiyyi, xampira ika piisa ka pinaana a koommayta opa haasawado ka ishootta' kide, ‘Sankultase kutta an irrowwa Isira'eeli' qara ishina' harminno ka oppa' horeeta qallo oppopa xora katada ka qinda piisaayye desa oppopa xooya ka so'a dama ka diika ika.

¹⁸ Ka irreelayasene isho kutkuttowwasene a laahadda ka haara laahadda isho a qolpaya ka a xormada a paasaani mina' meere oppaayye so'asso' dama ka diikaysho ika.

¹⁹ Ka sankultase an ishina' harminno ka oppa horeeta qallo oppaayye, haka' duduttannittane' hallaaka dama ka haka' maashshoonnittane diika ika.

²⁰ Sankultiyyo oppaayye so'a fartada isho a xela sarakelladdaan torpinooti ka a irreelaya ka a torpampaya pilaati' damtan.’” Sede Waaqase' piisa qara qapo asse haasawade.

Akkima Isira'eeleta piitaadipa tiitaawte

²¹ Anti ulfeeniyyon mankistewwa qara akkisha; mankistewwa piisa ka firteetiyyo an qeede ka an hupniyyon ishootta qatta'e akkan.

²² Awseti desa paayyatte samayta Isira'eeli ka akkiman anti Waaqa Waaqaaysho kodde upnaatta.

²³ Mankistewwa ka akkima samayta Isira'eeli juppootaaysho minan poojame upnaadan; qoota ana amanama diishen malla, anti fuuliyyon ishootta qara tiitayshe; ka harka nyaapaayshoti oppopa ishootta tuukke ikka piisani orannaappa' piramen.

²⁴ Anka akka nyalaassoti isho akka ishin dapaytaayshoti' mina'e, qara kode ka alle' fuuliyo ishootta tura quu'e.

²⁵ Semmalla Waaqase' piisa qara qapo ikiini, “Amma anti poojama kelan Yayqoopi kalsha ka sanynyeeta Yayqoopi piisa suraysada ka maxxiyyo a qulqullaawe akka in ipammini'i seerada.

²⁶ A piitaaysho oppa nakaytan kallaannaaneeyye, wa ishootta fuurinna ka in kinniniiyi, jeerase' xaaysho isho ana amanama diissataaysho a koden piisa, ikka teyman.

²⁷ Oton samaytoppa ishootta kalshooyye ka piita ka piitadda a nyaapaayshoti oppa ollopa oorshooyye, ishootta qudannen fuula mankistewwa leka tura qulqullumaayyo akkisha.

²⁸ Kadin punu anti akka poojaman ka mankistewwa pila oppopa aanane' kode nefooyye, a nama takka nefo ishoottoppa apari in hasnin maliiyyin piitaaysho oppopa ishootta kalsha; ikka akkiman anti Waaqa Waaqaaysho kodde upnaadan.

²⁹ Oton samayta Isira'eeli qara' hapuriiyyo lekkishooyye, kulipadesa an ishootta tura fuuliyyo an quu'o. Sede ana Waaqase piisa qara qapo haasawade.”