Xuuma Hisqeeli 38 - Mataafa Qulqulloota

Xuuma a Kooki qara' lelame

¹ Qaaleta Waaqa ka anopa deete ka kiini,

² “Atti to'ampayta namatiiyyi, Kookise piita Maakooki karaayye samayta a Mesheki isho a Tupaali qara saara a kutta koddeepa fuulaayti tiitayshe ka isha qara' xuuma haasawado;

³ Ka ishi' kide, Waaqase' piisa qara qapo ikiini, ‘Atti Kooki, ke a samayta Mesheki isho a Tupaali qara saara kutta kodde, tin anti ke qara'en xa'e.

⁴ Ka alle ke tiitaysha ka poqootoppa ke shenqera kalsha ka xelaayti a oranna' piisa ka fartaddaatti isho a ishin kulufna a mehadda oranna hidade piisa ka xelase xaayti leka ka kontalewwa kukutta ka a shashakka qapade ka koraatewwa a laajame hidade piisa sooksha.

⁵ Xela Faarisi ka a Toobbiya isho a Liipiya, a kontalewwa isho sipla a matta qara qapa ka ishootta qudaaw caadan.

⁶ Xelase a oranna a piita Komeri isho a Peeti tokarma isasene a qinda qutattatin pora sekaayye ca ke quda caadan; xela mankistewwa pila kuli ka ke qudaaw caada.

⁷ Ke isho xelase xaayti a oranna ke kapandesa co, harmisada ka a harmisade kodda ka atti saaraaysho kodde.

⁸ Parra lekaya kammaayye i'halaamta ka parra a kamma oorshatiiyyi piita oranna kela dinte torpita; orra piiseti akka irrowwa Isira'eeli qara nakaytan kallaado'e mankistewwa lekayaappa ollopa kale; piisse eta kutta kara'e alle diisamte; ma anti mankistewwa lekaya karan samaytaadi sookshe; ikka amma oori nakaytan kallaanni.

⁹ Ke isho xelaayti a oranna ka samayta kutta a ke quda co, akka a puppeeta' mina'e' sooktan ka a urratta' mina piita libbissan.”

¹⁰ Waaqase' piisa qara qapo ikiini, “Kuyyaasetiiyyi dikatta a mattaayti'i ke kara xa'a; akka neequmta kodaaw dikatta.

¹¹ Ka kiita, ‘Tin aana ka piita a karaayye palewwaadi isquda kawwatta in qapnini torpa; ka palewwa a xarrada isho teehowwa a silpa in qapnini a jaw kide ka nataan kallaanna' torpa.

¹² Ka piitaddasene one orra ka amma oppa kallaanna, isasene mankistewwaappa ollopa oore ka otanta piita oppa kala ka horeeta isho meeha qapa, sara ka pooja.’

¹³ Samayta Saapa ka a Etoomi ka nakkaatewwa a Terseesi isho palewwasso piisa ka kidane, ‘Hela sara'e' deete? Ka poojeta haadatta'e ka dakara a pirreeta isho warqeeta pootatta'e ka horeeta isho meeha qedatta'e ka poojeta kuttatin kalatta'e' xelaayti ollopa oorsatte?’”

¹⁴ Semmalla atti to'ampayta namatiiyyi, xuuma haasawado ka Kooki' kide, ‘Waaqase' piisa qara qapo ikiini, “Kuyyaasetiiyyi a samaytiyyo a Isira'eeli nakaytan kallaanno hela a upto?

¹⁵ Qinda qutattatin porase' xaayti akata sekaayye xata tultan xela kuttayta a kokkoka a fartan kulufna ka ke olli tulta.

¹⁶ Akkima urratta piita qara pirro mina'e samaytiyyo a Isira'eeli torpa' tulta; atti Kooki! Xeltada a kamma oorshatiiyyi akkima upnaadane'e, oton fuula mankistewwa tura qulqullumaayyo akkinnooyye, akka piitiyyo torpito'en ke koda.”

¹⁷ Waaqase' piisa qara qapo ikiini, “Eta xattatiiyyi namase an orxayasene xayyo xuumampayasene a Isira'eeli qudan qootaadi desa haasawade, ishootta ka kiseese a xattatiiyyi akkan ishootta qara ke' xaasho akka ishootta torpito parra kara qootaayti desa xuuma haasawaden?”

Qitaateta a Waaqa Kooki qara' qeede

¹⁸ Waaqase' piisa qara qapo ikiini, “Kuyyaata oppaayye Kooki piita Isira'eeli torpinooyye, aariyyo ana kara' xa'a.

¹⁹ Awsetiiyyi Isira'eeli kara piita akka a kuttaati lelleehto'e, yootiyyo isho aariyyo a opaynonnen salisha.

²⁰ Murkujadda a pakateeta ka xampira a moonta ka pinaana a koommayta ka uumata a piitandesa karittan titmanno piisa isho orra a piita qara kalo piisa, ana turaayye xaran; irrowwa ka seehan; takeella ka tuqmadan; kawwaya ka piitopa qitqitan.

²¹ Irrowwaayyo piisa qara'e akka orana Kooki qara' qito'en koda; nama piisa ka innaasso qara oranna' xa'a; sede ana Waaqase' piisa qara qapo asse kiini.

²² Ishootta qara'en farata ka paaqa a tuullino ishootta qara' qeeda ka orannaappa ishootta pira ka isha ka xelaadi a oranna isho samayta a isha quda co qara'e roopa a kutta ka qita; apteenta ka apitta isho daka apitta ka roopa.

²³ Semmalla anka kuttumaayyo isho qulqullumaayyo akkisha; ka mankistewwa a leka tura'e isi upnaysha; ishootta ka akkan Waaqa kodde upnaadan.”