Xuuma Hisqeeli 36 - Mataafa Qulqulloota

Xuuma akka Waaqa Isira'eeli' sako' lelame

¹ Atti to'ampayta namatiiyyi, irrowwa Isira'eeliti' xuuma hasawado ka ishootta' kide, Irrowwa Isira'eelitiiyyi qaaleta Waaqa' dakaya.

² Waaqase' piisa qara qapo ikiini, ‘Nyaapa qootaayti desa qoota kide, tin irrowwasene a' xatta lehnaanno kodden.’”

³ Semalla Waaqase' piisa qara qapo ikiini, xuuma haasawado ka kide, “Akka mankistewwa ata hase' piisa ishin lehadane'e, akka samaytoppa qora qara seesa ka a haasawama' kodditane'e lulle ishin hattishen ka qinda piisaayye desa ishin miidden.

⁴ Semmalla ishin irrowwa a Isira'eelitiiyyi, qaaleta Waaqase' piisa qara qapo dakaya! Anti Waaqase' piisa qara qapo, ‘Irrowwa ka kunkunnawwa ka naabba isho fishshanna'e ka tikkasene one ka lulle hase isho katamaddasene alle diisame, mankistewwa a kapandesa kala ka sarene ka qara seeseneeti'i in kiini.’

⁵ Semmalla Waaqase' piisa qara qapo ikiini, ‘Anti dukaatannen mankistewwa ata hase isho Etoomi piisa qara yootase' xayyo kokkokatin haasawanni; ishootta' xasootta ka puyattaanne piitiyyo qara piren ka porraadi a deetta' lehaden.’

⁶ Ssemmalla qoota piita Isira'eeli malla xuuma haasawado ka irrowwa ka kunkunnawwa ka naabba isho fishshanna' kide, ‘Waaqase' piisa qara qapo ikiini, qoota nyoqqofa mankistewwaatin miiddamten malla, yoota a aariyyootinnin haasawanni.’”

⁷ Semmalla Waaqase' piisa qara qapo ikiini, ‘Akka mankistewwa a ishin kapandesa ca' piisa mattaayshoti'i nyoqqofaman miiddamane'en ishina xaxanni.

⁸ Ma xoori ishina irrowwa Isira'eelitiiyyi, qoota samaytiyyo a Isira'eeli dehaynittoppa piitaaysho oppopa kalo malla, ishina ishootta'e taamma jifsattan ka luukkata palitan.

⁹ Tin anti ishina'en dikanni ka ishin opa tiitaawa; akka qotamtan ka aylaamtan.

¹⁰ Anti ka samayta Isira'eeli a co piisa leksha; porradasene qitqite piisa ka qupaman; orra ka katamadda kara' kallaada.

¹¹ Anka ishin kara nama isho horeeta leksha; ikka horan ka lekaadan; anka a xatta' mina'e, akka orra ishin kara' kallaado' koda; ka a xatta qaran qapto ishin teyantaysha; ishina ka akkan Waaqa kodde upnaattan.

¹² Anka akka samaytiyyo a Isira'eeli ke kara' kallaado koda; ishootta ka ke lehadan, akka lehandaasso' koddita; umma kulipadesa ke karaayye lehattanpaya hellaa in dapadan.’

¹³ Waaqase' piisa qara qapo kiini, “Ishootta ishina'e kidene, ‘Ishina a piita orra dammitto ka mankisteetaaysho kela hellaa pirritto’” malla.

¹⁴ Waaqase' piisa qara qapo ikiini, “Ishina arepadesa a orra' damtan; umma mankistewwaassin kela hellaa a' pirtan.”

¹⁵ Waaqase' piisa qara qapo ikiini, “Arepadesa akka nyoqqofa mankistewwa dakaytane an ishinaan kodo; umma arepadesa tuffatama samaytatin a' payyahatan; umma arepadesa a mankisteetaayshina, a kehaytissan.”

Waaqa akka maxxaadi a qulqullaawe dikanno

¹⁶ Qaaleta Waaqa ka anopa deete ka kiini,

¹⁷ “Atti to'ampayta namatiiyyi, samayta Isira'eeli a piitaaysho oppa kalooyye kodaaysho ka kallaataayshotinni piisse nyalshen; kallaataaysho ka fuuliyyo turaayye, nyala oto iskatteeta isqudaayye xoptaadi a leya qaptooyye qapnaannitta pahanaaden.

¹⁸ Semmalla qoota piitoose oppa orra leyshen ka turan killannaan isheetta nyalshen malla, anti aariyyon ishootta qara' tuqa.

¹⁹ Anka mankistewwaappopa ishootta fide; ikka piitaddaappa' pasen; anka akka kodaayshoti isho a kallaatayshoti mina ishootta qara' farate.

²⁰ Ma xoori ete mankistewwaappopa aaneneeyye, pora oppopa aanen pisa oppaayye maxxiyyo a qulqullaawe nyalshen; orra ka qootaayshoti desa kiini, ‘Ha ishootta orra Waaqa ma, piitaadippa alle' daanamen.’

²¹ Maxxase' xayyo qulqullaawe, a samayta Isira'eeli mankistewwa a oppopa aane' pisa oppa' nyalshen dikanni.

²² Semmalla samayta Isira'eeliti' kide, “Waaqase' piisa qara qapo ikiini, ‘Ishina samayta Isira'eelitiiyyi, ishin malla asse an kooni an co; ma maxxase xayyo qulqullaawe a mankistewwa oppopa antene pisa oppa nyalissene malla.

²³ Qulqulluma a maxxase' xayyo kuttati isase mankistewwaappa' jeere, ishina ka ishoottoppa' jeerisene in oorsha; oton ishin qudan qulqullumaayyo fuulaaysho tura oorshooyye, mankistewwa akkiman anti Waaqa kodde upnaadan. Sede ana Waaqase' piisa qara qapo asse haasawade.

²⁴ Mankistewwaappan ishin sooksha ka piitadda pisa oppa ollopa ishin oorsha ka piitaayshin oppopa ishin kalsha.

²⁵ Pisha paxaara'en ishin quda' fidda; akka nyalaassin pisa oppaayye jaqqamtan; anka killannaassin piisa alle ishin oppa tawsha.

²⁶ Ka karitta haaraya ishina' daasha ka hapura haaraya ishin kara' xaaya; ka karitta a daka ishin kara maysha ka karitta nukkulla ishin kara' xaaya.

²⁷ Hapuriyyon ishin kara' xaaya ka akka' taantetiyyon kallaattan ka qanqannissa seeriyyo' ajajamtanen ishin koda.

²⁸ Akka piitase an aappadaassina a xattati' daashe oppa' kallaatan ka samaytiyyo kodditan; anti ka Waaqaayshin kodda.

²⁹ Nyalaassin piisa kelan ishin sooksha ka untaayshin ishina' palaysha; umma loota an ishin qara an qeedo;

³⁰ arepadesa akka lootan mankistewwa tura a' jeerrini'i, qoraassin akka tupaxata ishina' luukkata palayshan, dullassin ka ishina unta palayshane'en koda.

³¹ Sekkammayye akka kallaatase' xaayshin neeqa ka kodaddaasene' xaayshin nenneeqa isho kodaddasene' xaayshin jippame matte oorsattan ka juppootaayshin isho nyalaassin malla isi jippitan.

³² Anti ishin malla asse an kooni an cooy, ishina samayta Isira'eelitiiyyi sede upnaada ka kallaataayshin minan jeera ka palama. Sede ana Waaqase' piisa qara qapo asse haasawade.”

³³ Waaqase' piisa qara qapo ikiini, “Kuyyaata an juppootaayshin piisa oppa ishin jaqqnooyye, akka katamaddaassin kara' kallaattane'en koda; tikkaassin a qitqite piisa ka qupaman.

³⁴ piitase ilda a orra oppan tarpino tura lulle hasse iqotamta.

³⁵ Ikka kidane, ‘Ha piitase lulle hasse oori Kenneti pahata! Katamaddasene qitqite ka lulle hase ka one ha oori, kawwattanne kapa qorramen; orra kuli ka kara' kallaatta paayye.’

³⁶ Sekkamma mankistewwa a pahe ka ishin kapandesa kala ka akkiman anti Waaqa tikka a qitqite' qupe ka piita lulle haste ilaawnayshe upnaadan; anti an Waaqa in haasawadeey, in koda.’”

³⁷ Waaqase; piisa qara qapo ikiini, “Oppa'en oora ka qinseeta samayta Isira'eeli' dakaya ka ishootta' oorsha. Ka samaytaaysho akka xelloota kahirra' mina leksha.

³⁸ Akkima kuyyaata xayso nessumaatiiyyi kaharra a kalisoota' qalama Yursaalami karopa dehaannaan ka kara immakaannaan mina'e, katamaddasene qitqite asseew samaytan immakaadan; sitiiyyi ishootta ka akkan anti Waaqa kodde upnaadan.”