Xuuma Hisqeeli 32 - Mataafa Qulqulloota

Saara pooyta a Feri'ooni' saarsame

¹ An poojammeeyye para kudanka lammatta ka leya a kudanka lammattatiiyyi ka leyoose oppa kuyyaata paayyotatiiyyi, qaaleta Waaqa ka anopa deete ka kiini,

² “Atti to'ampayta namatiiyyi, Feri'ooni nuqusa Kipsiti saara pooyta' saarshe ka kide, ‘Ke nuqussaappa karma kapa isi dikno ka pofa a pakateeta kela' paho, atti kirradaappa pora pajaqjaqinni; ka pisha kirradaappa' pooranni.’

³ Waaqase' piisa qara qapo ikiini, “Samayta lekaytan isquda' qeeda ka nyupuraayyo ke qaropa kata; ikka nyuporaayyon lakopa ke titan.

⁴ Anka piita' ke kata ka lakoppa ke deraysha ka akka xampira moonta piisa ke qara kute'ane' koda ka akka pinaana koommayta ke damane' koda.

⁵ Anka so'atti irrowwa qara' fida, ka pukkaayti naabbaan immaka.

⁶ Ka haka irrowwaati'i, diikaayti a urqinon piita affaysha ka so'atti naabbaan immaka.

⁷ Awtan ke patinnooyye, moontada turan deka ka hikka kuli tukkansha ka piirtota qara oraartan deka; leya umma in la'ayo.

⁸ Anka la'ayta a moonta quda la'ayno piisa ke qara' tukkansha ka piitaayti qara' tukkanta qishsha; sede ana Waaqase' piisa qara qapo asse kiini.

⁹ Piita a atti a upnin karaayye, oton otanta samayta oppa ke patinnooyye, karitta orra lekayta'en qaapan immaka.

¹⁰ Akka samayta kuttayta ke qara tammaqo'en koda; oton koraatetiyyo ishootta kapa lellehinnooyye, nuqussaasso ka fuuraan xaran; nama piisa ka caattaadi malla awta piisa xara.”

¹¹ Maana malla Waaqase' piisa qara qapo ikiini, “Orana nuqusa Paapilooni'i ke qara' qita.

¹² Xelase' xaayti a oranna dikoota in qapnin ka akka xela a kokkoka a mankistewwa piisa qaropa karpuma' jaallon orannaappa piramo koda; ikka isi peeppa Kipsi' jeershan; samaytase' xaayti dikoota in qapnin ka pirama.

¹³ Pishadda leka kapaayyen xelloota horeetaadi piisa alle' pira; umma loqta nama oppa in yetatto, umma kamanta horeeta ishoottan poorasso.

¹⁴ Sekkammaayye pishaasso'en miilsha, kirradaasso ka a sayteeta mina urqan; sede ana Waaqase' piisa qara qapo asse kiini.

¹⁵ Oton piita Kipsi lulle hattishooyye, piita ka wa isheetta kara immake piisa daptooyye, anka a isheetta kara kala piisa pirooyye, sitiiyyi akkan anti Waaqa kodde upnaadan.”

¹⁶ Sede saara pooyta a saarsamma; tuparra mankistewwa ka sene saarshan ka Kipsi isho samaytase' xaadi dikoota in qapnin saarshan; sede ana Waaqase' piisa qara qapo asse haasawade.”

Orrase a Kipsi putame ka leysame

¹⁷ An poojammeeyye para kudanka lammatta ka leya paayyotati ka leyoose oppa kuyyaata kudanka kenattati, qaaleta Waaqa ka anopa deete ka kiini,

¹⁸ “Atti to'ampayta namatiiyyi, samayse a Kipsi dikoota in qapnin pooye ka isheetta isho tuparrasene a mankisteetase kokkoka, a turan hawlame oppopa saara pooytatin keesse.

¹⁹ Ka ishootta' kide'e, ‘Hela ishina ayno qara' xarjaalluma' qaptan? Lekkada ka a dawra qara in murannini oppa' hawlaama.’

²⁰ Ishootta kuli ka a orannaappa le'e oppa'ew seehan; Kipsi oranna turopa tuukkamta; isheetta isho samaytase' xaadi dikoota in qapnin ka eeyye' seeha.

²¹ Saarrasene' xaaysho kukutta isho qaarqaarampayaasso ka hawla kareela ishootta' haasawadan ka kidane, ‘Isasene dawra qara in murannini ka orannaappa le'e ka are' seehen.’

²² Asoori xelaadi a oranna ollinni takka eeyye caan; hawlalla a xelaadi a orannaappa' le'e ka qalame ka eeyye isheetta kapa tiitayshen.

²³ Hawlaaysho qaawa karanxata seka; xelase a Asoori a cooyye orra fuurinno ka orannaappa' pirame; piisa ka orannaappa pirame ka eeyye' seehe; hawlaaysho ka ishootta kapa tiitayshe.

²⁴ Samaytase a Elaami dikoota in qapnin; isase a cooyye orra fuurinno, ishootta a dawra qara in muranniniiyyi orannaappa le'en ka piramen ka jeeren; hawlaaysho ka eeyye ca.

²⁵ Xelase a oranna a Elaami isho samaytase' xaadi dikoota in qapnin ka a caane orra fuurinnaati'i, orra le'e otantoppa ishootta qoolla afen; ishootta piisa a dawra qara in murannini mali orannaappa le'en ka jeeraaysho haadaden ka orra ale'e olliiyyi hawla karopa lekkaden.

²⁶ Xela oranna isho samayta a Mesheki ka a Tupaali, isase a cooyye orra fuurinno, piisani a dawra qara in murannin mali orannaappa' piramen. Hawlaaysho ka eeyye ca.

²⁷ Xormeetase a oranna a xatta hupna qapto ka orra tatammaqisse meehaaysho a oranna' piisanne hawlaamte, opanka koraatetaaysho matta kela'e ishootta' xaayen ka kontaleeta ishootta qara' xaayen ka asse ishootta mooken; torpampayoosen a amma' xoori opa asse ishootta in mookne.

²⁸ Atti nuqusa Kipsi' xoori iqqepta ka isasene dawra qara in murannini orannaappa le'e kara' pi'ita.

²⁹ Etoomi isho nuqusaadi ka kutkuttowwaadi isasene orannaappa' le'e oppa dakkame, hawlaaysho eeyyew ca; ishootta orrase dawra qara in murannini ka hawloppopa lekkanno oppa'ew dakkamen.

³⁰ Mukissampaya a qinda qutatta isho Sidoonata piisa eyye ca; ishootta' qoota turan irretaayshotin orroppa fuura qishshen malla, a le'e olliiyyi jeeren ka hawloppopa lekkaden; ishootta dawra qara in muranne ka xela orannaappa' le'e olliiyyiiw eyye dakkamen ka a hawloppopa lekkanna olliiyyi jeeraysho' haadaden.

³¹ Nuqusa Kipsi isho xelaadi a oranna, ishootta akkan; nuqusa Kipsi ka xelaadi a oranna a koraatetan pirame malla, xasa oorsada; sede Waaqase' piisa qara qapo asse kiini.”

³² Waaqase' piisa qara qapo ikiini, “Kadin punu akka orra a co oppa tammaqta fido kode nefooyye, nuqusa Kipsi isho xelase' xaadi dikoota in qapnin a koraatetan leyshene olliiyyi orra dawra qara in murannin oppa dakkaman.”