Xuuma Hisqeeli 31 - Mataafa Qulqulloota

Kipsi akka piita Asoori kapa ekkaysatamte

¹ An poojammeeyye para kudanka takkatta ka leya sessatta ka leyoose oppa kuyyaata paayyotatiiyyi, qaaleta Waaqa ka anopa deete ka kiini,

² “Atti to'ampayta namatiiyyi, Feri'ooni nuqusa Kipsi isho samaytase' xaadi dikoota in qapnini' haasawado ka kide, ‘Ata kuttuma'e ayno kapa'e ke ekkayshan?

³ Tin atti Asoori pirpirtase a Lipaanoosi, a taammaadi papaxxaari qoraadi ka oli qapen ka akata dedderaan ka kaatta' piinaan; kuutaadi ka oraarappa kayno' pahata;

⁴ pisha ka isha sakkattishen; pisha a piita kela ka akka deraado isha kuttishen; kirrada ka pora isha oppa' dishamepa urqini; fishshana ka qora lakoppan xata ca kelopa diisamen.

⁵ Qoyroose qoota pisha kuttaya ike malla, qora muroppa ca' piisa qaropa deruma' jaalli; dankaadi ka deraade, taammaadi ka jifen.

⁶ Xampira moonta' piisa ka taammaadi qara' saatta saattaaden, pinaana koommayta' piisa ka taammaadi kelandesa nyalqa dalli; mankistewwa a kukutta' piisa ka kaattisaadi kelandesa kallaanni.

⁷ Qoota hittinnaadi pisha kutta oppopa katade malla, taammaadi a akata dedderaadetin kuttumaadi akata paxaari.

⁸ Pirpirse a jijo dula Waaqa oppa co nefo, isha kapa'en ekkaysatamo; umma qora pirpira dankaadi kapa in kayan; umma qora leya nefo taammaadi kapa in kayan; umma qora a dula Waaqa oppa ca oppa takka nefo paxaaruma isha kapa in kayan.

⁹ Taammaadi a oli qapeetinnin isha paqaarnayshe; qora a dula Waaqa oppa ca' piisa ka isha yooni.”

¹⁰ Semmalla Waaqase' piisa qara qapo ikiini, “Qoota opeela deraade, kuutaadi ka oraara kaye malla, karittaadi ka deruma jeejjade malla,

¹¹ anti alle'en isha kate ka saara mankistewwa a kokokkoka turopa isha tuukke; ishootta ka akka neequmtaadi kapa isha qatta'en.

¹² Haptiyya mankistewwa oppa a akata karpampaya kodde'e piitopa isha mure ka eeyye isha kate, taammaadi ka irrowwa isho naabba piisa kara' seehen; hanjarraadi a qeqqepe ka fishshana piisa kara' seehen. Samayta ka alle isha diishe ka kaattisaadi kela sooke.

¹³ Xampira moonta' piisa ka kurpanaadi qara' safaren; pinaana koommayta' piisa ka taammaadi qara caaden.

¹⁴ Wa malla sede piisa asse koddita' nefo, akka qora a pisha kapa ca oppaayye takka nefo in deraannin ka oraaraappa in kaynin malla, ka akka qora pisha ikna oppa takka nefo deruma ishootta in kaynin malla. Maana malla ishootta akka le'an ka orra hawla karopa lekkanno olliiyyi hawla karopa lekkadane'e ishootta qara, toota muramteey.”

¹⁵ Waaqase' piisa qara qapo ikiini, “Kuyyaata qoyroose hawla karopa lekkannooyye akka orra isha pooyo'en kode ka pisha a piita kela qara deke ka kirrada tura kabe; pishadda lekaya ka tura kabamen ka qoyroose pooya minannew Lipaanoosi tukkantan libbishe; qora kappinoppa ca' piisa ka ruqen.

¹⁶ Eten a hawla karopa lekkanna olli hawla karopa isha lekkisheeyye, anka mankistewwa a pi'ittaadi dakaye akka xarane' kode; ete qoyroose ishoottoppa laheeyye, qora a hawwla kara ca' piisa ka xasooden. Qoroosen nefo qora a dula Kenneeti ka qoraasene a Lipaanoosi akata paxaara; ishootta qorasene a kuttati pisha ike ka akata paxaara.

¹⁷ A mankistewwappaayye isha kela kaatillaysade ka isha quda kodde, a orannaappa le'e olliiyyiiw hawlamen.

¹⁸ Qora a dula Waaqa oppa ca oppaayye, a kuttumaan isho ulfeenan ke mina co ayno? Atti kuli qora dula Waaqa oppa ca olliiyyiiwwi hawlamta ka a dawra qara in murannini ka orannaappa le'e oppa' deraata.” Waaqase' piisa qara qapo ikiini, “Wa Feri'ooni isho samaytase' xaadi dikoota in qapnin qara' kaya tooy sene.”