Xuuma Hisqeeli 30 - Mataafa Qulqulloota

Saara pooyta a piita Kipsitin pooyene

¹ Qaaleta Waaqa ka anopa deete ka kiini,

² “Atti to'ampayta namatiiyyi, xuuma haasawado ka pooye ka kide, Waaqase we' piisa qara qapo ikiini, ‘Oo kuyyaatose kido!’

³ Maana malla kuyyaatose a urratta idehaatte; kuyyaatose kuyyaata firteeta Waaqa; isheetta mankistewwa'e kuyyaase rakkoota a kokkoka.

⁴ Oranna Kipsi qara' qita; qaapa ka Toobba qara' de'a; a le'e ka Kipsi kara' seehan; teyantaadi ka alle' haadamta; kirittaadi nefo ka qitqita.

⁵ Piita Toobba ka Fuuti ka a Liidiya ka a Liipiya isho a Arapa' piisa ka samaytase ana olli kodayteeta qapo kuli, Kipsi olliiyyiiw takka orannaappa' pirama.”

⁶ Waaqa ikiini, “A Kipsi quda koddina ipiraman; hupnaade a jeejjannitto ka pata;” Waaqase' piisa qara qapo ikiini, “Miktooli paayyatte haka a Swaaniti'i; ikka orannaappa' piraman.

⁷ Ishootta ka piitadda lulle hase oppaayye a qaran qapto lulle hasan; katamaddaasso ka katamadda a qitqite qaran qapto' qitqitan.

⁸ Oton Kipsippa apitta qapooyye, a isheetta qaarqaarra piisa ka piramaneeyye, sitiiyyi akkan Waaqa kodde upnaadan.

⁹ Kuyyaasetiiyyi awse, samaytase a Toobba paata qaapni in kinnin tammaqissa'e, orra erkammo ana kapa markapan xa'a; awta Kipsi qara piramtooyye ikka qaapan kupadan; maana malla tin, kuyyaase idesa kayteey.”

¹⁰ Waaqase' piisa qara qapo ikiini, “Naapukedenasoori nuqusa Paapilooni, qudannen samayta piita Kipsi a dikoota in qapnin alle' pira.

¹¹ Isha isho xelase' xaadi a oranna karpa koda'e mankistewwa piisa qaropa jaallo, akka piisse patissa' tuulane'en koda. Ishootta ka Kipsi torpan ka piitaadi pukkadaan immakan.

¹² Kirra Appaayi'in kuusha ka piitase a Kipsi ukkuttowwa kela' kata; ka orra hapta qudanne, piisse isho wa kara ca piisa lulle hattisha! Ana Waaqa asse haasawade.”

¹³ Waaqase piisa qara qapo ikiini, “Killanna alle'en pashsha, ka waakkadasene katama Memfiisitiiyyi ca alle pashsha; umma arpadesa piita Kipsi kara mukissampayta in caado; anka piisse qara' fuura tuqa.

¹⁴ Piita Paatiroosi lullen hattsha; ka katama a So'ani oppa' apitta qapa; ka Teepisi qara' farata.

¹⁵ Ka katamaasene a Pelusiimi mishshikeeta Kipsi kodde qara aariyyo tuqa; ka samaytase a Teepisi dikoota in qapnin qishsha.

¹⁶ Apittan Kipsippa' qapa; Pelusiyeemi ka a kuttati surumtan miiddamta; kawwatta oxinta Teepisi ka qitqitta; katama Memfiisi ka kuyyaate ildaappadesa torpaman.

¹⁷ Xayyoolayta katama a Ooni isho a Pupastiisi ka orannaapa' pirama. Samayta katamaassoti piisa ka poojama.

¹⁸ Oton Kipsi qara qampara qepshooyye, katama Tafnaasi qara tukkanta qita; hupnase' xaadi a jeejjannitto ka alle isheetta karaayye pata; urratta ka isheetta qara pira; samaytaadi ka poojama.

¹⁹ Anka asse Kipsi qara' firteetiyo qeeda; ikka akkan anti Waaqa kodde upnaadan.”

Waaqa akka Kipsi puto

²⁰ An poojammeeyye para kudanka takkattatiiyyi ka leya paayyotati ka leyoose oppa kuyyaata tappattati, qaaleta Waaqa ka anopa deete ka kiini,

²¹ “Atti to'ampayta namatiiyyi, anti harka Feri'ooni a nuqusa Kipsi in qepshe; tin akka in dinnin ka koraateta qapatta in ettaninnini'i, olopa in hidamme.”

²² Semmalla Waaqase' piisa qara qapo ikiini, “Tin anti Feri'ooni nuqusa a Kipsi qara'en xa'a ka harkaadi lakki, a turan qepe ka a in qepnin piisa olloppa mooja ka koraateta harkoppa isha qara kata.

²³ Ka Kipseeta mankistewwaappa' fida ka piitaddaappa' pasisha.

²⁴ Ka hupna nuqusa Paapilooni kokkonnaysha ka koraatetiyyo harkoppa ishi' xaaya. Ma xoori hupna Feri'ooni in qepsha; ikka a nama akata qarame mina fuulaadi tura ittaha.

²⁵ Anti hupna nuqusa Paapilooni in kokkonnaysha, hupna feri'oni xoori inukkullaada; oton koraatetiyyo harka nuqusa Paapilooni oppa' xaayooyye, isha ka piita Kipsi qaropa oorsannooyye, sitiiyyi Kipsi akkan anti Waaqa kodde upnaatta.

²⁶ Anka mankistewwaappa Kipseeta fida ka piitaddaappa ishootta pasisha; ikka akkan Waaqa kodde upnaadan.”