Xuuma Hisqeeli 3 - Mataafa Qulqulloota

¹ Ikka ana' kide, “Atti' to'ampayta namatiiyyi, wa are kara akkinitta' piisa dame; mataafose ollopa marrame dame ka aane ka samayta Isira'eeliti' haasawado.”

² Anka afaayyo pane ikka mataafase ollopa marrammo ana' paawwishe.

³ Isha ka ana' kide, “Atti' to'ampayta namatiiyyi mataafose ollopa marrammo an ke' daanno dame ka ishin karittaayti immake.” Anka dame ikka afaappa a takma' mina ana' me'aawe.

⁴ Isha ka ana' kide, “Atti' to'ampayta namatiiyyi, samayta Isira'eeli oppopa aane ka qaaletiyyo ishootta' lele.

⁵ Maana malla anti samayta Isira'eeli oppopan ke erkini diisheey samayta afaasso opani in upnin, haasaasso ka orra' kalli in kinnin oppopa ke an erkini an cooy.

⁶ Anti samayta a leka a afaasso opani in upnin haasaasso ka orra kalli in kinnin, atti ka haasaasso a' dakayni a kinnin oppopa ke an erkini an co; dukaatan katin ishottoppopan ke erkini kiiteeyye, ike kela dakayan.

⁷ Ma xoori samayta a Isira'eeli' piisa qootan kamtollayta ka karitta kokkonnanno malla, ana dakaya in heenooy, ke nefo'en dakayo.

⁸ Tin anti qootiyyo mallan a xaaysho mina kamtoollayta a karitta kokkoka qapo ke koda.

⁹ Anti a daka mina'en karittaayti kokkonnaysha; ishootta samayteeyye tiyyoolayaay, atti ishootta kela in fuuran ka fuulaaysho tura in tammaqan.”

¹⁰ Semmaliiyyiiw ikka ana' kide, “Atti to'ampayta namatiiyyi, qaaletiyyo an ke' lello piisa qanqannissa dakkaysado ka karitta kara' qapado.

¹¹ Samaytase xaayshin poojame oppopa aane ka kadi punu dakaynaan taaki dakaya tiinnaaneeyye, ishootta' haasawado ka kide, ‘Wa Waaqase' piisa qara qapo ishina' kiina sene.’”

¹² Sekkammaayye hapura ka opeela ana xaashe; anka nessa a kutta a lellehayta piita a ana kamma desa xaano dakaye; ikka kiini, “Ulfeena Waaqa a poraadippa ulfeessamo.”

¹³ Nessoose' nefo oto uumatase caatta qapo xoollaadi ollin qiinooyye nessa a kela xaano ka nessa a kanaannaawwasene kapa caati. Nessoose nefo nessa a kutta a lellehayta piita'e paha.

¹⁴ Hapura ka opeela ana qeede ka anan aane; anti ka iskaranxata miirode ka quumattaan aane; hupna Waaqa ka ana qara' ulsaade.

¹⁵ Anka orrase' poojame katama Teli-aapipitiiyyi kaba kepaari kapa kalo oppopa aane ka pora oppa kalan oppa' kuti'e ka wa ana qara' kayeetin kuyyaata tappa kara ishoottoppa' jare.

Hisqeeli akka samayta' tooytampayta kodde

¹⁶ Ete kuyyaatase tappa dikkatteeyye, qaaleta Waaqa ka ana kapopa deete ka kiini,

¹⁷ “Atti' to'ampayta namatiiyyi, anti samayta Isira'eeliti'in tooytampayta' ke kode; oto afaayyoppa qaaletiyyo dakaytooyye, akka turadesaaw ishootta' lelta.

¹⁸ Anti oton ukkuttoota namati' kido, ‘Dukaatanne ittootaayye’ atti ka turadesa isha'e a' lelliniiyyi ka ishan paha'e saantaadi a neeqa qaraayye isha a oorinniniiyyi, isha' juppootadi minan ito'a. Ma anti diikaadi harkaaytippan fada.

¹⁹ Ma xoori oton juppoolaytase a namati'i turadesa leltaayye ikka juppootaadi taaki saantaadi a neeqa qara in oorriniiyyi, isha juppootaadi minan ito'a, ma atti i'issin pahate.

²⁰ Hanqeellitta nama oto hanqeellumaadi qara alle' tiitawooyye ka juppoota kodooyye, anti ka isha tura wa isha kehaytisha' xaayooyye isha ito'a; qoota atti turadesa isha'e a' lellin malla, isha' juppootaadi minanne, ito'a; umma kodaadi a hanqeelluma a kode isha in dikamo; ma anti diikaadi harkaaytippan fada.

²¹ Ma xoori akka juppoota in koonini'i, oto hanqeellitta namati' turadesaaw leltooyye ikka dehaamtose teyyadooyye ka juppoota kodeeta alle' diishooyye, isha icaada atti nefo i'issin pahate.”

Akka afaa Hisqeeli qapamen

²² Eeyyeeyye hapura Waaqa ka ana qara caade ka ana' kide, “Xa'e ka lakoppopa aane, eeyye'en ke' haasawadaay.”

²³ Anka xa'e ka lakoppopa aane; tin ulfeena Waaqa isase an kaba Kepaari' kapa akke ka eeyye' qa'ade; anka akke ka piitopa pi'e ka fuula piitan kaye.

²⁴ Ma xoori hapura Waaqa'e ana karopa kale ka ela ana qaatishe ka ana' haasawade ka kide, “Tikaaytipa kale ka ittura' xarraayti dufado.

²⁵ Atti' to'ampayta namatiiyyi, tin ha wataroota ke kela' kattan ka akka samaytoppandesa a' sooknini'i, wataroosetin ke hidan.

²⁶ Ishootta' qoota samayte falqoolayta kodden malla akka ishootta fuka a ettaninnini'i anti dankaayti kara'en arrapaayti jaqqalsha; akka dakkayta a haasa in sahanin koddita.

²⁷ Ma xoori oton ke' haasawannooyyen afaatti pana; atti ka ishootta' kiita, “Waaqase piisa qara qapo asse kiini, ‘Ishootta' qoota samayta falqoolayta kodde malla a dakayno a dakayo; a dakaya tiinno nefo a tiito.’”