Xuuma Hisqeeli 29 - Mataafa Qulqulloota

Xuuma Kipsi qara' lelame

¹ An poojammeeyye para kundatta oppa leya kundattati ka leyoose oppa kuyyaata kudanka lammattatiiyyi, qaaleta Waaqa ka anopa deete ka kiini,

² “Atti to'ampayta namatiiyyi, fuulaayti Feri'ooni nuqusa Kipsi qaropa tiitayshe ka isha isho piita Kipsi piisa qara' xuuma haasawdo.

³ Ka ishi' kide, Waaqase' piisa qara qapo ikiini, ‘Ke a kirrada kara' muke ka naacca a kutta paho; Feri'ooni nuqusa Kipsitiiyyi, ke a kiino, kirra Appaayi xayyo a mattiyyo anka issi' kodade, anti ke qara'en xa'e.

⁴ Shenqera silpa'en poqootoppa ke' kalsha ka murkujadda a kirraaytippa ca, kokaayti quda' jaqqalsha ka murkujase kokaayti quda' jajaqqalenne, kirraadaattippa lakopa ke tita.

⁵ Anka ke isho murkuja a kirraaytippa co qeeda ka koommaytoppan xata dakka; akka laka qara' seehtan; umma ollopa a' pohamtan taaki ollopa a oorsamtan ka a' hawlamtan. Anka damta ishin koda ka pinaana koommayta isho xampira ishin daasha.

⁶ A piita Kipsi oppa kala' piisa ka akkan anti Waaqa kodde upnaadan. Maana malla atti samayta Isira'eeliti, uleeta qaawta'e' kodditeey;

⁷ ete harkoppa ke qapadeneeyye, ikkaamatte ka ishootta tupa xashshitta dotte; ete ke quda' teesannaaneeyye, iqqepte ka akka surraappa oli kamma lehane' koote.”

⁸ Semmalla Waaqase' piisa qara qapo ikiini, “Tin anti orannaan ke qara' xaasha ka ke karaayye nama isho horeeta pira.

⁹ Piita Kipsi lulle hassa ka onta; ikka sitiiyyi akkan Waaqa kodde upnaadan.

¹⁰ Maana malla atti ikiite, ‘Kirra Appaayi xayyo anti ka kode.’ Semmalla tin anti ke isho kirradaatti qara'e, in xa'e; ka katama Miktooliti paayyatte haka katama a Swaaniti ka haka xeela Toobbiyaati, takka lulle hattisha ka onsha.

¹¹ Umma loqta nama oppa in yetatto; umma kamanta pinanta oppanne in tarpito; haka para kunda afuriti nama takka nefo kara'en kallaado.

¹² Anka piita Kipsi piitadda a lulle ca qaran qapto'e, lulle hattisha; ikka para kunda afuri kara'e, katamadda a lulle hase a qaran qapto lulle hasan ka mankistewwaappa Kipseeta fida ka piitaddaappa isheetta pasisha.”

¹³ Maana malla Waaqase' piisa qara qapo ikiini, “Oto para kunda afuri piramooyye samayta a oppopa pasen oppaayyen ollopa ishootta oorsada.

¹⁴ Anti ka piitadda a oppaayye poojamte oppopa Kipseeta kalsha ka piitase a oppa daladen a Patiroosi oppopa ishootta kalsha; ikka eeyye mankisteeta shakkayteeta koddita.

¹⁵ Ikka mankistewwaappa a shakka' koddita umma mankistewwaappa opeela ishootta an kuttisho; akka kulipaata mankistewwaan ukkummini'i, akatan ishootta shakkisha.

¹⁶ Umma kulipaata piita Kipsi, Isira'eeli'i kippeeta in koddito; oto qaarqaarsa akkatta Kipsipa tiitawnittooyye, Isira'eeli juppootaadi matte oorsatta; ikka sitiiyyi akkan anti Waaqa kodde upnaadan.”

Nuqusase Naapukedenasoori akka Kipsi puto

¹⁷ Anpoojammeeyye para kunda lakki tappattatiiyyi ka leya paayyota ka leyoose oppa kuyyaata paayyotati, Waaqa ka ana' haasawade ka kide,

¹⁸ “Atti to'ampayta namatiiyyi, Naapukedenasoori nuqusa Paapilooni, akka xelaadi a oranna Tiroosi torpo'e, a kuttati yaallo kodde; matta piisa ka luuqqe, xashshitta ka sulde. A koddito ma isha isho xelaadi a oranna, Tiroosi torpa'e yaalaaysho a yaalen kamma wa teyene in caan.”

¹⁹ Semmalla Waaqase' piisa qara qapo ikiini, “Tin anti piita Kipsi'in Naapukedenasoori nuqusa a Paapilooniti' daasha; akka xelaadi a orannaati mushaara koddito'e, ikka teyantaadi piisa alle' sara.”

²⁰ Waaqase' piisa qara qapo ikiini, “Qoota ana' yaale malla yaalaadi'i, piita Kipsi'in ishi mushshaaraadi' kode ka daashe.

²¹ Awsetiiyyi samayta Isira'eeli'in kokkonnaysha ka akka ishoottopa afaatti panamane' koda; ikka akkan anti Waaqa kodde upnaadan.”