Xuuma Hisqeeli 28 - Mataafa Qulqulloota

Xuuma a nuqusa Tiroosi' qara' lelame

¹ Qaaleta Waaqa ka anopa deete ka kiini,

² “Atti to'ampayta namatiiyyi, mukissampayta Tiroositi' kide, Waaqase' piisa qara qapo ikiini, karittaayti isi peepanne immakaade akka kiite, ‘Anti an Waaqa ka otanta pakateeta kara'e sufaana Waaqadda qara' kuti'e’ Kadi punu dikanitta ka kiinitta, ‘Anti an Waaqaayye’ Atti a nama diisheey a Waaqan.

³ Hela atti ookuma'e Taaneeli qara qapta; umma wa ke tura juutame ka in kinnini?

⁴ Ookumaayti ka upnaattin teyanta akkatte ka tikaayti a mehadda karopa warqewwa isho dakara pirreeta ollopa pootatte;

⁵ nakkaatewwaattippa qoota ookuma kutta qapto malla, teyanta qara'ew teyanta koopsatte ka teyantaayti a koopte malla isi peepaan immakaatte.”

⁶ Semmalla Waaqase' piisa qara qapo ikiini, “Qoota' dikatte ka kiite, ‘Anti an Waaqa mina ka an ookayta’ malla,

⁷ tin anti samayta piita oppa a akata karpampaya kodde'en ke qara' xaasha ikka wa ookumaayti ka ilattumaattin akkatte ka ollopa tuulate a paxaara' piisa pashshan.

⁸ Ka hawla karopa ke katan; akka otanta pakateeta kara' toota a neeqa' toota.

⁹ Hela oto harka orra a ke ikanno oppa kittooyye, i'issi' kiita anti an Waaqa? Oto harkaaysho oppa kittooyye oori atti a nama diisheey a Waaqan.”

¹⁰ Waaqase' piisa qara qapo ikiini, “Ana haasawadeey, harka orra hapta oppa'e' toota jeera' toota.”

Pi'itta a nuqusa Tiroosi

¹¹ Qaaleta Waaqa ka anopa deete ka kiini,

¹² “Atti to'ampayta namatiiyyi, saara pooyta' qeede ka nuqusa Tiroosi' saarshe ka ishi' kide, Waaqase' piisa qara qapo ikiini, ‘Ke a pahana a qaja dapna kodde ka ookuman immakaade ka xarjaalluma immakkoota qapo;

¹³ Turanne akka Eteni a dulase a Waaqa kara kalto mina'e kallaata ettante kallaanni; ka sira dakadda oyna a heraan kokkoka oppa kodame' siratte; ohaataayti kan warqeeta; wa ohaataayti quda' rakene' piisa kan warqeeta patta. Siroosen nefo kuyyaata atti uumamteeyyeew ke' uumamen.

¹⁴ Atti kirupeeleta a paata tooynitto' koddite ka daatamte; anka irrootase a Waaqa qulqullaawte qara' ke xaaye; akka qara' kutiite ka dakadda pippildaawna oppandesa pora ante.

¹⁵ A uumamte paayyatte haka ishin dapayta ke qara' teyade kara'e, saantaaytippa qaja a' qapnaanne.

¹⁶ Oto nakataayti ollin koopooyye, ishin dapaytanne immakaanni ka juppoota kooni; anka irroota Waaqa qaraxata wa nyale' mina ke shuule ka ke kirupeeletase paata tooytinitto dakaddaasene pippildaawna oppa alle ke pashshe.

¹⁷ Xarjaallumaatti minan karittaayti isi peepe; ulfeenaayti a koope qaran xaate'e, akka ookumaayti nyalisse; anka seminan piitopa alle ke tupa xata shuule ka akka ke quda tooyane'e, nuqussa turopa ke sookshe.

¹⁸ Ishin dapaytase xaayti a kateeta ka piddeetan koote minanne porraayti a sakatatta'e' nyalisse; sede minanne anka akka karaayye apitta do'o' kode; ikka ke kupe ka orra a ke tooyno piisa tura'e, tara ke kode.

¹⁹ Samaytoppaayye orra a ke upo piisa ka ke qara tammaqe; atti ka piraampira a neeqa qara' kayta; umma haka paraparati a' kinnaatto.’”

Xuuma katama Sidoona qara' lelame

²⁰ Qaaleta Waaqa ka anopa deete ka kiini,

²¹ “Atti to'ampayta namatiiyyi, qinda Sidoona opa fuulaayti oorshe ka qara' xuuma haasawado ka kide,

²² Waaqase' piisa qara qapo ikiini, ‘Tin, atti Sidoona, anti ke qara'en xa'e! Ka ke qara ulfeeniyyo akkisha; oton isheetta qara' firteetiyyo qeennooyye ka isheetta kara qulqullumaayyo akkinnooyye, ikka akkan anti Waaqa kodde upnaatta.

²³ Anti isheetta qara'en erkannaata qeeda; porraadippa diika ka tuqama; orana a qinda piisa desa isheetta qara' xaano minanne, orra ka isheetta kara le'a; ikka akkan anti Waaqa kodde upnaatta.

Isira'eeli akka eeppisamte

²⁴ Kantiyyasene' xaadi xatta isheetta kojeesse oppaayye; arepadesa a samayta Isira'eeli a qassatta mina tiiqa ka a qeetta mina doddota in caadan; ikka akkan anti Waaqa kodde upnaatta.

²⁵ Waaqase' piisa qara qapo ikiini, “Oton samayta Isira'eeli piitadda a oppa' pase oppaayye ollopa ishootta oorshooyye ka fuula mankistewwa' tura ishoottoppa' qulqullumaayyo akkishooyye, piitase a mattaayshoti an orxaytiyyo Yayqoopi' daashe, karopan ishootta kalsha; ikka kara' kallaadan.

²⁶ Ka kara nakaytan kallaadan ka tikka qupadan ka wayneeta dishadan; oton kantiyyasene' xaaysho ishootta kojeesse qara' firteeta daannooyye, ishootta ka akkan anti Waaqa Poqallaasso kodde upnaadan.”