Xuuma Hisqeeli 27 - Mataafa Qulqulloota

Saara pooyta a katama Tiroosi

¹ Qaaleta Waaqa ka ana kapopa deete ka kiini,

² “Atti to'ampayta namatiiyyi, saara pooytatin Tiroosi saarshe;

³ ka Tiroosise kullaysuma pakateeta qara kalto ka orra piitadda pakateeta kapa ca qara kalo olli urmala heraannitto' kide, ‘Waaqase' piisa qara qapo ikiini, “Atti Tiroosi ihaasawatte ka kiite, xarjaallumaayyo qajan qapan.

⁴ Xeelaayti pakateeta kara, a ke' qupe ka akata ke sire.

⁵ Shammaayti pirpirta Hermooni oppa kodame; tuuddaatti ka pirpirta Lipaanoosi oppa kodamen.

⁶ Pulampaya a markapaayti hiltewwa a Pasaani oppa koden; ka afta markapaayti pirpirta Qobiroosi a pakateeta kara kitto oppa koden; ka hirta arpatin quda siren.

⁷ Sharaatti a markapa, ohaata nukkulla a piita Kipsi, a oppa puja koden ikka milikkitaayti kodden; kaarranta markapaayti'iw ohaata a moonta pahato isho a awla a piitadda Qobiroosi a xaala quda' qatte oppa kodamen.

⁸ Qulampaya markapaayti, piita Sidoona isho a Arwaatiti de'en; atti Tiroosi! a markapaayti saanta akkinna, ookkaatti a ke kara ca.

⁹ Ookka a Kepaali a qimshe ke kara caan; ka qeppeelliyya markapaayti a nyapale' harminni. Markappa a pakateeta isho orra kara co piisa ke olli nakatatta'e ke kapopa deeni.

¹⁰ Xela Faarisi ka a Liitiya isho a Liipiya, xelaayti olloppa lahen ka xelaayti a oranna kodden; ka kontalewwaasso isho kullewwaasso ke kara' rakaden.

¹¹ Xela Arwaati isho a Heleeki, kawwattaayti a oxinta kapa tiitayshen ka ke tooyni; orra kamaati ka mishshikewwaatti kara ca ka tiitaawwaata kawwattaati qudandesa kontalewwaasso rakaden ka siraatti immakkoota' koden.

¹² Qoota teyaanta mehadda a kutta qapto malla, Tersesi ke olli nakatanni ka sipla dakara ka siplalla ka silpalla ika pila ka irsaasewwaan mehadda ke' purinni.

¹³ Kirikkeeta ka Tupaaleta isho Meshekeeta nefo ke olliiw nakatanni; atti ka karpishshadda isho meeha a sipla poora oppa kodame teyyanni ka kapandesa shaqataayti isheetta' purinni.

¹⁴ Atti ka meehaaytin Petitokarma qaraayye fartada ka fartada oranna isho kaankewwa pursanni.

¹⁵ Orra Roodi ka ke olli nakatanniiw; piitadda a pakateeta kapan desa ca ka ke olli urmala heraani ka hirta arpa isho jeela a pooran ke' deeni; atti ka qara heraanni.

¹⁶ Ka daka a ilaawa a heraan kokkoka ka daka tiima a heraan kokkoka ka ohawwa a tittiima ka pujame ka ohawwa nunukkulla isho sira a elellaappa kodameetin meehaayti pursanni.

¹⁷ Yihuta isho Isira'eeli kuli ka ke olli nakataden ka meehaayti kapa'e, kappa a piita Miiniti ka unta ka takma ka sayteeta isho qimaamewwaan purinni.

¹⁸ Qoota meeha keppa' pure, akka teyaanta ika lekayteeta qapto malla, Tamaasqo ke olli nakatanni ka meehaayti kapa'e, taadeta wayneeta a helpooni isho nyirfa kahirra a sahoori ke' purinni.

¹⁹ Taaneta isho Kirikkeeta taadeta wayneeta a piita Usaaliti parmeellaan haadamte ka sipla tumame ka qimaamewwa isho aykitta alaawnonne ke qara mehaddaatti pursanni.

²⁰ Orra Dedaani ka mehaddaatti pursatta'e, ohawwa a koorricca qaratin ke' deeni.

²¹ Arapaata ka kutkuttowwa Qeedaari kan tampanynyaddaatti ka haariyya laahadda ka laahadda isho qolpayaan deeni ka ke olli nakatanni.

²² Nakkaatewwa a Saapa isho a Raama ka ke olli nakatanni ka qimaamewwa a piisa qaropa jaalla ika lekayta ka dakadda a heraan kokokkoka isho warqeetan ke qara mehaddaatti pursanni.

²³ Nakkaatewwa a Karaani ka a Kaanehi ka a Eteeni ka a Saapa ka a Asoori isho a Kilmaadi ka ke olli nakatanni.

²⁴ Ishootta ka urmalaatippa ohawwa papaxxaara ka jarqewwa a moonta paha ka a harkaan oppa sira pujene ka saleenna a qalameetan sirene a qeqeppisame ka watarowwaan ollopa hideneetin deeni ka ke olli nakatanni.

²⁵ Markapadda a Terseesi ka shaqataayti ke' haaden; Atti ka pakateeta kara fee'isa kukuttan immakaatte.

²⁶ Qulampayaatti ka pakateete otantoppopa ken qulan. Puppeeta a qinda piirtota ka otanta pakateeta kara' ke moojta.

²⁷ Oto kuyyaata pi'ittaayti' kaytooyye, teyantaayti ka shaqataayti ka nakkaatewwaatti ka qulampayaatti ka a markapa kara koda koona, ka harmootaayti ka a ke olli nakatanna ka xelaayti a oranna isho orra a ke kara co piisa, otanta pakateeta karopa jimma.

²⁸ A markapaayti qulla oto pakateeta kelopa tawnaan ka ullupnaaneeyye, samayta a pakateeta kapa kalo kuli tammaqtan xara.

²⁹ Qulampaya ka pulampaya isho a markapa kara anna piisa, markapaddaasso kara alle lekkadan; ka pakateeta kapa' qa'adan.

³⁰ Ka isi qarandela kuyyaalayta fidadan, ka taraappa kankalaadan, ka nessaaysho kuttishan ka a kuttati' ke pooyan;

³¹ ka ke daptisatta'e, mattaaysho' kooshadan; ka mehadda dapteeta kalsadan; ka a kuttati ke' nyarrahan ka akata ke pooyan.

³² Ka pooyta ke' xa'an ka saara pooyta ke' saarshan ka kidane, ‘A pakateeta paawwite; ikka kara' patte; ata ayno Tiroosi paha?

³³ Ete meehaayti pakateeta kara sookeeyye, samayta lekayta' faakisse; ka teyantaayti isho meehaayti a koopenne, nuqussa piita' teyantasse.

³⁴ Amma xoori pakateeta seka kara'e qeqqepte ka haste; mehaddaatti a nakata isho orra a ke kara co piisa ka ke olliiw pisha kelopa jimma.’

³⁵ A piitadda pakateeta kapa ca qara kala piisa ka qootaayti desa tammaqan; nuqussaasso ka a kuttati tammaqan fuulaaysho ka tupa' poornaada.

³⁶ Nakkaatewwa a orroppaayye ca ka ke qaraayye seesan; atti ka piraampira neeqa qara kayta, umma haka paraparati a' teyatto.”