Xuuma Hisqeeli 26 - Mataafa Qulqulloota

Xuuma a katama Tiroosi' qara' lelame

¹ An ino' poojammeeyye para kudanka takkattatiiyyi kuyyaata paayyotatiiyyi qaaleta Waaqa ka ana kapopa deete ka kiini,

² “Atti to'ampayta namatiiyyi, wa malla samayta katama Tiroosi xasoonna ikiini, ‘Yursaalami iqitqitte; hupnaadi a nakata nefo ipi'e; isheetta' qoota ino kapa in kaynin malla, ino in teyantoonna.’

³ Semalla Waaqase' piisa qara qapo ikiini, ‘Atti Tiroosi! Anti ke qara'en xaani ka akka puppeeta pakateeta qara' xaanitto mina'e, mankistewwaayyo lekaya ke qara' xaasha.

⁴ Ishootta ka Tiroosi quda kawwatta pootan ka poqaddaadi a tooya qitqishshan; anti ka horooraadi alle isheetta qara saha ka shila a lule isheetta koda.’

⁵ Waaqase' piisa qara qapo ikiini, ‘Ana haasawadeey, mankistewwa isheetta saran. Isheetta ka pakateeta kara pora oppa nyupura afnnaane' koddita.

⁶ Samaytase' xaadi palewwasene piitoppaayye ca kara kalo, orannaanne pirama. Ka akkan anti Waaqa kodde upnaada.’”

⁷ Maana malla Waaqase' piisa qara qapo ikiini, “Tin anti Naapukedenasoori nuqusase kutta a Paapilooni'in qutatte xata xaasha ikka xela oranna a kuttan ka fartadaadi ka xelaadi a fartan torpino isho sarakelladaadin Tiroosi qaropa tuula.

⁸ Isha ka samaytase' xaayti palewwasene piitoppaayye ca kara kalo piisa orannaan leysha ka ke kapa mishshikeeta qotada ka kawwattaayti a oxinta qudopa piita tuula ka immaka ka kontaleetan ke torpa;

⁹ ka xawtira a kawwattan poonnaanen ke quda kawwattaayti poota ka tiijanootan poqaatti a tooya qishsha.

¹⁰ Lekuma fartaadi' qaran xaate'e, kuyyaalayta ka ke qara pira ka akkima orra katama a quda kawwatta qitte karopa kullino mina'e, oto isha xarradaattippan kullinooyye kamanta a xelaadi a fartan torpinooti ka a sarakellaadi isho a kaarrettaddaadi'i ke quda kawwattaayti qitqishsha.

¹¹ Isha ka kamanta fartadaaditin porraatti piisa kilalsha ka koraatetan samaytaayti pira ka tuuddaatti a kukutta piitopa dakka.

¹² Teyaantaayti, ike tura pootadan ka nakkaatewwaatti saran ka allewwaatti a papaxxaara nyapalshan ka dakaddaatti ka saanqadaatti isho tikkaatti a qitqite pakateeta karopa dakkan.

¹³ Anka kirpaayti jaw kiisha; umma arepadesa nessa pekena keeppa in dakaado.”

¹⁴ Waaqase' piisa qara qapo ikiini, “Anti an Waaqa, ana haasawadeey, shilalla luleeti'in ke koda; atti ka pora oppa nyupura afnnaan koddita; umma arepadesa a' qupamto.”

¹⁵ Waaqase' piisa qara qapo iTiroosi' kiini, “Oto a qarame ittahanaaneeyye orra ka ke kara leenooyye, nessa pi'ittaayti qaran xaate'e, piitaddasene pakatewwa kapa ca olkelannen yaaqyaaqane?

¹⁶ Kutkuttowwa a pakateeta kapa ca' piisa ka suufaannaasso qara lekkadan ka kaappadaasso isquda sookshan ka mehaddaasso a pujame alle isquda dakkan ka fuuraan xaran ka piitoppa' qaa'an ka wa ke qara' kaya' minan tammaqan ka xara tupa' tawan.

¹⁷ Ishootta ka saara pooyta ke' saarshan ka kidane, ‘Ke a pakateeta kara kitto orra ka ke kara' kallaanno, atta asse patte? Atti katama peepammaatiiyyi, a pakateeta qara hupnollayteeta koddite, ke isho orra a ke kara kalo, a ishin kapandesa ca' piisa' fuurissen.

¹⁸ Amma kuyyaata pi'ittaaytitiiyyi, piitadda pakateete xaala quda ca' piisa xara, pateettaayti qaran xaate'e, piitadda pakateeta kara ca ka tammaqan.’”

¹⁹ Waaqase' piisa qara qapo ikiini, “Oton katamadda a orra kara kallaanni in kinnini mina ke onshooyye, oton pisha pakateeta karanxata seka ke qaropa oorshooyye, pisha kutta ka ke qara piraneeyye,

²⁰ kamma desaaw anka orra xatta le'e olliiyyi hawla karopa ke lekkisha; ka akka orra le'eppa' kallaatto ke koda ka akka lammatta orra ke kara'en kallaannini'i, ke koda ka qaawa a one a xatta karopa orra lekkanno olli akka lekkatto ke koda; umma piita caattampaya oppa a' kallaatto.”

²¹ Waaqase' piisa qara qapo ikiini, “Piraampiraayti a orra fuurinno'en koda; umma kulipaata a kinnaatto; umma kadi punu pora ke faanaaneeyye, a' teyatto.”