Xuuma Hisqeeli 25 - Mataafa Qulqulloota

Xuuma Amooneta qara' lelame

¹ Qaaleta Waaqa ka anopa deete ka kiini,

² “Atti to'ampayta namatiiyyi, fuulaayti qinda Amooneta opa oorshe ka ishootta qara' xuuma haasawado.

³ Ka ishootta' kide, ‘Qaaleta Waaqa piisa qara qapo dakkaysada!’ Waaqa piisa qara qapo ikiini, ‘Ete tikiyyo a qulqulloota nyalteeyye ka poojamteeyye, piita Yursaalami ka lulle hasseeyye, samayta Yihuta ka poojameeyye, hashshu paka' kiiteneey,

⁴ semmalla anti samayta a qinda piirtota turopan ishin tuukka; ikka ishin qara piran ka piitaayshin oppa kallaadan ka luukkataayshin daman ka aannassin ikan.

⁵ Katama Raapa, akka kaalla oppa deetane'en koda ka piita Amooni pora a kaharra oppopa dawwannaane' koda; akka sitiiyyi akkiman anti Waaqa Poqalla kodde upnaattan.’”

⁶ Maana malla Waaqa piisa qara qapo ikiini, “Neequmta a piita Isira'eeli qara' qapatten minanne' kanaata dawten ka kamanta qapten ka kirpiteneey.

⁷ Tin anti harkiyyon ishin qaropa xaasha ka akka mankistewwa ishin sarane'e, turopa ishin tuukka ka samayta quda xawwi ishin mitta ka piitaddaappa xawwi ishin oorsha ka ishin pira ka ishin pashsha; ishina ka akkan anti Waaqa kodde upnaattan.”

Xuuma a Mo'api qara' lelame

⁸ Waaqase' piisa qara qapo ikiini, “Mo'api isho Etoomi qoota kidene, ‘Tin ha samayta Yihuta akka mankistewwa a pila' mina'ew kodde’ malla.

⁹ Anti katamaddasene a Mo'api xeela quda' qata isho katamaddasene a jeejjannitta a Peeti-yeshimooti ka Pa'alme'ooni isho a Qiriyaataymi piisa qudan kawwatta poota.

¹⁰ Akka piita Mo'apeta mankistewwaappa matte in oorsammini'i, isheetta isho Amoonatan qeeda ka samayta qinda piirtota turopa tuukka, ikka ishootta qara piran.

¹¹ Anka firteetiyyo Mo'api qara' qeeda; ikka akkan anti Waaqa kodde upnaadan.”

Xuuma Etoomi qara' lelame

¹² Waaqase' piisa qara qapo ikiini, “Etoomi' qoota samayta Yihuta qara haalota pooyyite ka haalota pooyyeetaadin a kuttati ishin dapte malla,

¹³ Waaqase' piisa qara qapo ikiini ‘anti harkiyyon ishootta qaropa xaasha ka ishootta kara nama ka horeeta pira ka lulle isheetta hattisha; isheetta piisa ka katama Temaaniti paayyatte haka katama Dedaaniti'i, orannaappa' piramta.’

¹⁴ Waaqase' piisa qara qapo ikiini, ‘Samaytiyyo a Isira'eeli qudannen Etoomi qara haalota pooyya ka akka miiriyyo isho aariyyo ishootta qara' tuqamo' koda! Etoometa ka akkan anti ishootta qara haalota pooyye upnaatta.’”

Xuuma Filisteemeta qara' lelame

¹⁵ Waaqase' piisa qara qapo ikiini, “Filisteemeta qoota xommaata karitta kara' qapatte ka paarkaalummaata a pirama in qapninin Isira'eeleta qara haalota pooyyite malla,

¹⁶ Waaqase' piisa qara qapo ikiini, ‘Tin anti harkiyyon Filisteemeta qaropa xaasha ka Keretaata pira ka a pakateeta kapa peella hase kuli pira.

¹⁷ Anti haalota a kutta'en ishootta qara pooyya ka aariyyon ishootta qatta'a; oton ishootta qara haalota pooyyooyye, ikka akkan Waaqa kodde upnaadan.’”