Xuuma Hisqeeli 24 - Mataafa Qulqulloota

Tisteeta sipla a xoosharte

¹ An ino' poojammeeyye para saklatta ka leya kundatta ka leyoose oppa kuyyaata kundattati, qaaleta Waaqa ka ana kapopa deete ka kiini,

² “Atti to'ampayta namatiiyyi, nuqusa Paapilooni kuyyaase a awwe oppaayye Yursaalami kapa muraay, kuyyaase' xawwi isheetta taafe.

³ Falqoolayse a samaytati' pahana haasawado ka ishootta' kide, Waaqase' piisa qara qapo ikiini, ‘Tisteese a sipla kisa qara' qa'e ka kela' pisha katte.

^4-5 Ka xelloota tela oppa tumalleessa qeede ka qale; ka tisteeta kara' so'a xarshe ka himina kuli karopa dakke; ka so'a a kupeeyya isho a harka karopa xarshe; ka lafa papaxxaara karopa immake; ka kamma' kurpanna tole; ka fayya' palayshe ka lafaadi kuli kara' palayshe.”

⁶ Semmalla Waaqa piisa qara qapo ikiini, “Tisteese a sipla' xoosharte jureetaadi ka kela tawa tiitte, katamoosen a orra orra lenno kara kalo, oo ishootta kido! So'a a isheetta kara ca a oppa a reexnin mali takka takka kara pohe.

⁷ Diika a isheetta' tuqte isheetta karaayyew ca; akka opani qaropa piita in oorinnini'i, piitoppa'en tuqne ma shila a lule qara'e tuqte.

⁸ Akka miiriyyo xa'o'e anka isheetta qara haalota pooyyo'e, diikase a isheetta' tuqte akka qara in deknini'i shila a lule qara'en xaaye.”

⁹ Semmalla Waaqa piisa qara qapo ikiini, “Katamoosen orra lenna, oo ishootta kido! Kurpanna a ishin kupatta, ana ollopa tuulaaw;

¹⁰ kamma kurpanna tole ka oppa apitta qaptishe ka oppa' qimaameta tuqe ka so'asene fayya' palayshe! Lafa kuli ka kupaden.

¹¹ Akka foolto'e siplaadi ka kupado'e, uta ka kara liilane'e, jureetaadi ka kara kupatto'e, porooda qara isheetta qa'e.

¹² Isheetta patta'e yaalte ma jureetaadi apitta nefon karaayye in tawto.

¹³ Qoota paalakumte malla nyalte; allu ke jaqqaan fade, atti ka nyalaattippa jaqqama tiitteey, hakan miiriyyo ke qara' paafanno kara'e arepadesa a jaqqamto.

¹⁴ Anti an Waaqa ana sede haasawade. Isheetta ikoddita, anti ka koda; umma iskammandesa an ooro; umma an suraysado, umma dikattiyyo an pursho. Akka kodaayshina isho akka saantaayshina mina'e ishin qara' faratamta. Sede ana Waaqa piisa qara qapo asse kiini.”

Akkima iskatteeta Hisqeeli toote

¹⁵ Qaaleta Waaqa ka anopa deete ka kiini,

¹⁶ “Atti to'ampayta namatiiyyi, tin anti iskatteese' xaayti a' quda tooyannitto ka ishin xasoonnitto, da'issa takkannen ke tura maysha; ma xoori isheetta malla a nyarrahato; umma a' pooyto, umma ilmaama a urqisso.

¹⁷ Ittaahe diisheey nessaayti in dakaytishan ka sede toote in pooyan; parrootaayti marado ka xopaatti kalsado ka afaatti turan dekadan umma dama pooyta'en daman!”

¹⁸ Anka teykante paraappan samayta' haasawade; shishshipeeyye, iskatteetiyyo ka toote; parraytaadi teykanteeyye, anka akkan ajajame qara' kode.

¹⁹ Samayta ka ana' kide, “Wossen a' koonitta qootinno desa maana akkima kodden ino'e a' lelto?”

²⁰ Anti ka ishootta' kide, Qaaleta Waaqa'e anopa de'e ka kiini,

²¹ “Samayta Isira'eeliti' haasawado ka kide, ‘Tin anti tikase' xayyo a qulqulloota a' hupnaayshinan jeejjannittan ka quda tooyannittan ka ishin xasoonnittan ka yaatannittanen alle nyalsha; hellaasene' xaayshin a diira ka a tuparra a iskammandesa diissene ka orannaappa' piraman.’

²² Ishina ka akkiman anti kode mina' kootan; umma afaassin tura a' dekattan, umma dama pooyta a' damtan.

²³ Matta qara parrowwaassin a' furtan; umma xopaassin a' sookissan; umma a' nyarrahatan ka a' pooytan; ma olli ittahanne juppootaayshin minanne nyorpitan.

²⁴ Hisqeeli milikkita ishina kodda; akka wa a isha' kode piisa kootan. Oto sede koddinittooyye ishina ka akkiman anti Waaqa piisa qara qapo kodde upnaattan.’

²⁵ Atti' xoori to'ampayta namatiiyyi, kuyyaata an oppaayye tikase a qulqulloota hupnaaysho ka xasoottaaysho ka ulfeenaaysho koddite a quda tooyannaan ka ishin xasoonnaan ka sannaan tura qishshooyye ka hellaasso a diira isho a tuparra tura pirooyye,

²⁶ awsetiiyyi a sede kela pahe isha otoose ke' lela'e, ke kapopa de'a.

²⁷ Awsetiiyyi afaatti ka namooseti paqqan; akka isha olli haasawatta umma kulipaata a dakkayta tuuta a koddito ka ishootta' milikkita koddita; ishootta ka akkan anti Waaqa kodde upnaadan.”