Xuuma Hisqeeli 23 - Mataafa Qulqulloota

Tuparra lakki a toola takka a sharmuutumma

¹ Qaaleta Waaqa ka anopa deete ka kiini,

² “Atti to'ampayta namatiiyyi, iskatta lakki a aayya takkan oppa dalade ca.

³ Ka piita Kipsi kara enentuman sharmuutumen; enentume paayyatte sharmuutta kodden; kurdaaysho ka qaqappatame; kuuta kurdaayshoti ka shohame.

⁴ Enenta a kutta maxxaadi Ohoola, isheetta nefo Samaariya; enentaaysho a shakka maxxaadi Oholipa, isheetta nefo Yursaalami; anka ishootta lakki piisa heme; ikka hellaa diira ka a tuparra ana' xaayen

⁵ Ohoola ka ana keladesa dahalsatte ka Asooratase isheetta dahallitto kamma xajeelta dahalsattaatin ante.

⁶ Ishootta' nefo, xela oranna a mehadda moonta paha' kalsanna ka mukissampaya isho ajajampaya; ishootta kan xarjaalliyya ka xayya qapan ka farta qara' kutiini ka ishin kulufni.

⁷ Ka Asooratase saarraappa mattiyya koddite piisa kela'e, dahalsatta isi daasse; ka killowwa a orrase a kamma xajeelta a paalakumatin ante piisan isi nyalisse.

⁸ Isheetta sharmuutumase a Kipsi kara' paayyite in diinne; enentuman diira ka isheetta olli muken ka kurdaadi shohen ka xajeeltaaysho a paalakuma isheetta qara' paafaden.

⁹ Semmalla anti ka Asooratase a olli mukeeta xajeellitto kelopa isheetta tuukke.

¹⁰ Ishootta ka isheetta kamma uwwa furen ka lulle isheetta hattishen ka turaaye hellaadi a diira ka a tuparra' qeeden ka koraatetan isheetta ishshen. Ete firteeta isheetta qara' dikkatteeyye, ikka iskattoppa pahana a qara isi tooytatta' koddite.

¹¹ Enentaaysho Oholipa ete sede akkite kammaayye, qara tammaqa kapaayye, laaddi xajeelta almaluma, isheetta qara'e koope; ikka a enentaayshoti' qaran qapto' sharmuutitteeta koddite.

¹² Ka mukissampaya isho ajajampaya a Asoori ka xelaadi a oranna a mehadda sira' kalsade ka a farta qara' kutiina ka ishin kulufna ka xarjaallewwaasso a xayya qapa kamma xajeelta paalakumatin ante.

¹³ Isheetta kuli, akka nyalte anka akke; ishootta lamattiiyyi saanta takkanneew aanen.

¹⁴ Sharmuutumaadi ka koopaan aane ka pahana a diira Paapilooni a mehadda akata tiima sirade a qussa quda xaashene akkite;

¹⁵ Ishootta surraappa'e salpata heraan kokkoka hidaden ka mattaaysho qara' parroota paxaara' maraden ka saarra a piita Paapilooni' pahan.

¹⁶ Isheetta ete ishootta akkiteeyye, ishootta olli paalakuma'e xajeeltan qapamte ka piita Paapilooni opa orra ishootta kamma erkatte.

¹⁷ Paapilooneta ka deete ka qoollaadippa isheetta olli mukte ka xajeeltaaysho a dahaalatinni isheetta nyalisse; isheetta ka ete nyalteeyye ishootta jippite ka alle tura miinta quu'ite.

¹⁸ Isheetta ete sharmuutumaadi ka saalaadi laka' sookisseeyye, akkan turan enentaaysho xaccisade ka qara tiitaawe mina'en isheetta xaccisade ka qara tiitaawe.

¹⁹ Isheetta laaddi etasene' xaadi a xayya a piita Kipsi kara sharmuutummitto matte oorsatte ka a sede qaran qapto sharmuutitteeta koddite.

²⁰ Isheetta ka sharmuuttasene a diira a isheetta olli muknitta a dawraasso kela a harreeta opa ceccaane, a shaarittaaysho ka a watala farta opa ca kamma xajeelta' toote.

²¹ Semmalla ete Kipseeta kurdaayti qaqappatteeyye ka amaddaatti a enentuma shoohteeyye paalakumase xaayti a enentuma'e' xajeelte.

Firteeta Waaqa a enentase shakka qara' kayto

²² Semmalla atti Ohoolipa! Waaqa piisa qara qapo ike' kiini, “Tin anti isasene a olli mukte ka jippite ka kapa tiitawte'en ke qara' xaasha ka qinda piisaayye desa ke qaropa hala;

²³ ka Paapilooneta ka Kele'ateta piisa ka diirra kafa Afaqooti ka a Sho'ani ka a Qo'ani isho Asoorata ishootta quda kitto piisa ke qara' xaasha; ishootta nefo piisaniiyyi xarjaalleta a xayya qapto ka mukissampaya ka ajajampaya ka saarra a xela oranna isho torpampaya a pisaniiyyi fartan kulufna.

²⁴ Ishootta ka meeha oranna ka sarakeella isho kaarretaaysho qapaden ka xela kutta kodadane ka qinda piisa desa ke qara' xa'an; ka kontaleeta kutta ka a shakka isho kulleeta sipla' kalsaden ka qinda piisaayye desa ke torpan; anti firteetaaysho turopan ke tuukka; ishootta ka heenattaayshoti ke qara' faratan.

²⁵ Akka ishootta miiran ke qara' xa'ane'e, anti yootiyyon ke' qeeda ikka soonaatti isho nappaatti quuran; a ke kara peela hasna ka koraatetan piraman; ishootta hellaatti a diira ka a tuparra'e poojan; isasene peela hase ka apittan kupadan.

²⁶ Ka mehaddaatti a' kalsatte kuli ke quda furadan; ka sirasene xaayti a papaxxaara ke quda teyyadan.

²⁷ Akka lammatta Kipseetopa a tooyyannin ka ishootta matte a oorsannini'i anti paalakumaayti isho sharmuutumase xaayti a' piita Kipsi kara paayyiten alle qaatisha.”

²⁸ Maana malla Waaqa piisa qara qapo ikiini, “Tin anti harka isasene a needdita ka jippite ka kapa tiitaawte turopan ke tuukka.

²⁹ Ishootta ka needdumaan ke qara' xa'an ka wa kamma' yaalte' piisa ke tura saradan ka qulle qumqume ke diishan; paalakumaayti ka laka' sooka; paalakumaayti isho sharmuutumase' xaayti ka

³⁰ sede ke qara' qeedeey. Maana malla mankistewwa kela'e sharmuutumte ka killannaassotin isi nyalisseey.

³¹ Atti' qoota saanta enentaayshina oppan ante malla, anti' tiwwase' xaadi a qitaateta'en harkaaytippa' xaaya.”

³² Waaqa piisa qara qapo ikiini, “Atti' tiwwase a enentaayshina tiwwase palda ka karanxata seka oppa' ikta; tiwwoose' qoota wa kutta' qapanno malla, opanka ke qara xosalan; ka ke qara seesan.

³³ Tiwwase a enentaayshina a Samaariya oppa' ikta, tiwwoose tiwwa a tammaqta ka a pateetta'ey, i'ikta; ka maashsha isho nyarrahatan immakaatta.

³⁴ Ana haasawadeey tiwwoose i'ikta ka kelaayye qaaw ki'issa; ka pappaqissa ka ittupaayye amaddaan quurta. Ana Waaqa piisa qara qapo sede haasawade.”

³⁵ Semmalla Waaqa piisa qara qapo ikiini, “Qoota ana teymite ka iskammandesa alle ana katte malla, paalakumaayti isho sharmuutumaayti kammaayye, wa a deena'e akkatta.”

Firteeta Waaqa a tuparrasene lakki a toola takka' qara' kayto

³⁶ Waaqa ka ana' kide, “Atti to'ampayta namatiiyyi, hela Ohoola isho Oholipa qara' dapa a' murto? Ata a' xasasto ka nyalaasso ishootta'e a' lelto?

³⁷ Ha ishootta idahalsaden ka orra kuli leyshen; ha killannaasso kela'e dahalsaden ka hellaa ana' xaayene kuli leyshen ka akka ishootta' damta koddane'e, kalisoota a kupannitto' koden ka ishootta' dehayshen.

³⁸ Ka semaliiyyiiw sede ana qara 'kodeneew ka kuyyaasetiiyyiiw tikiyyo a qulqulloota nyalshen ka kuyyaatiyyo a nessuma' tuffaden.

³⁹ Maana malla kuyyaase a oppaayye hellaasso kalisoota' koden ka killannaassoti qaleneeyye, tooy awse'ew tikiyyo a qulqulloota kelopa kullen ka nyalshen ka tikiyyo kara wa asse paha' koden.

⁴⁰ Ishootta ha, akka diira pora sekaayye de'ane'e ishootta kuli kamma orra erkanni; tin ikka de'en; akka ishootta tura dakintaayshin jaqatten ka ilda kela' kuulla daatatten ka isquda' sira siratten.

⁴¹ Ka looshsha paxaara qara' kutiiten ka tarabeesase a damta a turan qara tankartiyyo ka sayteetiyyo xaayiten ittura' xaayten.

⁴² Nessa samayta a horro ka ishootta kapaayye dakaanni; samayse' horro qudaayyeew maashshoolaya a koommayte kale ka caaneew; ikka harka iskatteeseti isho a enentaaysho mina' jira kalshen ka mattaaysho qara'e kukubba a paxaara hidden.

⁴³ Anti ka qoota iskatteese dahalsattan apdatte desa kide, ‘Arepadesa oori ishootta a sharmuutitteeta' mina'e isheettoppa kahadan.’

⁴⁴ Ishootta ka akka diira a sharmuutitteeta iskatteeta olli muknaan mina'e, isheetta olli muken ka sharmuuttasene a iskatta Ohoola isho Oholipa olli muken.

⁴⁵ Ishootta' qoota dahalmaya kodden ka orra leyshen malla, hanqeellaya diira ka firteeta a dahalmaya isho a iskatta orra lenno qara' daasammitto ishootta qara' daashen.

⁴⁶ Sede ana Waaqa piisa qara qapo asse kiini, Ishootta qara'en xela kutta xaasha; ikka ishootta tatammaqsha ka ishootta sara.

⁴⁷ Xelase ka dakadaan ishootta dakka ka koraatewwaassotinniiw ishoottoppa quura; ka tura hellaasso a diira isho a tuparra' leysha ka tikkaasso apittan kupa.

⁴⁸ Akka ishina paalakumten mina'e, iskatta piisa akka in paalakummini ka isi tooytado'e, anti alle'en paalakuma piitoppa pashsha;

⁴⁹ ishootta ka paalakumaayshin ishin qaropaaw oorshan; ishina ka juppootase' xaayshin a killoota sakatatta minan qatta'amtan ka akkiman anti Waaqa piisa qara qapo kodde upnaattan.”