Xuuma Hisqeeli 22 - Mataafa Qulqulloota

Juppoota a Yursaalami' koote

¹ Qaaleta Waaqa ka anopa deete ka kiini,

² “Atti to'ampayta namatiiyyi, ishootta xasase; hela katamoosen orra orra lennon immakaade a' xasasto? Ka nyalaasso a kodene ishootta' lele?

³ Ka ishi' kide, Waaqase' piisa qara qapo ikiini, ‘Atti katamaayye, ke iskara orra lennitto ka killanna kodattaan isi nyalinnitto, eta oppa qatta'amto idehaaden;

⁴ orra a' lesse minanne ishin dapampayteeta' koddite ka killanna a' kodatte' minanne nyalte ka kuyyaataayti a pateetta dehaysatte ka parraatti kumma'aysatte; semmalla anti mankistewwa tura qora a qara seesatti'in ke koda ka piitadda tura'e, qora a qara xosaltaati ke koda.

⁵ Ke a maxxaayti pate, katama a seera dapetiiyyi a ke kapa' deha ka a ke kapa seka' piisa ka ke qara seesa.

⁶ Saarra Isira'eeli a ke kara ca' piisa hupnaaysho a ukkumeetatin orra lenni.

⁷ Aappada isho aayyada ike kara tuffatamen; kalayta ka ke kara' miiddame; he'aya isho hiyyeettewwa ka ke kara' miiddamen;

⁸ Meehiyyo a qulqullaawe ippuyatten ka kuyyaatiyyo a nessuma nyalissen.

⁹ Ishin oppaayye orra tika taanynyaati darada maakkummo ca; ishootta so'a killanna kalisoota dehaade'e irrowwa qara' dammi; paalakumma ka caanniiw.

¹⁰ Ishin oppa orra iskatta aappaayshoti olli mukno ka aappaaysho' jeerinno ca; a iskatta isqudaayye xopta leya' qapooyye irreetan olli mukna ka caaneew.

¹¹ Deemo iskatteeta kantittaaysho'e dahalli; a deemow, haantowwa a hellaassoti'i manyeerinni; a deemoow alawtaadi, enenta aappaaysho' xaaye manyeerinni.

¹² Ke karaayye orra deemo nama ikassa'e nooddota teyyanni; atti ka daltan kaajaatti leqeessini ka kantittaayti kela tookta dammi. Ana Waaqase' piisa qara qapo asse kiini.

¹³ Semmalla tooktase a' tabaan teyyatte ka orra a ke kara' leysame malla, tin anti ke kamman harka ollin koha.

¹⁴ Kuyyaata an ishin qattaanooyye ixxormumtane? I'ana tura' qa'attan ka hupnan isqara ana oorissane? Ana Waaqa haasawade ka sede koda.

¹⁵ Anti mankistewwaappa'en ishin pula ka piitaddaappa ishin pasisha ka nyalaatti ke qudaayye tawsha.

¹⁶ Mankistewwa a pila ka kodaayti a nyale akkan; akkiman anti Waaqa kodde upnaatta.’”

Apitta Waaqa a dakara pirreeta kara uta liilinno

¹⁷ Qaaleta Waaqa ka anopa deeta ka kiini,

¹⁸ “Atti to'ampayta namatiiyyi, ha samayta Isira'eeli ana'e, uta dakara pirreeta ika lekayta mina.

¹⁹ Semmalla anti Waaqase' piisa qara qapo in kiini, ‘Qoota piisani uta a dakara pirreeta ika lekayta kodditen malla, takka'en Yursaalami karopa ollopa ishin oorsha.

²⁰ Nama takka akka dakara pirreeta ka sipla ika lekayta ollopa pohanno ka karmooteta dawno ka liilinno mina'e, anti nefo miiriyyo ka aariyyonnen ollopa ishin poha ka apitta karopa ishin tuqa ka ishin liilsha.

²¹ Ollopan ishin oorsha ka apitta aariyyo oppa' ishin opaysha; ishina ka kara' liiltan.

²² Akka dakara pirreeta pootta xoopa kara' liillo mina'e, ishina ka katamaasene kara' liiltan ka akkiman anti Waaqa kodde ka aariyyo ishin qara' tuqe upnaattan.’”

Ishin dapayta saarra Isira'eeli

²³ Qaaleta Waaqa ka anopa deete ka kiini,

²⁴ “Atti to'ampayta namatiiyyi, isheetta' kide, ‘Atti piita in jaqqamminiiyyi, eta miiriyyotiiyyi roopa ke qara'en roopnin.’

²⁵ Isheetta karaayye sullaata saarraadi karma daattino ka pinanta a qape tuuqanno pahata; ha ishootta orra piren ka teyantaaysho isho waasso a heraan kokokkoka qara saren ka iskatta hiyyeettewwa koden.

²⁶ Ha qeesewwaadi seeriyyo qepinni ka a qulqullaawe nyalinni; umma a xawwi' reexxamte isho a in reexammin olkela reexni in caan ka kuyyaatiyyo a nessuma puyanni; umma a nyalte ka a in nyallini arta karaayye reexa a co kollinni in caan ka samaytiyyo tuffanni; anti ka ishoottoppa ulfeessammi in kinnin.

²⁷ Kutkuttowwaadi a isheetta karaayye ca, yoyta a pinanta qape ka tuuqanno mina ka tabaan kaaja akkatta'e orra lenni.

²⁸ Xuumampayaadi a Waaqa ishootta'en haasawannin mali kiini, ‘Waaqase' piisa qara qapo asse kiini’ Ka keleshaata darta ishootta akkini ka suuma' darta ishootta' sooni ka dapaaysho qara dekni.

²⁹ Samayta a piisse oppa kalo, orra sarri ka ponqini ka teekolayta isho rakkatampayta miini ka mura dukaata' mali kalayta sarri.

³⁰ An piitoose an patinnin turanne, anka ishootta oppaayye nama kawwatta katama akara xata qitte kara' oorsho ka qinda ishin qitte oppa ana tura' qa'ado ka akkan ishootta an patinnini'i, samayta' qaton fade; umma nama takka nefo an teyne.

³¹ Semmalla Waaqase' piisa qara qapo ikiini, ‘Aariyyon shootta qara' tuqa ka miiriyyo a kokkokan ishootta kupa ka dapaaysho' minan ishootta qatta'a.’”