Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Xuuma Hisqeeli 21 - Mataafa Qulqulloota


Akkima Waaqa Yursaalami qatta'o

1 Qaaleta Waaqa ka anopa deete ka kiini,

2 “Atti to'ampayta namatiiyyi, Yursaalami qaropa fuulaayti tiitayshe ka porrasene a samayta oppa' sakatanna isho piita Isira'eeli qara' xuuma haasawado!

3 Ka piita Isira'eeliti' kide, Waaqa ikiini, ‘Tin anti ke qara'en xa'a ka korkortiyyo kara koraateta yukada ka ke karaayye hanqeellitta ka juppoolayta pira.

4 Qootan ke karaayye hanqeelitta isho juppoolayta piro malla, koraatetiyyo tupatte paayyatte haka qutattati'i nama piisa qara'e korkortaadi kara yukamta.

5 Nama piisa ka akkiman anti Waaqa korkortiyyo kara koraatetiyyo yukade upnaada; umma lammatta korkortaadi karopa in oorto.’”

6 Ma xoori atti to'ampayta namatiiyyi, quujado! Karitta a qepenne ka nyarrahata kokkokan quujado!

7 Ka oto ke' kiinaane, ‘Maana malla' quujanniiyyi?’ Ishootta' kide, ‘Otoose a' dakaynittan malla karitta piisa tammaqa; harka piisa ka qishshammoodan; xormuma piisa dapada; tammaqtan sinda ka kamman qitan; tin sede deena qara kitta ka dikkatta. Sede ana Waaqase' piisa qara qapo asse kiini.’”

8 Qaaleta Waaqa ka anopa deete ka kiini,

9 “Atti to'ampayta namatiiyyi, xuuma haasawado! Ka kide, Waaqa ikiini, ‘Koraateta! Koraateta a laajamte! Ka quda shohamte!

10 Ha ikassa'e laajamte; ka akka a hankaada' mina walaqlaqto'e quda shohamte; ka kuli' xasa maana'en qapna? Innaayyo in xasoodan koraateta uleeta nuqusa we kapa dikninkittooy.

11 Semmalla koraatese akka harkoppa' qapamto ka akka quda shohamto'e daasamte; ka akka haraka ishshampayta oppa' daasamto'e, laajamte ka quda shohamte.

12 Atti to'ampayta namatiiyyi, ha isheetta samaytiyyo isho kutkuttowwa a Isira'eeli'i pirta; ha ishootta isho samaytase' xayyon takka koraateta turopa tuukkaay, semmalla kessoppa tottoomado. Ka ullupe ka pooye

13 Waaqase' piisa qara qapo ikiini, ‘Dukaatan samaytiyyo i'ekkaysatama, oto koraateta nuqusa ikasso ikka kulipaata caanni in kinniniiyyi maana koda?’

14 Atti to'ampayta namatiiyyi, xuuma haasawado ka harkaatti ollin kohe! Aleenon lessaata'e koraateta a olqaraxata lakki ka sessaan dadda'isso; oranna ishootta kapa mure, oranna a orra lekayta pirra'ey.

15 Karittaaysho akka akata tammaqo'e lekaya ka le'ane'e, anti xarrada a katamaddaassoti pisa oppa'en koraatese yukamte xaayeey; oo ishootta kido! Ha akka a hankaada' mina walaqlaqto'e laajamte ka orra pira'e ela qeedamte.

16 Atti koraatetayti! Qinda a qartaayti opa tiitaawte pisa opa, akkitta ka pittittopa quure.

17 Anti kuli harkaayyon ollin koha ka miiriyyo paafada; ana Waaqa sede haasawde.”


Koraateta a nuqusa Paapilooni

18 Qaaleta Waaqa ka anopa deete ka kiini,

19 “Atti to'ampayta namatiiyyi, saantada lakki a oppan nuqusa Paapilooni oranna arepa tuula oppa' milikkita kode; saantadosen lakki nefo, piita takkaayyeew xa'ani ka katamaddasene a porroosen opa annaane akkissa'e porase a oppa pora lakki' paqno oppa'e milikkita kode.

20 Pora oppan oranna Raapa katama Amoorata opa deeno isho katamasene a Yursaalami kawwattan kapa qorrame a Yihuta opa deeno oppa'e milikkita kode.

21 Nuqusa Paapilooni saanta a qara' maqo upnaatta'e, porase a oppaayye pora lakki paqno oppa'e qa'ade ka suuma soosanni ka qinda ishin desa akkinnaan upnaatta'e, lawaddaadi piita' tuqni ka killanna kaassanni ka marqina tooyanni.

22 Ka akka xarinta xarra katamaatin qepinnaan harmisado'e, ka a xelaadi a orra leysho ajajo'e ka nessa a nyara oranna a orra xaxxaasho dakaytisho'e ka xarnasene xarrada Yursaalami' turopa dehaysho'e ka kawwatta katama' qudopa piita tuulo'e ka kawwattase a qaraxata katamaasene lawaan poko dawado'e, milikkita qindaadi a akkittatin desa qindose a Yursaalami' kitton desa akkinno ka ishi akkaade.

23 Ma xoori samayta Yursaalami qoota nuqusa Paapilooniti' piddama xaxade malla, sede suuma darta'e ishootta' pahanaatta; ma xoori akka poojamane'e isha ishin dapaytaaysho'e matte ishootta oorsha.

24 Semmalla anti Waaqase' piisa qara qapo in kiini, ‘Juppootaayshin ilaka' sookte akka ishin dapampaya kodditen; nama piisa ka upnaade; wa' koonittane' piisanne akka' juppoolaya kodditen akka akkissen; semmalla iqqapamtan ka poojamtan.

25 Ke a etaayti a oppa qatta'amto kayen, kuyyaataayti ka dehaatte, ke a nyalte ukkuttootayti saara Isira'eelitiiyyi!

26 Waaqase' piisa qara qapo ikiini, “Parrootaayti fure ka kulleetaayti a ulfeena' mayshe! We akka caan qara'en tawan; a shakka a kuttado; a kutta ka shakkado.

27 A qitqitte! A qitqitte! A qitqitte'en isheetta koda; haka nama isheetta qattaano deeno kara' xoori, sede in koddito ma oto de'oyye, isha'en isheetta daasha.’”


Koraateta isho Amoonata

28 Atti to'ampayta namatiiyyi, qoota Amoonata ka qoota ishootta Isira'eeleta onnaane desa xuuma haasawado ka kide, “Waaqase' piisa qara qapo ikiini, ‘Koraateta! Koraateta! Koraateta a orra lessaata yukamte, akka a hankaada' mina walaqlaqto ka orra pirto'e quda shohamte.

29 Koraateta Paapilooni orrase nyale ka ukkuttowwa kodde a katama Amooni'i xolmaandesa quurta; etaasso a qatta'ama idehaaden; qoota koraatetoseti desa keleshaata a akken darada; qoota wa koddaati desa ete killannaasso' kaassadeneeyye, wa ishootta oorshene sassapa.

30 Koraatetase korkortaadi karopa oorshe; atti koraatetaayti, pora oppa uumamte ka piita oppa dalatte eyye'en ke qara' farata.

31 Miiriyyon ke qara' tuqa ka apitta aariyyo ke qara' opaysha ka karpampaya a orra lessaata saha turopa ke tuukka.

32 Akka qora apitta koddita; diikaayti ka otanta piitaayti oppa' tuqama; umma kulipaata matte a oorsatamto, ana Waaqa asse haasawadeey.’”

ကြှနျုပျတို့နောကျလိုကျပါ:



ကြော်ငြာတွေ