Xuuma Hisqeeli 20 - Mataafa Qulqulloota

Heenna Waaqa ka tiitta nama

¹ An ino' poojammeeyye para tappattatiiyyi ka leya kenattatiiyyi ka leyoose oppa kuyyaata kundattatiiyyi qimaya Isira'eeli oppaayye a deemo fiqaata Waaqa' kaassatta'e de'en ka fuuliyyo tura' kuti'en.

² Qaaleta Waaqa ka anopa deete ka kiini,

³ “Atti to'ampayta namatiiyyi! Qimayoosen a Isira'eeliti' haasawado ka kide, ‘Waaqase' piisa qara qapo ikiini, ‘Hela ishina' fiqaatiyyo kaassatta'e' deetene? Anti caattampayta koddeetiyyonnen xaxanni! Akka ana qara we' kaassattane'e an ishina an faqqanni an co. Ana Waaqase' piisa qara qapo asse kiini!’

⁴ Atti to'ampayta namatiiyyi, ishootta qara' dapa mure! Ata ishootta qara dapa murin! Ka nyaloosene a aappadaasso' kodene ishootta' upnayshin.

⁵ Ka ishootta' kide, Waaqase' piisa qara qapo ikiini, ‘Kuyyaata an oppa Isira'eeli reexadeeyye sanynyeeta Yayqoopi'in xaxade; ka piita Kipsi kara ishootta isi upnayshe ka ishootta' xaxade ka kide, Anti an Waaqa Poqallaassin.

⁶ Kuyyaasetiiyyi akkan piita Kipsi kara ishootta sooksho ka piitase a hiira an reexade a aanna isho takma oppa' puren a piisa qaropa qapto karopa ishootta kalsho'en ishootta' xaxade.

⁷ Ka ishootta' kide, Ishina takka takkaayye pahanaddosen a killoota ifatamma a' qaropa ilda oorissene alle iskapa sekaysha ka killannosen a piita Kipsitin isi in nyalshan. Anti an Waaqa Poqallaassinaay.

⁸ Ishootta' xoori ana falqen umma ana dakaya in heennaanne; umma ishoottoppa nama takka' nefo pahanaddosen a killoota ifatamma iskapaayye in sekanne; umma killannasene a Kipsi in diinne; anka kide, a piisse a Kipsi kara caaneewwen aariyyo ishootta qara' tuqa ka miiriyyo ishootta qara' paafada.

⁹ Ma xoori samaytase a oppa kalan an fuulaaysho tura akkiman piita Kipsi kara ishootta sooksho qaaleta kale tura'e maxxiyyo akka in jeerrin mallan kide ka piita Kipsi kara ishootta sookshe.

¹⁰ Semmalla piita Kipsi karan ishootta sookshe ka koommayta oppopa ishoottan de'e.

¹¹ Taantewwasene isho seerrasene xayyo oto nama ishootta tooytaannooyye caattaan kallaanno, in ishootta' daashe ka ishootta' upnayshe.

¹² Semaliiyyiiw a ishootta qulqullanno akka ana Waaqa koddite akka upnaadane'e, kuyyaatiyyo a nessuma'en ishootta' daashe; ikka ana isho ishootta otantoppa' milikkita kodayteetiyyo an ishootta olli kodade koddini.

¹³ Ma xoori samayta Isira'eeli koommaytoppa'e ana falqe umma taantewwaayyonne in kallaanne ka seerase xayyo kadi nama tooytannaayye ishin caattaan kallaanno jippen ka a kuttati kuyyaatiyyo a nessuma nyalshen; anka dikade ka kide, Koommaytoppa alle ishootta pira'en aariyyo ishootta qara' tuqa.

¹⁴ Ma xoori samayse an piita Kipsi kara ishootta sookinnooyye akke tura'e akka maxxiyyo in jeerrinin kide ka asse koda diishe.

¹⁵ Ma xoori piitase a hiira an reexade a aanna isho takma oppa' puren piisa qaropa qapto an ishootta' daanno karopa akkiman ishootta an kalinnini'in koommaytoppa ishootta' xaxade.

¹⁶ Maana malla seeriyyo ijippeneey umma taantetiyyonne in kallaanneey ka kuyyaatiyyo a nessuma nyalsheneey; karittaaysho ka killannaasso quda' kokeey.

¹⁷ A koddito ma iltiyyo i'ishootta suraysatte; umma anti koommaytoppa an ishoottan lenne ka takka ishootta an pirre.

¹⁸ Ka koommaytoppa hellaassoti' kide, Taanteta a aappadaassin kodenenne in kallaadan; umma seeraaysho in tooytadan; umma killannaassotin isi in nyalshan.

¹⁹ Anti an Waaqa Poqallaassin! taantetiyyon kallaada ka seeriyyo qanqannissa tooytada.

²⁰ Ka akkan anti Waaqa Poqallaassin kodde akka upnaattane'e, akka ana isho ishin otantoppa' milikkita koddane'e, kuyyawwaayyo a nessuma' xawwi reexxa ka ulfeessa.’

²¹ Hellaasso ka ana falqeneew; umma taantetiyyonne, in kallaanne ka seerase' xayyo oto nama tooytannooyye caattaan kallaanno qanqannissa in tooytaanne ka kuyyaatiyyo a nessuma' nyalshen; anka dikade ka kide, ‘Aariyyon ishootta qara' tuqa ka koommaytoppa' miiriyyo ishootta qara' paafada.’

²² Ma xoori an Isira'eeleta sookinnooyye mankistewwasene akke' tura'e, maxxiyyo akka in jeerrin mallan kide ka harkaayyo oorsade.

²³ Semaliiyyiiw akkiman mankistewwaappa ishootta' pasisho ka piitaddaappa ishootta fido'e, koommayta oppa'en ishootta' xaxade.

²⁴ Maana malla seeriyyo in tooytaanne ka taantetiyyo jippeneey ka kuyyawwaayyo a nessuma nyalsheneey; ikka killannasene a aappadaasso ishootta' sakatadeneeti sakatattaan jaalaneey.

²⁵ Seminan anka taanteta a paxaari in kinnin ka seera a ishin caatta teyni in kinnin ishootta' daashe.

²⁶ Akkan ishootta piro'e ikka akkan Waaqa kodde upnaadane'e, kalisowwasene' xaaysho a oppa qarammaasso kalisoota a kupannitto' koonaanetinnin akka nyalen upnayshe.

²⁷ Semmalla atti to'ampayta namatiiyyi, samayta Isira'eeliti' haasawado ka ishootta' kide, ‘Waaqase' piisa qara qapo ikiini, aappadaassin seden alle ana diissatanne ana oten.

²⁸ Piitase an akkan ishootta' daasho' xaxade oppopa eten ishootta kalinnooyye, pora oppa kunkunnawwa deddera taaki qoyra a haashsha qapo a akkinaan piisa kela'e kalisootaaysho' kalshen ka kalisoowwasene' xaaysho kupanna a anan miirayshene dehayshen ka tankartase' xaaysho alaawnitto qayyayshen ka kela' kalisoose' xaaysho a ikkayta tuttuqen.

²⁹ Anka ishootta' kide, ‘Ata poroose opeela kide a' qaropa fayyannittan maana?’ Maxxaadi ka haka awweeti Paama kidame.

³⁰ Semmalla samayta Isira'eeliti' kide, ‘Waaqase' piisa qara qapo ikiini, hela a aappadaassina' mina'e isi nyalissaneewwe? Ka killannasene' xaaysho nyale kamma antaan sharmuutumteneewwe?’

³¹ Oto' kalisoowwaassin kalinnittan ka hellaassin apittoppa' kupnittan, haka awweti'i killannosen xaayshinanne piisani isi nyalinnittan; ishina samayta Isira'eelitiiyyi ka kuli attan akka' fiqaatiyyo kaassattane ishina' faqqata? Caattampayta koddeetiyyonnen xaxanni! Akka' fiqaatiyyo kaassattane'e an ishina'en faqqato. Ana Waaqase' piisa qara qapo asse kiini.

³² Sede a' dikatten ka kiitene, ‘A samayta piita mina'en koddina ka kaffa a piitoppa ca' mina'e, dakadda ka qora' sakatanna’ Ishina'en koddito.”

Qitaateta Waaqa ka diissataadi

³³ Anti Waaqase piisa qara qapo in kiini, anti' caattampayta koddeetiyyonnen xaxanni! Harkase' xayyo kokkoka ka hupnase' xayyo kutta isho aariyyo ishin qara' tuqaanne a dukaatatin ishin qara' nuqusuma.

³⁴ Anti harkase xayyo kokkoka ka hupnase xayyo kutta isho aariyyonnen samayta piita' kara ishin sooksha ka piitadda a oppa' pastene oppa ollopa ishin oorsada.

³⁵ Ka koommayta mankistewwaayye otantoppa co oppopa ishin qeeda ka eyye ildaassin oppadesa ishin qara' farata.

³⁶ Koommayta Siina oppaayye akkiman aappadaassina a xatta qara' farate mina'en ishin qara' farata. Ana Waaqase' piisa qara qapo asse kiini.

³⁷ Akka sikmayta kahirraadi olkela reexno mina'en a paxaara isho a neeqa ishin oppa olkela reexa ka akka kodayteetiyyon hidamtane' ishin koda.

³⁸ Falqoolaya isho a ana qara kale piisan alle ishin kara sooksha; kadi punu piita amma oppa kalan oppa ishootta sookshaayye, piita Isira'eeli karopa in kalan; ishina ka akkan anti Waaqa kodde upnaattan.

³⁹ Ishina samayta Isira'eelitiiyyi, Waaqase' piisa qara qapo qootaayshina desa asse kiini, “Arepa desa oton ana'e a' dakayni a' kinniniiyyi, ishina takka takkaayye aananka ka killannaddaassina' sakatada! Ma kuli i'anopa dakkaysattan ka ana' ajajamtan, umma kalisowwaassin isho killannaassinanne, maxxiyyo a qulqullaawe a' nyalissan.

⁴⁰ Irrootase' xayyo qulqullaawte ka akata dera a Isira'eeli qara'e, samayta Isira'eeli' piisa ana' sakatada; anti ka eeyye ishootta teyyada ka eeyye'e, daassawwaasso ka mehaddaasso a qulqullaawe isho kalisowwaasso a paxaara teyyada. Ana Waaqase' piisa qara qapo asse kiini.

⁴¹ Awtan samayta piita oppa ishin kalshooyye ka piitaddasene a oppa' pastene oppa ollopa ishin oorsadooyye, a kalisoota alaawnitto mina'en ishin teyyada ka fuula mankistewwa' tura'e, qulqullumaayyo ishin oppa' akkisha.

⁴² Oton piitase an akkan ishootta' daasho aappadaassina' xaxade a Isira'eeli oppopa ishin kalsho, ishina ka akkan anti Waaqa kodde upnaattan.

⁴³ Eeyye karaayye akka saantadasene' xaayshin ka kodaddasene' xaayshin a issin nyalissene matte oorsatan ka neequmta a' kooten malla isi xaccisattan.

⁴⁴ Ishina samayta Isira'eelitiiyyi, a saantadasene' xaayshin neeqa ka kodaddaasene' xaayshin nyale qara'e in koddinin maliiyyi, saanta ishin maxxiyyo ulfeessammonne oton ishin tooyyadooyye, akkan anti Waaqa kodde upnaattan. Ana Waaqase' piisa qara qapo asse kiini.”

Xuuma firteeta a piita tupatta' qara' daasame

⁴⁵ Qaaleta Waaqa ka anopa deete ka kiini,

⁴⁶ “Atti to'ampayta namatiiyyi, qinda tupatta opa fulaayti tiitayshe ka tupatta isho piitase tupatta a mura qapto qara'e, xuumaayti haasawado.

⁴⁷ Mura tupattati' kide, ‘Qaaleta Waaqa' dakaye! Waaqase' piisa qara qapo ikiini, tin anti apittan keeppa' qapa ikka ke kara qoyra a qoyya isho a koke kupa; umma hapulpulose a apitta in libbo ka tupatte paayya ka haka qutattati fuula orra piisa' xaalaysha.

⁴⁸ Nama piis ka akkan anti Waaqa apittoose qaptishe akka, umma apittose in libbo.’”

⁴⁹ Anti ka kide, “Oo ana kido! Waaqqo ke a piisa qara qapo! Ha ishootta qootiyyo desa ikiini, ‘Hela isha' pahananneew haasawanni in co?’ Ka moomooni.”