Xuuma Hisqeeli 2 - Mataafa Qulqulloota

Hisqeeli akka koda' reexame

¹ Ikka ana' kide, “Atti to'ampayta namatiiyyi, xa'e ka ela qa'ado ke ollin haasawadaay.”

² Ete ana' haasawannooyye hapura ka ana karopa kale ka na qaatishe; ete ana' haasawannooyye anka dakaye.

³ Ikka ana' kide, “Atti to'ampayta namatiiyyi, anti tiyyoolaytase a samayta, samaytase a Isira'eeli oppopan ke erkini. Ishootta isho aappadaasso haka awweti'i ana tiyyen.

⁴ Xeltoose kamtollayteeta ka a xolma kokisse; anti isheettoppopan ke erkini. Akka ishootta' kiita, ‘Waaqa piisa qara qapo asse kiini.’

⁵ Ishootta' qoota samayteeyye tiyyoolaya kodden malla kadi punu dakaynaan taaki dakaya tiinnaaneeyye akka turan xuumampayta ishoottoppa co i'upnaadan.

⁶ “Atti' to'ampayta namatiiyyi, ishootta taaki haasaasso in fuuran; kadi punu samayta a qassatta ka qeeyya isho kitatta paho oppa kaltaayye, ishootta' qootan samayteeyye falqoolaya malla haasaasso in fuuran ka tura in tammaqan.

⁷ Ishootta' qootan falqoolaya samayta malla, kadi punu dakaynaan taaki dakayni in kinniniiyi, atti qaaletiyyo ishootta' haasawatta.

⁸ Ma xoori atti' to'ampayta namatiiyyi, waan ke kiina' dakaye ka samayse tiyyoolayta kodde mina tiyyoolayta in koddan; afaatti pane ka waan ke' daanna' dame.”

⁹ Eten tooyyadeeyye tin, anka harka mataafa a ollopa marrammo a kara taafame qapade ka anopa deraade akke.

¹⁰ Ikka ana tura'e mataafoose ollopa marrammo olkela pane, opan ka fuule desa ka tultanne qaalewwa a nyarrahata ka a pooyta isho a oo ino kido! kara' taafen.