Xuuma Hisqeeli 19 - Mataafa Qulqulloota

Saara pooyta a kutkuttowwa Isira'eeli malla saarsame

¹ Waaqa ka ana' kide, “Atti kutkuttowwa Isira'eeli malla saara pooyta' saarshe;

² ka kide, “Ata aayyaassin maana! Ha akkooteta karma; ka karmaada kara' rabbite; ka otanta haariyya karmada kara' nyalqaadi qohatte.

³ Ka nyalqaadippa takka kuttisse ikka haaritta karma' kodde; ka pinanta qapa kollade ka orra dame.

⁴ Mankistewwa ka qootaadi desa dakayen; ikka qaawaaysho kara' qapame; ishootta ka funnootan isha titen ka piita Kipsi opan kalen.

⁵ Wa asannitta akkan paata patta, wa' kippannitta ka tura' paten ete upnaatteeyye, nyalqaadippaaye a pila' qeetteew ka kuttisse; ka haaritta karmaati' kooteew.

⁶ Ikka karmadaappa xolma haada paayye; ka haaritta karma' kodde; ka pinanta qapa kollade ka orra dame.

⁷ Ka kawwayaasso qitqishshe; ka katamaddaasso lulle hattishe; piitase isho orra a kara kalo ka daattittaadi minan tammaqtan xare.

⁸ Mankistewwa ka isha qara' xa'en; ka qindadda piisaayye desa piitaddaappa isha qara' xa'en; ka turuura isha tura' qaasen; ikka qaawaaysho kara' qapame.

⁹ Ikka funnootan isha titen; ka qampara xolma qara ishi' kalshen; ka nuqusa Paapilooni turopa ishan aanen; ka akka nessaadi irrowwa Isira'eeli' qara'en dakaannini'i, tika hida karopa isha kalshen.

¹⁰ Aayyaassin qoyra wayneeta, a dula wayneeta oppa kitto mina; ka pisha kapa' dishamte; ka qoota pisha kuttaya akkannitto malla; taamma jifsatte ka daltan immakaatte.

¹¹ Qoyraadi a kokkoka ulewwa nuqusa'e koddini; ikka qora pila qaropeela deruma' jaalte, ka taammaadi a oli qapeetinni, deraatte ka laka' akkaatte.

¹² Ma xoori wayneese miiranne shukkamte; ka piitopa katamte; xayxayta qinda piirtota a kupno ka quda daltaadi kokshe; ikka piitopa seehte ka kokte; apitta ka qoraadi a kokokkoka' kupe.

¹³ Amma wayneeta koommaytoppa'e piita pisha' dape; ka piita kokte oppa' dishame.

¹⁴ Apitta ka fujuqa qoyraadi kara shore; ka qoyraadi isho daltaadi piisa kupe; umma uleeta nuqusa nefo in hasne. sede saara pooyta a pooyta' saarinnaane.”