Xuuma Hisqeeli 18 - Mataafa Qulqulloota

Akka nama a juppoota koono to'o

¹ Qaaleta Waaqa ka anopa deete ka ana' kiini,

² “Qoota piita Isira'eeliti desa deymatteetase oppa o'oorraan ka kiinaane, ‘Aappada luukkata a papa'aawnitto dame ikka ilka hellaa miishmiishshasse, maana kideeta?’

³ Anti caattampayta koddeetiyyonnen xaxanni! Arepadesa piita Isira'eeli kara deymatteese a' haasawattan. Sede ana Waaqase' piisa qara qapo asse kiini.

⁴ Nama piisa xayyow; akka aappa xayyo kodde mina'e, inna kuli xayyoow; nama a juppoota koono isha to'a.

⁵ Nama oto hanqeeta koonooyye ka taanteta isho dukaatan kallaanooyye,

⁶ wa irroota qara killoota' qalene dammi in co taaki killowwa samayta Isira'eeliti' sakatanni in co, isha iskatteeta nama pila olli mukni in co; umma iskatteeta a jureeta leya' qapto qudopa anni in co.

⁷ Isha nama takka nefo miiddini in co; wa leqa kapa' qapsiisade, oto leqaadi teyyadooyye, i'oorinni; umma orra sarri in co; a doxe idaminni, ka a lulle anna uwwinni.

⁸ Isha' kaajaadi daltan leqeessini in co; umma kamma we takkan nefo teyanni in co; wa neeqa koda kapa alle'e sekaani; ka otanta a nama lakki oppa' dukaata murri.

⁹ Namoose taantetiyyo qara'e kallaanni ka amanuman seeriyyo' tooytini; namoose hanqeelitta icaada. Ana Waaqase' piisa qara qapo asse kiini.

¹⁰ Namoose oton sarampaya inna, a nama ikanna ka juppowwosen oppa takka koona'e qapaayye,

¹¹ aappaaysho ka juppowwosen oppa takka nefo in kooniniiyyi, innaadi ka wa irroota qara killoota' qalene' damaneeyye ka iskatteeta a nama pila olli mukaneeyye,

¹² ka teekolaya isho rakkatampaya miiniiyyi ka pora orra sarriiyyi ka wa a nama isha' qapsiisade oorinni in kinniniiyi ka killowwa' sakatanniiyyi ka wa nyale pora kooniiyyi,

¹³ ka daltan kaajaadi leqeessiniiyyi taaki kamma kaaja kutta' teyyanniiyyi, hela namoose icaattaan kallaada? Ha isha dukaatanne ishshama! Diikaadi ka isha qaraaw fadama.

¹⁴ Namoose oton inna a diirta'e qapaayye, innaadi ka juppowwa a aappaaysho kode' piisa akkaneeyye ka akka aappaayshoti mina in kooniniiyyi,

¹⁵ ka wa irroota qara killoota' qalame in damminiiyyi ka killowwa a samayta Isira'eeliti in sakatanniniiyyi ka iskatteeta a nama pila olli in mukniniiyyi

¹⁶ ka nama takka nefo in miiddininiiyyi ka leqa kapa we' teyyanni in kinniniiyi ka orra sarri in kinniniiyi ka a doxe daminnaaneeyye ka a lulle anno uwwinnaaneeyye

¹⁷ ka dapa kapa sekaanniiyyi ka kaajaadi daltan leqeessini in kinniniiyi ka kamma we' takkan nefo teyyanni in kinniniiyi ka seeriyyo tooytanniiyyi ka taantetiyyon kallaaniiyyi, namoose a dukaatati'i caattaanne kallaada diisheey ishin dapayta a aappaayshoti' minan in to'o.

¹⁸ Aappaaysho' xoori' qoota innaasso sassapade ka innaasso a piitaayshoti' sare ka samaytaadippa wa a neeqa kode malla, ishin dapaytaadinni to'a.

¹⁹ Ma xoori ishina ikkiinittane, ‘Inna maana'e juppoota a aappaayshoti malla qatta'ammi in kinnin?’ Oto inna wa likkeetoppa ca ka dukaata kodde' kodeneeyye ka taantetiyyo piisa qanqannissa tooytadeneeyye, a dukaatati'i caattaan kallaadan.

²⁰ Nama a juppoota koono isha to'a diisheey inna juppoota a aappaayshoti minan in qatta'aman; umma aappa juppoota innaadi minan in qatta'amo; hanqeellitta hanqeetaadinni tooktaadi akkada; juppoolayta ka juppootaadi minan tooktaadi akkadaaw.

²¹ Ma xoori juppoolayta oto juppootaadi a kode piisa kamma oora ka taantetiyyon kallaanniiyyi ka wa likkeetoppa ca ka dukaata kodde' kooniiyyi, a dukaatati' caattanne kallaada diisheey in to'o.

²² Nama a ishin dapayta kode ishin dapaytaadi a kode takka nefo isha qara in dikamo, hanqeetaadi a kode minanne a dukaatati caattan kallaada.

²³ Hela anti toota juppoolaytatin in xasoonni? Hela kadi kodaadi kamma oorra ka caattaan kallaannaayye an xasoonni an co? Ana Waaqase' piisa qara qapo asse kiini.

²⁴ Ma xoori hanqeellitta nama kadi hanqeetaadi kamma alle' tiitaawaayye ka juppoota kodaayye ka nyalaasene a juppoolaya koonaane' kodaayye, hela icaattaan kallaada? Kodaddasene' xaadi a hanqeelluma a kode takkan nefo isha'en dikaman; amanuma diissataadi ka juppootaadi a kode minanne a dukaatati'i to'a.

²⁵ Ma xoori ishina ikiinittane, ‘Saanta Poqalla in qajeelle; ishina samayta Isira'eelitiiyyi dakkaysada! Hela saantiyyo in qajeellini?’ Sekapaayye a in qajeellin saantaayshinanne?

²⁶ Hanqeellitta nama oto hanqeetaadi kamma alle' tiitaawo ka juppoota kodooyye, juppootaadi minanne to'a; umma juppootaadi a kode minan caattanne in kallaado.

²⁷ Juppoolayta xoori oto kodaadi a neeqa kamma alle' tiitaawooyye ka wa likkeeta kodde ka qajeele' koonooyye, issinni pahani.

²⁸ Qoota ishin dapayta a kode upnaade ka qara tiitaawe malla a dukaatati icaada diisheey in to'o.

²⁹ Ma xoori samayta Isira'eeli ikiini, ‘Saanta Poqalla in qajeelle.’ Ishina samayta Isira'eelitiiyyi, hela saantiyyo in qajeellini? Sekapaayye a in qajeellin saantaayshinanne?

³⁰ Waaqase' piisa qara qapo ikiini, ‘Ishina samayta Isira'eelitiiyyi, anti akka kodaayshina kapa'en ishin takka takka qara' farataay, juppootaayshin oppa oora! Ka akka' juppootaayshinan a pirammini'i, juppootayshin piisa oppa tiitaawa!

³¹ Ishin dapayta a' kooten piisa alle isi qaraayye kata ka karitta haaraya isho hapura haaraya issi' qapnaada; ishina samayta Isira'eelitiiyyi, kaata maana'e' pirammittan?’

³² Nama takka nefo akka to'o an heenooy, anopa tiitaawa ka caattaan kallaada! Ana Waaqase' piisa qara qapo asse kiini!”