Xuuma Hisqeeli 17 - Mataafa Qulqulloota

Pahana kawwaarayta isho a dishma wayneeta

¹ Qaaleta Waaqa ka anopa deete ka kiini,

² “Atti to'ampayta namatiiyyi, hiippa hippe ka samayta Isira'eeliti' pahanaan haasawado.

³ Ka kide, ‘Waaqase' piisa qara qapo ikiini, kawwaarayta a kutta a xoolla kukutta ka paalla deddera' qapo ka soola immakaade ka purpurraysa irroota Lipaanoosi opa de'e ka kuuta pirpirta' qape.

⁴ Ka qara dankatta mitte ka piita nakata opan aane ka katama nakkaatewwa oppa' dishe.

⁵ Ka sekkammaayye piitase oppa xotta qeede ka kappatayteeta piita oppa'e akka hilteeta mina'e pisha kuttaya kapa' dishe.

⁶ Ikka deehte ka wayneeta a piitan desa saarritto koddite; taammaadi ka qinda kawwaarayta opa tiitaawen; hittinnaadi xoori porase a oppa' deehte oppa'ew tawen. Semmalla ikka wayneeta koddite ka taamma deehsatte ka danka sooksatte.

⁷ Kawwaarayta pila a kutta a xoolla kukutta' qapo ka solaan immakaade ka caaw. Tin wayneese ka akka kawwaarayse' pisha isheetta kelopa iksho'e, pora oppa' dishamteeyye desa hittinaadi qindaadipa katatte ka taammaadi qindaadipa jifsatte.

⁸ Akka wayneeta paxaara' koddito ka taamma jifsatto ka dalta dalto'e, kappatayteeta piita oppa'e pisha kuttaya kapa' dishamte.”

⁹ Ka ishootta' kide, “Waaqase' piisa qara qapo ikiini, ‘Dishmoose hela iqapada? Akka koko'e haashshaadi a fujuqna ka ruqane'e, hela kawwaarayse a paayyota koottaan alle isheetta in shukko? Ka quda daltaadi in quuro? Isheetta koottaan shukka'e harka kokkoka taaki orra a leka faani in kitto.

¹⁰ Tin idishamteey, hela iqapatta? Oto puppeeta a qinda piirtota isheetta qara' deetooyye, hela alle'en ruqto ka pora oppa' dishamteppa'en kokto?’”

Fura a pahanaddooseneti

¹¹ Qaaleta Waaqa ka anopa deete ka kiini,

¹² “Amma tiyyoolayoosen a samaytati' kide, ‘Hela wossen maana akkima kodden a'uptane?’ Ishootta' kide, ‘Tin nuqusa Paapilooni'i Yursaalamipa de'e ka nuqusaadi isho kutkuttowwaadi pooje ka katama Paapilooni opan kale.

¹³ Ka sanynyeeta nuqusa oppa takka qeede ka olli kodayteeta kodade ka isha xaxacciise ka saarra piitooseti' pooje.

¹⁴ Sede nefo akka mankisteetase' jeerto ka opeela in kiinini'i ka kallaatta'e ka kodayteetaadiiw tooytatto malla.

¹⁵ Nuqusa Yihuta' xoori tiyya'e nuqusa Paapilooni' qara' xa'e ka akka fartada isho xela oranna a kutta isha' daashane'e, piita Kipsi opa saarraadi erkade; ma hela kuli i'olkela ishi' teyta? Hela nama wa asse paha' kodo iqitaateta kela paha? Hela nama a kodayteeta alle' poote iqitaateta kela pahani?

¹⁶ Anti Waaqase piisa qara qapo in kiini, Caattampayta koddeetiyyonnen xaxanni! Nuqusa a Yihuta piitase a Paapilooni a oppaayye nuqusase isha nuqusumshe kaloppa'e, dukaatanne eeyye' to'a; maana malla xaxasene a nuqusa Paapilooni'i puyadeey ka kodayteetaadi nefo pooteey.

¹⁷ Samayta lekayta lessaata'e katamaasso qudopa piita tuulan ka kapa' mishshikeeta kodeneey. Feri'ooni xelaadi a oranna a kokokkoka isho orraadi a oranna a lekanne orannaappa isha qaarqaara in ettansho.

¹⁸ Tin a olli' kalen kammaayye, ete xaxaadi puyade ka kodayteetaadi poote ka sene piisa kodeeyye, qitaateta kela in paho.”

¹⁹ Semmalla Waaqase' piisa qara qapo ikiini, “Caattampayta koddeetiyyonnen xaxanni! Isha xaxasene a maxxiyyon xaxade'e puyade ka kodayteetiyyo pooteey, dukaatannen kodaadi kapa isha qatta'a.

²⁰ Anti turuuriyyon isha tura' qaasa ikka oppa' qapama; anka Paapiloonipa isha qeeda ka qoota ana marmade malla eyye isha qara' farata.

²¹ Xelaadi a oranna oppa mattiyya ka orannaappa' piraman; a peella hase ka qindadda piisandesa pasan; a sede piisa haasaawade akka ana Waaqa koddite akka upnaatta.”

Kippeeta a Waaqa daashe

²² Waaqase' piisa qara qapo ikiini, “Pirpirta a dera' qaraayye ana mattiyyo danka qeeda ka disha; ka kuutaadi qara dankaadippa a murja kodde takka qepsha; ka irroota a derati kuuta qara' disha.

²³ Akka taamma jifsado ka pirpirta a paxaara koddo ka dalta dalo'e, anti irroota Isira'eeli a dera' qara'en isha disha; xampira piisa ka isha kela' kaattillaysadan; xampira ika piisa ka kaatta taammaadi kara saatta saattaadan.

²⁴ Qora a kappinoppa ca' piisa ka akkan anti Waaqa kodde upnaadan; anti qoyra a deran shukkini, ka a shakka deranni; ka a ilaawa kokinni, ka a koke ilaawnaanni; anti Waaqa ka sede haasawade ka koda.’”