Xuuma Hisqeeli 16 - Mataafa Qulqulloota

Yursaalamise amanteeta dapte

¹ Qaaleta Waaqa ka ana kapopa deete ka kiini,

² “Atti to'ampayta namatiiyyi, Yursaalami'i kodaddoosen xaadi jippame upnayshe;

³ ka kide, Waaqase' piisa qara qapo Yursaalami' kiini, ‘Sanynyeetaayti ka dalattaayti piita Kene'aani kara; aappaayshin Amooritta, aayyaassin Hiittitteeta.

⁴ Kuyyaata a' dalatteeyye, opani ke quda kusumta in murre; umma opani pishaan ke quda in jaqqine; umma opani sookittan ke quda in shoohne; umma japara nefo opani ke quda'en qapne.

⁵ Awta' dalatteeyye ijippamte ka lakoppa' katamte diisheey a ke suraysade ka ke' nyarrahe ka seneppa we takkan ke' kode in co.

⁶ Eten ke kapan tarpinooyye anka ke a diikaaytippa kankalaannitto akke ka ke kide, ‘Caado!’ Aa ke a diikaayti kara kitto'en kide, ‘Caado!’

⁷ Akkima dishma duloppa' mina'en ke qohe; akka kuttatte ka deraatte, ka xarjaallitteeta enenta a xayya qapto koddite ka amadda dehesatte ka saalayti qara' nyirfa dehesatte; ma xoori lulle' kitta.

⁸ Eten a lammattati ke kapan tarpinooyye ka ke tooyyadeeyye, akka' hemitta kayten akke ka ohaatiyyo ke quda uwwishe ka lulle kinnaattaayti qara deke ka ke olli kodeeta kodade ka ke' xaxade ka ke heme; atti ka xayyo koddite. Ana Waaqase' piisa qara qapo asse kiini.

⁹ Anka pishaan ke quda jaqqe ka diikase ke quda tawshe ka daatan ke daate;

¹⁰ ka uwwa a ruftan dawame ke kamma' hidde ka xopa a paxaara ke' kalshe ka kukubba a paxaara ke qara hidde ka qeppa a heraan kokkoka ke qara' uwwishe.

¹¹ Ka siraan ke quda sire ka haraka mina ke jira hidde ka xolma kela ke yaateta kalshe.

¹² ka napahatoppa ke kolba kode ka sira paxaara ke qara' kalshe.

¹³ Atti ka sira warqeeta isho a dakara pirreeta' siratte ka shaasheta paxaara ka ohaata a heraan kokkoka isho a ruftan pujamte uwwisatte ka daamma paxaara ka takma isho daata damte ka akata xarjaallumte ka nuqusitteeta kodda kayte.

¹⁴ Ulfeeniyyo an ke' daashe minan qoota akata xarjaallitteeta koddite malla, kurraayti ka mankistewwaappa' dakaade. Ana Waaqase' piisa qara qapo asse kiini.

¹⁵ Atti' xoori xarjaallumaatti' kippatte ka kurraayti a dakaade minan sharmuutumte ka nama a ke kapan tarpe piisa kela' mukkite ka isi kasaarisse; xarjaallumasene' xaayti ka xaaysho' kodden.

¹⁶ Ka mehaddaatti a' kalsannitta oppa demo qeette ka porraatti a sakatatta qudan siratte ka kela' sharmuutumte; wa asse paha apari in koddine umma itturopa in koddan.

¹⁷ Ka warqeetiyyo isho dakariyyo a pirreeta an ke' daashe sirasene' xaayti a xarjaalluma oppaayye qeette ka pahana a diira' tumatte ka ishootta' sakatattaan kela' sharmuutumte.

¹⁸ Ka ohawwasene' xaayti pujaan sirene' qeette ka ishootta quda uwwisse ka sayteetiyyo isho tankartiyyo ishootta' kalisoota kalisse.

¹⁹ Akka damtaayti' koddane'e, daammase paxaara ka sayteetase isho takmase an ke' daashe' qeette ka kalisoota alaawnitto ka ishootta xasannitto' koote ka ishootta' dehasse. Ana Waaqase' piisa qara qapo asse kiini.

²⁰ Ka hellaasene a diira isho a tuparra a ana' xaayte qeetteew ka akka damane pahanaddaseneti kalisoota' qalte; hela sharmuutumase' xaayti ke' qajeewwe?

²¹ Akka hellaayyo qalteew ka killannaseneti kalissoota' kalisse?

²² Umma kodaddoosen xaayti jippame isho dahalsattaaytin etasene' xaayti a innuma a oppaayye lulle kitto ka dikaaytippa kankalaannitto matte a' oorsanne.”

Yursaalami akka sharmuutuman qootisamte

²³ Anti Waaqase' piisa qara qapo in kiini, “Oo ke kido! Oo ke kido! Ukkuttumoose' xaayti piisa kammaayye,

²⁴ akka killanna' sakatatto'e paapahadda katamadda piisa oppa'e' piita ollopa tuulatte;

²⁵ ka porra kukutta' piisa kapa'e, porra a ela kide a sakatatta' kodatte ka nama ke kapan tarpino piisa kela' loqqaatti pante ka akata sharmuutumaayti koopisse.

²⁶ Kantiyyasene' xaayti a Kipsi a dawraasso kela kukutti kela, akka sharmuutumte ka ana kara' miira xa'issa'e sharmuutuma koopisse.

²⁷ Tin seminan anka harkiyyo ke qaropa xaashe ka piitaayti quda lamayteeta alle mayshe ka iskattase a Filisteemi nyaapaayti kodde ka qalpeese xaayti a paalakuma qara tammaqno turopa ke tuukke ka akka wa heenane ke qara' kodane' daashe.

²⁸ Qoota' sharmuutuma a' pakni a kinnin malla, Asoorata kuli olli' sharmuutumte umma a' pakne.

²⁹ Ka piitase a Paapilooni paata nakatannitto kela' dahalsatta koopisse umma ishootta nefo kela a' pakne.”

³⁰ Waaqase' piisa qara qapo ikiini, “Qoota kodaddasene a sharmuutuma a iskatteeta fuura dapte piisa koote malla, oo atta ana aarisse!

³¹ Ete porra kukutta piisa kapa tikkaatti a killanna a kara tula qara sakatannaane' kodatteeyye, qoota kaaja a' teyyanni a kinnin malla, sharmuutta iskatta a' pahanaanne?

³² Atti dahalmayteeta iskatteeta a diirtaadi alle' diisse ka xaykitta olli dahalsannitto.

³³ Sharmuutta iskatta piisa diira qara kaaja teyyanni; atti' xoori a olli sharmuutumitta' piisa'e kaaja daanni ka akka qinda piisa desa keepa de'ane'e, daassawwaasene an ke' daashe ishootta' nooddota' daanni.

³⁴ Atti sharmuutumaayti, sharmuutuma iskatta pila kapa ipursammi; ke olli mukitta'e, diirta kaajaan ke naappanni in co; ke diira' kaaja daani diisheey diira ke' kaaja daanni in caan; semmalla atti seden a' pilayteeta.”

Akka Waaqa Yursaalami qara' farate

³⁵ Atti' sharmuuto! qaaleta Waaqa' dakaye!

³⁶ Anti Waaqase' piisa qara qapo in kiini, Qoota sharmuuta koddite ka jaalala urqinnitto, saalaayti ka awta piisa qoyyanno malla, diira a' jaalannitta isho killannasene' xaayti jippame piisa kela'e' saalaayti panni ka killannosen xaayti ulfeessa'e, hellaatti ishootta' qalli. Anti asseewwen ke qatta'a ka ke ishsha.

³⁷ Tin anti diirasene ke olli mukna a ishin xasoonnitta isho a' needdannitta piisan qindada piisaayye desa ke qaropa hala ka akka saalaayti akkane'e, ishootta tura'e ke kammeela uwwa qapa.

³⁸ Ka firteeta iskatta a dahalsanno isho a orra lenno qara' faratammitto ke qara' farata ka aariyyo isho yootiyyon ke ishsha.

³⁹ Ishootta turopan ke tuukka; ishootta ka tikkaatti a killoota a tula qara ca, isho porraatti a sakatatta a kunkunnawwa qara ca alle' pootan ka mehaddaatti a' kalsannitta ke quda sooksadan ka siraayti a paxaara ke quda saradan ka lulle ke hattishan ka qulle qumqumeeyye ke diishan.

⁴⁰ Ka ke qaropa samayta xaashan ka dakaddaan ke dakkan ka koraatetan keppa quuran.

⁴¹ Ka tikkaatti kukkupan ka iskatta lekayta tura'e, firteese ke qara' faratamte dikkishan; anka sharmuutumaayti ke qara qaatisha, umma kulipaata a ke olli sharmuutumaati kaaja a' daasso.

⁴² Anti ka miiriyyo an ke qara qapo dikkisada ikka anoppa utta; yootiyyo ka ke kapa sekaatta; anka jaw kida, umma kulipaata an miirodo.

⁴³ Qoota etaatti a innuma' matte a oorsannin ka kodaddaasene' xaaytin ana miirasse malla; semmalla tin anti kodaayti mina'en firteeta ke parpaaccisnitto ke qara' daashe; ana Waaqase' piisa qara qapo asse kiini. Kodase' xaayti jippame qara'e dahalsatta a' padaawanne?”

Enenta aayyaasso'e pahata

⁴⁴ Tin nama a pahanaan haasawanno piisa pahanoosene ke kapa' haasawada ka kida, “Enenta aayyaasso'e pahata.

⁴⁵ Atti dukaatan a enenta aayyaassin; aayyaassin ka diirtaadi isho hellaadi needdatte; atti dukaatan a enenta opa tuparraassina; ishootta ka diiraasso isho hellaasso needdaden. Aayyaassin Hittitteeta, aappaayshin Amooritta.

⁴⁶ Enentaayshina a kutta Samaariya ka tuparraadi ollin keeyye qinda qutattatin kalta; enentaayshina a shakka Sottoomi ka tuparraadi ollin keeyye qinda tupattatin kalta.

⁴⁷ Atti' saantaaysho pattoppanne a anne ka nyalaasso' patta a koone, ma eta shakkaya kara' desa saantadaatti piisan a xaaysho qaran qapto' nyapalte.

⁴⁸ Caattampayta koddeetiyyonnen xaxanni! Anti Waaqase' piisa qara qapo in kiini, ‘Neequmta ke isho tuparraatti kooten, enentaayshin Sottoomi isho tuparraadi nefo asse in koone.

⁴⁹ Tin ini ishin dapayta a enentaayshin Sottoomi koote, isheetta isho tuparraadi isi peepen ka damta kuttayteeta qapan ka naala naala kallaanni; ma xoori teekolaya isho rakkatampaya qaarqaarri in caan.

⁵⁰ Ishootta orra a isi jeejjino ka fuuliyyo tura nyala koden; eten akkeeyye anka alle ishootta pashshe.

⁵¹ Samaariya juppootaayti quda paka nefo in koone; atti' xoori, a xaaysho qaran qapto'e' kodadda nyale' koote ka kodaddaatti a nyale' piisanne, akka tuparraassin hanqeellaya pahanaadane' koote.

⁵² Qoota tuparraassin a dapa in qapnini pahanasse malla, palamaayti teyyado; juppootase' xaayti a xaaysho qaran qapto nyala a koope' koote malla, ke kapaayye ishootta fayyaappa caay, atti jeere. Akka tuparraassin hanqeellaya koddene' pahanasseey, palamaayti haadado.”

Ulfeena Samaariya isho a Sottoomi akka ooro

⁵³ Anti ulfeena Sottoomi isho a tuparraadi ka ulfeena Samaariya isho a tuparraadi in oorsha ka xaayti nefo oorshaaw.

⁵⁴ Sede nefo akka palamaayti haadatto'e ka kodaayti a' koote piisa malla jeerto, ishootta ka qoota xaayti mina neequmta in koonin malla xasa oorsadan.

⁵⁵ Tuparraassin Sottoomi isho Samaariya ka hellaasso a tuparra ka akka xatta pahan qaropa tiitawan; ke isho tuparraatti kuli ka akka xatta pahan qaropa tiitawtan.

⁵⁶ Eta a isi peepnittooyye a enentaayshin Sottoomi qara a' seesni a' kitto?

⁵⁷ Sede nefo eta a oppa juppootaayshin laka'en sookniniiyyi asse koddite; amma xoori Sooriya isho tuparraadi ka Filisteemi isho tuparraadi ka a isheetta kapandesa kala ka ke puyanna piisa'e, qora qara seesa'e koddita.

⁵⁸ Dahalsattaayti isho kodaddaasene' xaayti jippame' piisa kapa'e' qatta'amta. Ana Waaqa asse kiini.”

Kodayteeta Waaqa a parapara

⁵⁹ Dukaatan Waaqase' piisa qaropa qapo ikiini, “Atti ke a xaxaayyo tuffatte ka kodayteeta pootte akka' koote kapa'en ke qatta'a.

⁶⁰ Ma xoori kodayteetase' xayyo a innume kitto an ke olli kodaden matte oorsada; ka kodayteeta para para ke olli kodada.

⁶¹ Oton anti tuparraassina a ke tura' qata ka a ke kamma' qata' qeedo ka tuparraatti' kodo ka ke' daasho atti ka teyyattooyye, saantadasene' xaayti' matte oorsatta ka ishin jeerta; ma xoori sede kadi punu kodeetiyyo an ke olli kodade kara in kinniniiyi, assen koda.

⁶² Semmalla anti kodeetiyyon ke olli ammaytisada; atti ka akkan anti Waaqa kodde upnaatta.

⁶³ Oton anti juppootaayti a' koote piisa ke' diishooyye, akka dapaayti matte oorsatto ijeerta; umma jeeraayti malla afaa appaqqisso. Ana Waaqase' piisa qara qapo asse kiini.”