Xuuma Hisqeeli 15 - Mataafa Qulqulloota

Yursaalami akka qoyra wayneeta a we' nakanni in kinnin pahato

¹ Qaaleta Waaqa ka ana kapopa deete ka kiini,

² “Atti to'ampayta namatiiyyi, qora ika lekayta ca ma, qoota qoyra kutta a wayneetati desa dikado. Maana qoyroose a wayneeta kutta qara' kayni? Maana ka taammasene shashakka a qoyrase wayneeta qara quurame qara' kayniiw?

³ We takkanen koda'e i'oppaayye qoyra teyni? Hela orra i'oppaayye rakkuma a quda' meeha rakkannaan nefo kodanni?

⁴ Tin qora'e apittoppa' xaayyini; oto qindaddaadi kupadaneeyye, otantaadi ka poornaattooyye hela iwe' nessissa?

⁵ Tin oto a issin cooyye we' nakanni in kinniniiyyi, oto apitta isha kupo ka poornayshooyye desa maana nakaysha?

⁶ Semmalla Waaqase' piisa qara qapo ikiini, ‘Qora a muroppa ca oppaayye qoyra wayneeta' qoota we' nakanni in kinnin malla, akka a apittoppa' xaayyamo kode mina'e, asseewwen orra a Yursaalami kara kalo koda.

⁷ Ka ishootta qara' fuuliyyo poornaysha; kadi punu apitta kela pahaneeyye apittaaw ishootta kupa; oton ishootta qara' fuuliyyo poornayshooyye, ishina ka akkan Waaqa kodde upnaattan.”

⁸ Waaqase' piisa qara qapo ikiini, “Qoota ana amana diishen malla piitaaysho lullen hattisha.”