Xuuma Hisqeeli 14 - Mataafa Qulqulloota

Waaqa akka killanna kodatta dawre

¹ Qimaya Isira'eeli oppa demo ka ana kapopa de'en ka fuuliyyo tura' kuti'en;

² qaaleta Waaqa ka anopa deete ka kiini,

³ “Atti to'ampayta namatiiyyi, samayse killannaasso karittaaysho kara'e qapade ka neequmtaaysho akka daka kehayta' mina ittura' xaayade ka kuli akka we takkan ana qara kaassadane'e in ishootta oowsada?

⁴ Semmalla ishootta' haasawado ka kide, ‘Waaqase' piisa qara qapo ikiini, Nama takka oto killannaadi karitta kara' qapadooyye ka neequmtaadi akka kehayta' mina ittura' xaayooyye ka qarandesa xuumampayta kapopa de'oyye, anti an Waaqa akka lekuma killowwaadi a ishin deena kapa'en malseeta isha' oorsha.

⁵ Waan malla asse koda, akkan karitta samayta Isira'eeli isasene alle ana diishe ka ana kapa killannaasso opa oore issipa tiitaysho malla.

⁶ Semmalla samayta Isira'eeliti' kide, Waaqase' piisa qara qapo ikiini, “Anopa tiitawa ka killannaassin kamma alle' oora ka kodkoddaassin a jippame kuli alle' diisha.”

⁷ Nama Isira'eelitta kodde taaki kalayta a Isira'eeli kara kalo oto ana kapa isi sekanno ka killannaadi karitta kara' qapanno ka neequmtaadi a daka kehayta mina ittura' xaayanno ka qarandesa ana qara dehaama kaassatta' xuumampayta kapopa deeno, ana Waaqa mattiyyo isha' malseeta oorsha.

⁸ Anti' fuuliyyo a miira'en namoose' qaropa oorsha ka pahana a qatta'ama isho a qara seesetati isha koda ka samaytiyyoppa alle isha maysha; ishina ka akkan anti Waaqa kodde upnaattan.

⁹ Oto xuumampayta sassapatamooyye ka qaaleta a xuuma' haasawadooyye, a xuumampayse sassapade ana Waaqa; anti harkiyyon isha qaropa xaasha ka samaytiyyo a Isira'eeli oppa alle isha pashsha.

¹⁰ Qitaateta a xuumampaytoseti isho a namoose isha kaassatta aane ka olmina' caatta; qitaatetaaysho ka ishootta qara' kayta.

¹¹ Sede nefo arepadesa akka samayta Isira'eeli saanta kamma in dapnin ka ana kapa in sekaannin ka isi in nyalinnin malla; ishootta samaytiyyo koddan; anti ka Waaqaaysho' kodda. Ana Waaqase piisa qara qapo asse kiini.”

Firteeta a opa kela paheeta in ettaninnini

¹² Qaaleta Waaqa ka ana kapopa deete ka kiini,

¹³ “Atti to'ampayta namatiiyyi, oto piita takka ana amanama diisso ka ana qara' juppoota kootooyye anka qaropa harka xaashooyye ka tura wa oppa damta teynitta murooyye ka qara' loota qeedooyye ka oppaayye nama ka horeeta pirooyye;

¹⁴ anti Waaqase piisa qara qapo in kiini, ‘Kadi punu namoose sessa, Noohi ka Taaneeli isho Iyyoopi; ishoottoppa caaneeyye, hanqeellumaassotinni issi pattanne pahan.’

¹⁵ Oton piisse oppopa pinaana a neeqa' diishooyye ikka oppa orra piraneeyye, pinaanasene, minan nama ka oppan tarpa malaalo ikka lulle hastooyye,

¹⁶ anti Waaqase' piisa qara qapo in kiini, ‘Caattampayta koddeetiyyonnen xaxanni! Kadi punu namoose sessa ishootta kara caayye, issi pattanne pahan diisheey, hellaasso a diira taaki a tuparraatini in pahan; piitoose ka lulle hasta.’

¹⁷ Taaki oton piitoose' qara oranna qeedooyye ka kido, ‘Piisse a torpamtooyye, anka karaayye nama ka horeeta pirooyye,

¹⁸ anti Waaqase' piisa qara qapo in kiini, ‘Caattampayta koddeetiyyonnen xaxanni! Kadi punu namoose sessa ishootta kara caayye, issinni pahan diisheey hellaasso a diira taaki a tuparraatin in pahan.’

¹⁹ Taaki oton piisse oppopa paaqa orra pirro erkooyye ka isheetta kara nama ka horeeta pireetan miiriyyo akkishooyye,

²⁰ anti Waaqase' piisa qara qapo in kiini, ‘Caattampayta koddeetiyyonnen xaxanni! Kadi punu Noohi ka Taaneeli isho Iyyoopi ishootta kara caaneeyye, hanqeellumaassotinni issin pahan diisheey hellaasso a diira taaki a tuparraatin in pahan.’

²¹ Maana malla Waaqase' piisa qara qapo ikiini, ‘Ishootta karaayye nama ka horeeta pira'e, oton erkannawwosen' xayyo akata neeqa afuri, orana ka loota ka pinaana neeqa isho paaqa orra pirro erkooyye, desa atta neeqnattaaw?

²² Ma xoori tin, hellaa a diira isho a tuparra lamaya oppa peela hasa ka ishin kapopa de'a; ishina oto ishootta akkitaneeyye, a atta kitto akkima' juppoolaya koddene upnaattan; umma anti Waaqa neequmtose an Yursaalami qara' qeede malla a kuttati a' nyarrahatan.’

²³ Anti Waaqase' piisa qara qapo in kiini, ‘Oto kallaataaysho ka kodaaysho akkitaneeyye a' nyarrahatan ka waan ishootta kara' kode piisa akkan patta'e an koonin upnaattan.’”