Xuuma Hisqeeli 13 - Mataafa Qulqulloota

Akka xuumampaya darada' jiijamen

¹ Qaaleta Waaqa ka anopa deete ka kiini,

² “Atti to'ampayta namatiiyyi, xuumampayasene a Isira'eeli iskareela qeenna ka xuuma haasawanna qara' xuuma haasawado ka ishootta' kide, ‘Qaaleta Waaqa' dakaya!’

³ Waaqase' piisa qara qapo ikiini, ‘Eepposin a xuumampaya a ana kapa we in akkinnin mali dikatta a mattaayshoti kamma anna, oo ishootta kidoo!

⁴ Atti Isira'eeli! Ha xuumampayaatti ka'ala a katamadda a qitqite kara kala mina.

⁵ Kuyyaata oranna Waaqatiiyyi akka isqara oorissane'e, kawwattase a Isira'eeli qitqitte qaropa a anne ka oppa a oorinne ka a' dawne.

⁶ Ishootta keleshaata darta isho suuma sassapa'e akkini ka a Waaqa ishootta in erkinin mali kiini, “Waaqa asse kiini” Ka akka Waaqa qaalese xaaysho dikkisho isha qara asanni.

⁷ Sede an anti an haasawannin mali kiinittane “Waaqa asse kiini” Piisa keleshaata darta a akkini a kittane? Ka suuma sassapa a' haasawanni a' kittane?

⁸ Semmalla Waaqase' piisa qara qapo ikiini, “Qoota' darada haasawatten ka keleshaata darta akkiten malla, tin anti Waaqase' piisa qara qapo in kiini, ishin qara'en xa'a.’

⁹ Harkiyyon xuumampaya a keleshaata darta akkina ka suuma sassapa' soona qara' xaasha. Ishootta' xora samaytiyyo oppan caadan; umma maskapa samayta Isira'eeli oppa'en taafaman; umma piita Isira'eeli karopan kalan; akka sitiiyyi akkan anti Waaqase' piisa qara qapo kodde upnaadan.

¹⁰ Ishootta a nakayta in kinnin mali, ‘Nakayta ca’ kiini ka samaytiyyo sassapanni; ishootta harmoota qussa pi'a kaye quda aannatan daataanne a haarayayshe, ishootta pahannitta'e pahan.

¹¹ Sene aannatan daatinaati'i kawwasse akkima qitto ishootta' lele; roopa kuttayta roopa, shilalla apteenta ka oppa' dakkaman; puppeeta ka xaata.

¹² Oto kawwattase qittooyye, opa ishinan kaassadan ka in kidane, ata aannatase a ishin daatiten ayshaayye kitta?”

¹³ Semmalla Waaqase' piisa qara qapo ikiini, “Anti aariyyonnen puppeeta xaasha ka ishootta piisa patissa'e, miiriyyon shilalla apteenta dakka ka kullumoota roopa.

¹⁴ Kawwasse a aannatan daatiten alle'en qitqishsha ka piitan isheetta kaya; kirittaadi ka akkaada; oto qinnittooyye ishina ka kela' piramtan ka sitiiyyi akkan Waaqa kodde upnaattan.

¹⁵ Ka seeminan kawwattase isho orra kawwattase quda aannata daate qara' miiriyyo lekkisha ka ishina' kida, ‘Ha kawwattase in kitto umma orra a quda aannata daate in co.’

¹⁶ Xuumampaya a Isira'eeli a qoota Yursaalamiti desa xuuma haasawade ka a nakayta in kinnin mali keleshaata nakayta ishootta akke in caan; ana Waaqase' piisa qara qapo asse kiiniiy.”

Xuuma a iskatta xuumampaya darta kodde qara' haasawame

¹⁷ Atti to'ampayta namatiiyyi, iskattase a samaytaayti iskareela xuuma qeenno ka haasawanno opa fuulaayti tiitayshe ka ishootta qara' xuuma haasawado.

¹⁸ Ka ishootta' kide, Waaqase' piisa qara qapo ikiini, “Ishina iskatta a harka mina quraamma kodkodda hidanno ka orra qapsiissa'e kukubbadda a olqara qaqqapa a kodkodda' dawano, oo ishin kido! Hela ishina a samaytiyyo sassapatan ka qara damtan ka ishin kallaattane ishina pahata?

¹⁹ Poorta a harka kara kayni in kinnin ka laaqqota a moossota kayni in kinnin malla samaytiyyoppa maxxiyyo otaccisnittan ka samaytase' xayyo ishin kela darada dakkaysanno sassapanittan ka nama a in toonini' kiinittane, ito'a ka nama a toono' kiinittane, icaada.”

²⁰ Semmalla Waaqase' piisa qara qapo ikiini, “Tin anti quraammasene xaayshin a kodkodda a ishin a xampira' mina orriyyo qapsiisnittane qara'en xa'e ka irriyyaassin isho harkaassin quda me'a ka orrase' xayyo a xampira mina qapsiisinttan nata sooksha.

²¹ Ka kukubbaddaassin ishin qara kakkaa'a ka ishin kela samaytiyyon pahada; umma lammatta harkaayshin oppa'en pi'an; akkan Waaqa kodde akka upnaattan.

²² Maana malla hanqeellaya an anti qara' xasa an mursiisnini sassapatten ka qara xasa mursiisseneey ka juppoolaya akka issin paha'e juppootaysho oppa in oorrini saantaaysho a neeqa qara ishootta kokkonnasseneey.

²³ Semmalla arepa desa keleshaata a darada a akkitan; umma kodkodda a' kootan; anti harkaayshin oppan samaytiyyon pahada ka akkan anti Waaqa kodde akka upnaattan.”