Xuuma Hisqeeli 12 - Mataafa Qulqulloota

Hisqeeli akka samayta Yihuta kamma daanamo pahanaan akkishe

¹ Qaaleta Waaqa ka anopa deete ka kiini,

² “Atti to'ampayta namatiiyyi, falqoolayta samayta oppa' kalta; ishootta qoota falqoolaya kodden malla ilda a paatan akkinaane iqapan, umma paata akkini in caan; nappa a paatan dakaynaane iqapan umma paata dakayni in caan.

³ Atti' xoori to'ampayta namatiiyyi, mehaddaatti a ishin qahatta qapado ka a ke akkinaaneeyye nama a piitaaysho oppa piita pila opa paqno pahanaado ka anta' xa'e; kadi punu falqoolayta samayta koddeneeyye takka punu i'ishootta' kaltaay.

⁴ Ka kuyyaateeyye ildaasso oppadesa akkima nama a paqno mina'e, mehaddaatti a ishin paqnitta sooksado ka shishshipeeyye a ke akkinaaneeyye akkima orra a piita pila opa paqno mina'e, kalaakalaayye anta' xa'e.

⁵ Ka a ke akkinaaneeyye qussa tika' poote ka oppan mehaddaatti qapado ka lakopa sooke.

⁶ Ka a ke akkinaaneeyye mehaddaatti xashshitta qara' qapado ka shishshipeeyye ishin sooke; anti samayta Isira'eeliti' milikkita'en ke kodaay; akka piitoose a akkinini'i, ildaatti qara dekado.”

⁷ Anti ka akkiman ajajame qara' kode ka akkima a nama alle' paqno mina'e, kuyyaateeyye mehaddaayyo ollopa oorsade ka shishshipeeyye harkaayyon qussase a tika kara xata poote ka mehaddasene xayyo sooksade ka ildaasso oppadesa xashshitta qara' qapade.

⁸ Parraytaadi teykanteeyye qaaleta Waaqa ka anopa deete ka kiini,

⁹ “Atti to'ampayta namatiiyyi, falqoolayasene a Isira'eeli hela ke in kiine, ‘Ata maana' kooni?’

¹⁰ Ishootta kide, Waaqase' piisa qara qapo ikiini, ‘Qaalese a xuuma saarase kutta Yursaalami kara kalo isho samayta Isira'eeli a eeyye kara kalo piisa qara'e lelamte.’

¹¹ Ka ishootta' kideewwe, ‘Anti akkiman milikkitaayshin kodde mina'e ishin qara koddita; akka poojamtan ka piita pila opa daanamtan.’

¹² Saarase ishoottopa kalo shishshipeeyye mehaddaadi xashshitta qara' qapada ka sooka; akka karan sooko'e, ikka tura qussa tika' pootan. Akka piisse ildaan in akkinini'i, ikka ildaadi qara dekada.

¹³ Anti Waaqa ka isha tura turuuraayyo qaasa; ikka oppa' qapama ka piitase a Keletaata katama Paapilooni opa ishan aana; ikka a piitase ildaan in akkinnin mali eeyye' to'a.

¹⁴ Dehaamampayaadi ka tooytampayasene' xaadi isha kapa ca alle'en isha kapa qindadda piisandesa fida ka koraatetan ishootta kamma daana.

¹⁵ Ma xoori oton mankistewwaappa ishootta fidooyye ka piitaddaappa ishootta pasishooyye ikka akkan Waaqa kodde upnaadan.

¹⁶ Ma xoori mankistewwa a oppopa paqnaane karaayye, akka kodaase xaaysho jippame torrane'e ka akkan anti Waaqa kodde upnaadane'e, oranna ka loota isho paaqa a orra pirro kelaayyen ishoottoppa lamayaan paha.”

Pahana a xuumampayta fuurrooti

¹⁷ Qaaleta Waaqa ka anopa deete ka ana' kiini,

¹⁸ “Atti to'ampayta namatiiyyi, tammaqta ka xareetan damtaayti dame ka fuura ka xareetan pishaatti ike.

¹⁹ Ka samayta piissetiti' kide, piita Isira'eeli karaayye qoota samayta katama Yursaalami kara kalo desa Waaqase piisa qara qapo ikiini, Karpa a orra Isira'eeli kara kalo koono minanne, piitaaysho' qoota lulle hasso malla, qaapanne damtaaysho' daman ka fuuraan pishaasso ikan.

²⁰ Katamaddasene a samayta kara' kallaanna ka lulle hasan; piitase ka onta; ikka akkiman anti Waaqa kodde upnaadan.’”

Pahana jaalatame ka lela xuuma a needdatame

²¹ Qaaleta Waaqa ka anopa deete ka kiini,

²² “Atti to'ampayta namatiiyyi, qoota piita Isira'eeliti desa deymatteetase a' qapto kiinitto, ‘Kuyyawwa isekaaden, keleshaata ka paata patta kodde’ Maana kideeta?

²³ Semmalla ishootta' kide, ‘Waaqase' piisa qara qapo ikiini, “Deymatteese akka are qara' qa'atto'en koda umma piita Isira'eeli kara lammatta in lelamto.’ Se kapaayye a kidamto, ‘Tin eta ikayen; leloose a xuuma' piisa dikkanniiy.’

²⁴ Maana malla arepadesa keleshaata darta taaki suuma sassapa samayta Isira'eeli oppa in caadooy.

²⁵ Anti Waaqa in haasawade; qaalese an haasawade ka dikkatta; umma in jarto; ishina' falqoolayta samaytaatiiyyi, Waaqase' piisa qara qapo ikiini, ‘Qaaleta an haasawado sapanaayshin oppa'en dikkisha.’”

²⁶ Qaaleta Waaqa ka anopa deeta ka kiini,

²⁷ “Atti to'ampayta namatiiyyi, tin samayta Isira'eeli ikiini, ‘Keleshaata namoose a akkino parra lekaya kamma dikkada ka xuuma a isha amma haasawannoow, sapanna seka kamma dikkada.’

²⁸ Semmalla ishootta' kide, ‘Anti Waaqase' piisa qara qapo in kiini, qaaletan anti Waaqase' piisa qara qapo haasawade piisa dikkada diisheey, arepadesa qaalewwaayyo oppa takka nefo in jarto.’”