Xuuma Hisqeeli 11 - Mataafa Qulqulloota

Firteeta a ukkuttowwa saarra qara' daasamte

¹ Hapura ka opeela ana xaashe ka xarrase tika Waaqatiiyyi qinda piirtotatin qato ka fuulaadi qinda piirtotatin desa oorshepa ana qeede; kullaysuma xarra oppaayye nama kunda lakki keni ca. Anka ishoottoppaayye saarra samayta Asaaniya inna Asuuri isho Felaatiya inna Pannayya akke.

² Waaqa ka ana' kide, “Atti to'ampayta namatiiyyi, orroose are co, ishootta katama kara neequmta sulli ka falqa dehaammi.

³ Ka kiini, ‘Ini eta oppa tikka qupnaane'enne? Katamoosen okta mina, ino ka akka so'a okta kara' juutame' mina' kara' pahanne.’

⁴ Semmalla to'ampayta namatiiyyi, ishootta qara' xuuma haasawado.”

⁵ Hapura Waaqa ka ana qara' lekkade ka ana' kide, “Haasawado ka kide, ‘Waaqa ikiini, “Ishina' samayta Isira'eelitiiyyi, asse' haasawannittan ma anti wa' dikattene in upa.

⁶ Katamoosen kara'e orra lekayta' lessen, ka porraadi pukkadaan immakten.’

⁷ Semmalla anti Waaqase piisa qara qapo in kiini, ‘Ha katamoosen oktase kara paata juunnaan mina; ma xoori, a oktase kara' pahe sene allessene ka katamoosen kara dakkitene; semmalla ishinan katamoosen kara alle' tawsha.

⁸ Ishina oranna' fuurrittan; ma orannaan ishin qara' qeeda! Anti Waaqase' piisa qara qapo assen kiini.

⁹ Ka katamoosen kara alle ishin sooksha ka hapta turopa ishin tuukka ka firteetiyyo ishin qara' daasha.

¹⁰ Orannaanne' piramtan; anka xeela Isira'eeli oppa ishin qara' farata; akka sitiiyyi akkan Waaqa kodde upnaattan.

¹¹ Katamoosen ishina'e okta a kara' pahatan in koddan; umma ishina ishootta kara'e so'a a' kodditan; anka xeela Isira'eeli oppa ishin qara' farata.

¹² Akkan Waaqa kodde akka upnaattan. Maana malla ishina taantetiyyo alle' diissen ka taanteta a mankistewwa a ishin kapandesa kalaatin kallaatten diisheey seeriyyo a' tooytanne; umma taantetiyyo a ajajamme.’

¹³ Eten xuuma haasawannooyye, Felaatiya inna Pannayya ka to'e; anka piitopa pi'e ka fuula piitan kaye ka nessa kuttan ullupe ka kide, “Oo Waaqa ke piisa qaropa qapo! Hela peela a Isira'eeli' piisa' pirta?”

Kippeeta a Waaqa Isira'eeleta poojamte' daashe

¹⁴ Qaaleta Waaqa ka ana kapopa deete ka ana' kiite,

¹⁵ “Atti to'ampayta namatiiyyi, ha orra Yursaalami kara kalo qoota daltaytayshina isho qoota samaytase a Isira'eeli a ollin poojamtineti desa ikiini, ‘Ha ishootta Waaqa kapa sekaaden; piisse ka lehna ino' daasamte.’”

¹⁶ Semmalla atti ishootta' kide, “Waaqase' piisa qara qapo ikiini, ‘Kadin punu mankistewwaappopa alle ishootta xaasheeyye ka piitaddaappopa alle ishootta pasishe nefooyye, piitadda oppopa paqene oppaayye etaaddesa ishootta ollin caada ikka ana' sakatadan.’”

¹⁷ Semmalla ishootta' kide, “Waaqase' piisa qara qapo ikiini, ‘Anti samaytoppaayyen ollopa ishin oorsha ka piitadda oppa' pastene oppa ollopa ishin tiitaysha ka piita Isira'eeli ishina' daasha.’

¹⁸ Oto eeyyepa ooraneeyye ishootta ka isheetta karaayye killannasene' xaadi jippame isho nyalaadi a koonitta' piisa alle' pashshan.

¹⁹ Karitta haarayan ishootta' daasha ka hapura haaraya ishootta kara' xaaya ka karisse daka kodde ishootta kara maysha ka karitta ana ajajammo ishootta' daasha.

²⁰ Ishootta ka taantetiyyon kallaadan ka seeriyyo' ajajaman ka samaytiyyo koddan; anti ka Waaqaaysho kodda.

²¹ Ma xoori sene a karittaaysho killannasene xaaysho jippame ka kodaddasene xaaysho nyale kamma anno'e, Waaqase' piisa qara qapo ikiini, ‘Akka kodaayshoti mina'en ishootta qatta'a.’

Akka ulfeena Waaqa Yursaalami kara tawe

²² Sekkamma kirupeelewwa ka xoollaasso pappaldishen; kanaannawwaasso ka ishootta kapa caan; ulfeena a Waaqa Isira'eeliti ka ishootta qara xata ca.

²³ Ulfeenase a Waaqa ka otanta katamaseneti kara alle xa'e ka katamasenetiiyyi qinda piirtotatin irroota qara' qa'ade.

²⁴ Hapura Waaqa ka opeela ana xaashe ka keleshaatase a ana' daashenne, orrase' poojame kapopa piita Paapilooni opa anan aane; sekkammaayye keleshaatase an akke ka ana qara alle' tawe.

²⁵ Anti ka wa Waaqa ana akkishe piisa orrase' poojame torre.