Xuuma Hisqeeli 10 - Mataafa Qulqulloota

Akka ulfeena Waaqa tika qulqulloota kara tawe

¹ Anka tooyyade ka wa qara palda ka matta kirupeelewwa' qareela ca qareelaaw wa sufaana paha ka dakase moonta paho ka heraan kokkoka senpeeri kidammo oppa kodame akke.

² Waaqa ka namase meeha a qaaha kalsade ajaje ka kide, “Kanaannawwasene kirupeelewwa kela ca otantoppopa kulle ka kirupeelewwa otantoppaayye porooda hammaara immakkoota qeede ka katamoosen qara' fide!” An akkinooyye namaase ka kulle.

³ Ete namase' kulleeyye, kirupeelewwa tikase a qulqulloota kela qinda tupattatinni qa'aden; urratta ka paapahase a karan co immake.

⁴ Ulfeena Waaqa ka kirupeelewwasene' qareela xa'e ka xarra tika qulqulloota opa aane; tikase a qulqulloota ka urrattan immakaatte. Paapahase ka la'ayta ulfeena Waaqatin immakaade.

⁵ Nessa a xoolla kirupeelewwa ka oto Waaqase we' piisa ettaninno haasawannooyye akka nessaadi dakaanno mina'e, haka paapahase a laka tulati' dakaade.

⁶ Ete Waaqa namase mehadda qaaha kalsade ajaje ka kide, “Kanaannawwasene kirupeelewwa kela caatiiyyi otantoppaayye apitta qeedeeyye” Namase ka aane ka kanaannawwasene oppa takka kapa' qa'ade;

⁷ kirupeelewwasene oppa takka ka apittase otantaaysho oppa co opa harkaadi derayshe ka poroodase' qudaayye shakkayta qeede ka harka a namase meeha a qaaha kalsade oppa' xaaye; isha ka qeede ka sooke.

⁸ Xoolla kirupeelewwaseneti kelaxata wa harka nama' paha ka akkaanni.

⁹ Anka tooyyade ka kanaannawwa afuri kirupeelewwasene kapa akke; kirupeelewwosene matta mina'e kanaannawwa takka takka iskapa qapan; pahana a kanaannawwoseneti' nefo a kaawwata' mina'e warwarri.

¹⁰ Kanaannawwasene afuri piisa olliiw pappahan ka a takka takka kara sookte pahan.

¹¹ Kanaannawwasene oto annaaneeyye a in tiitaawnin mali qindadda piisan desa anni; kanaannawwa a qindaddaan ca isho a qinda kammatin ca, oto annaaneeyye qinda opa annaane opa tiitaawni in caan.

¹² Dakinta kirupeelewwaseneti' piisa, tultaaysho ka harkaasso ka xoollaasso isho kanaannawwa a ishootta afuri qapan piisa ka ildaan immakaaden.

¹³ An dakaynooyye kanaannawwasene ka kanaannawwa tiitaawna kidamen ka halaamen.

¹⁴ Kirupeelewwasene ka matta mina'e, fuula afuri afuri qapan; fuula paayyota fuula xorma, a lammatta fuula nama, a sessatta fuula karma, a afratta fuula kawwaarayta.

¹⁵ Kirupeelewwasene opeela xa'en, ishootta' nefo uumatase caatta qapo an kaba Kepaari kapa akke.

¹⁶ Oto kirupeelewwasene annaaneeyye kanaannawwasene ishootta kapa ca i'anni; oto kirupeelewwa piita qara opeela xaana' xoollaasso' pappaldinnaaneeyye, kanaannawwasene ishootta kapa ca qinda pilaatin desa tiitaawni in caan.

¹⁷ Oto kirupeelewwasene qa'annaaneeyye ishootta olliiw qa'anni; oto kirupeelewwa xa'annaaneeyye, ishootta olliiw xaani; maana malla kanaannawwa ukkumeeta a uumatose' caatta qapooti' kela caaneey.

¹⁸ Sekkammaayye ulfeena Waaqa ka xarra tika qulqulloota kapaayye xa'e ka kirupeelewwasene qaraxata qa'ade.

¹⁹ Kirupeelewwasene ka an anti ishootta akkinnooyye xoollaasso pappaldishen ka piita qareela xa'en; kanaannawwasene ka ishootta olliiw tawen ka tika Waaqatiyyi kullaysuma xarra a qinda piirtota oppa qa'aden. Ulfeena Waaqa a Isira'eeli ka ishootta qaraxata ca.

²⁰ Ishootta' nefo uumatase' caatta qapo an kaba Kepaari kapa Waaqase a Isira'eeli kela xata akke. Akka kirupeelewwa kodden anka upnaade.

²¹ Ishootta matta mina'e fuula afuri afuri qapan ka xoolla afuri afuri qapan ka xoollaasso kela xata wa harka nama' paha' qapan.

²² Fuulaaysho nefo fuulladasene an kaba Kepaari kapa akke'e pappahan; ka matta mina'e, jib kiini ka itturandesa anni.