Xuuma Hisqeeli 1 - Mataafa Qulqulloota

Keleshaata a Hisqeeli paayyota akke Hisqeeli akka keleshaatoppan sufaana Waaqa akke

¹ Para kunda sessatta oppa leya afrattati ka leyoose oppa kuyyaata kenattatiiyyi an kaba Kepaari kapaayye orrase poojameppa cooyye, moontada paname anka keleshaatoppan Waaqa akke.

² A nuqusase Ikkoniyaani' poojameeyye para kenatta ka kuyyaata kenatta.

³ An piita Paapilooniti kaba Kepaari kapa cooyye, qaaleta Waaqa ka ana qeesittase Hisqeeli inna Puusi' deete; hupna Waaqa ka ana qara caade.

⁴ Anka tooyyade ka puppeeta a qinda qutattati xata xaanitto akke; la'ayta ka urratta a kutta a hankaano kapa tiitayshe ka puppeetase olliiyyi deeni. Apitta a olkamma mittammi in kinnin ka oppa qinni; otanta apittaseti' karaayye wa a sipla pale paha ka akkaani.

⁵ Puppeetase karaayye uumatadda a caatta qapa afuri ka akkaaden; pahanaasso nefo pissa nama'e qapan.

⁶ Ma xoori, ishootta matta mina'e fuula afuri afuri qapan ka matta mina'e xoolla afuri afuri qapan.

⁷ Loqqaasso nefo jibi kiden; kamajaasso kamaja a innayya sa'e pahan ka a sipla a quda shohen mina oyni.

⁸ Xoollasene' xaaysho qindaddaasso afurin ca kela xata, harka a nama'e qapan. Fuula isho xoolla a uumatoose afuri tooy sede.

⁹ Xoolla uumata takkati' xoolla uumata pilaati quda kayni; ishootta ka matta mina itturan desa anni umma oto annaaneeyye iskamman desa tiitawni in caan.

¹⁰ Ishootta afuri matta mina'e fuula ika afuri qapan. Fuule desa fuula nama paho qapan ka qinda akkittatin fuula karma' paho qapan ka qinda a pittittatin fuula a xorma' paho qapan ka tulte desa fuula a kawwaarayta' paho qapan.

¹¹ Fuulaaysho tooy asse paha. Xoollaasso lakki opeela pinken ka xoolla uumata pila' mina kayni. Ka xoollaasso lakkin dakintaaysho quda dekni.

¹² Ishootta matta mina'e jibi kikkiini ka itturan desa anni ka pora opa hapura anno piisa opa anni, umma oto annaaneeyye iskamman desa tiitaawni in caan.

¹³ Pahana uumatoose caatta qapoti porooda opayno ka ila a opayna'e pahan; apitta ka uumatose caatta qapo oppandesa arepa ka arepa pora anni; apittose nefo akata la'ayni; hankaada ka oppa qinni.

¹⁴ Uumatase caatta qapo ka akka hankaada a walaqlaqno mina'e arepa ka arep shoshshorri.

¹⁵ Eten uumatase caatta qapo tooynooyye, kanaannawwa piita qara'e uumatase afuri kapa takka takka qootame'en akke.

¹⁶ Pahana a kanaannawwoseneti nefo asse pahan: ishootta a kaawwata mina'e oyni; pahana a ishootta afuriti olliiw pappahan; kodamaaysho nefo akka kanannaata takka iskara a pila' qapto pahan.

¹⁷ Oto annaaneeyye qindadda afuri piisan desa anta ettaninni; umma dawalwalli in caan.

¹⁸ Kaamarra a kanaannawwoseneti idedderi ka orra fuurinni; tiitaawwaata a kaamarra a kanaannawwoseneti ka ildaan immakaaden.

¹⁹ Oto uumatose caatta qapo annooyye, kanaannawwasene ishootta kapa ca kuli anni. Oto uumatase caatta qapo piita qareela xaanooyye, kanaannawwasene kuli olliiw piita qareela xaani.

²⁰ Pora oppopa hapura anta heeno pisa oppopa anni; hapura a uumataddoosen qapan qoota kanaannawwa kara co malla, oto uumatase caatta qapo opeela xaanooyye, kanaannawwasene olliiw opeela xaani.

²¹ Qoota kanaannawwa ukkumeeta a uumatose caatta qapooti' kela caan malla, oto uumatase caatta qapo annooyye kanaannawwa olliiw anni ka oto uumatose caatta qapo qa'annaaneeyye olliiw qa'anni ka oto opeela xaananeeyye olliiw xaani.

²² Matta uumatase caatta qapo qareela wa qara palda ka orra qawwanna ka a kaawwata' mina oyna'e afame.

²³ Wossen qara palda kela xata xoolla uumatase caatta qapooti jibbi kikkiden ka olminan desa pippinken; uumataddasene caatta qapa matta mina'e xoolla a dakintaaysho qudan deknaane lakki lakki qapaneew.

²⁴ Ete annaaneeyye anka nessa xoollaassoti' dakaye, ikka nessa a malxa kuttati ka nessa a Waaqase we' piisa ettaninnooti isho nessa horayta a xela oranna' paha; oto anta qaatishaneeyye opa xata xoollaasso oorsanni.

²⁵ Ete qa'aden ka xoollaasso opa xata oorsadeneeyye, waasene qara palda mattaaysho qara caati xata nessa ka dakaade.

²⁶ Waasene qara palda mattaaysho qara ca qareelaaw wa sufaana paha ka dakase moonta paho ka heraan kokkoka Senpeeri kidammoppa kodame paha'e ca. Wossen sufaana paha' qara'e, wa nama paha ka kute'en.

²⁷ Wa surraadi paha qareela wa a sipla pale paha ka apitta paha a kapa tiitayshe'en akke; wa a surraadi paha kela xataaw wa apitta paha ka isha kapa tiitayshe ka la'ayna'en akke.

²⁸ La'ayta a kapa tiitayshe pankaallata kuyyaata roopati oraaraappa akkaannitto paha; sede nefo ka pahana ulfeena Waaqa' pahata. Eten sede akkeeyye anka piitopa pi'e ka fuula piitan kaye ka nessa a nama takka haasawanno dakaye.