Xuuma Hake 2 - Mataafa Qulqulloota

Ulfeena a tikoose a qulqulloota a amma qupamteeti

¹ Parose oppaayyeew leya a tappattati, kuyyaata kunda lakki takkattati Waaqa ka erkanaadi a lammattati'i xuumampaytase Hake qudan erke ka kide,

² “Ise' piita Yihuta' mukinno Sarupaapeeli inna Salaatiyaali ka saarase a qeesewwa Iyyaasu inna Iyyosedeqi isho orra poojama kelaayye kale kuli kaassado ka kide,

³ ‘Ishin oppaayye nama ulfeenase a xatta tikoose a qulqulloota' qapto akke ica? Amma xoori atta ishina' pahata? Ilta kela ishina' dappaawni in kitto?’”

⁴ Waaqase we' piisa ettaninno ikiini, “Amma xoori, atti Sarupapeeli, kokkonaado! Atti Iyyaasu inna Iyyosedeqi ke a saara qeesewwa' kodde, atti kuli japaado! Ishina' nefo samayteeyye anti ishin ollin caay, japaada ka kokkonnaada!

⁵ Kodayteetsase an xatta a aappadaassin piita Kipsi' kara sookeneeyye, ishin olli kodade ka kide, ‘Ishin ollin caada’ qara'e, hapuriyyo ishin olli caadaay, in fuuran.”

⁶ Waaqase we piisa ettaninno ikiini, “Eta deha oppa'en takkan oppa' oora ka piita isho moonta ka pakateeta isho pora oppa pakateeta kaynitto lellehshaaw.”

⁷ Waaqase piisa ettaninno ikiini “Mankistewwa ana amanni in kinnini alle'en karkalsha, teyantaaysho' piisa ka arepa deeta anka tikoose are kitto ulfeenan immaka.”

⁸ Waaqase piisa ettaninno ikiini “Ha dakara pirreeta isho warqewwa piita qara ca' piisa xayyoow.”

⁹ Waaqase piisa ettaninno ikiini “Ulfeena tikoose a amma, ulfeena a tikase a xatta qaranne harmo' jaala, anka eeyye kara'e samaytiyyo' nakayta daasha.”

Dehaama a xuumampaytase Hake qeesewwa' daashe

¹⁰ A Taariyoosi' nuqusumeeyye para lammatati, leya a sakalatta oppa, kuyyaata kunda lakki afrattatiiyyi, Waaqa ka erkanaadi xuumampaytase Hake kapopa erke. Hake ka kide,

¹¹ “Waaqase we piisa ettaninno ikiini, ‘Intoonno wa seera kiinaati desa qeesewwa kaassado ka kide,

¹² hela kadi nama takka so'a a kalisoota Waaqati' dehayshene' qaraayye qeeda ka ohaataadi mina sukkada kayla ohaataadi ka laaqqota taaki so'a a xarshene taaki taadeta wayneeta taaki sayteeta taaki wa dammaane' quda kayaneeyye, hela damtoose' quda kayamte iqulqullaawta?” Qeesewwa ka oorshen ka kidene, “In qulqullaawto.”

¹³ Hake ka a lammattati' kaassade ka kide, “Nama takka a pukka quda kayaan nyale, oto damtoose are kitto oppa takka quda kayooyye, hela damtoose a quda kaye inyalta?” Qeesewwa ka oorshen ka kidene, “Aa, inyalta.”

¹⁴ Hake ka oori ishootta' oorshe ka kide, “Waaqa ikiini, ‘Samayse ka sanynyewwaasso kuli fuuliyyo tura'e, wa ishootta harkassottin kodadene ka wa a kalisoota ana dehannaane' piisa, asseew nyalen.’”

Kippeeta saka a Waaqa kapa daasamte

¹⁵ Waaqa ikiini, “Amma nefo, a tikoose a qulqqulloota' qupa a paayyinin turanne, awwe desa paayya ka wa kodde' piisa oppa dikada!

¹⁶ Ha parroosen tarpeetiiyyi, nama piisa sookanni ka kiini, ‘Do'ayta dippa lakkin ferada,’ Ma xoori do'ayta dippa takkanneew kalanni ka kiiniiwwi, ‘Wayneeta xotta dippan diipada,’ Ma xoori, xotta kunda afuriiw koddini.”

¹⁷ Waaqa ikiini “Ha anti, wa ishina harkaassinan kodattene' piisan ishin tura rooma ka kunna'ata isho apteenttan alle' pashshe, umma ishina, anopa a' tiitaawne.

¹⁸ Awwe leyoose a sakalattati kuyyaata kunda lakki afratta oppaayye kiritta tika qulqulloota a Waaqa katameey, parra arepa desa ca oppaayye oori, wa koddina' tooya!

¹⁹ Kadi punu ishina amma xotta a aylattane tikoppaayye a' qapniniiyyi, qoyra wayneeta ka a hilteeta, qoyra a roomaani ka a ekerta qaraayye, dalta ka in kinniniiyyi, kuyyaase a awweti desa paayyatte, anti in ishina' saka.”

Kippeeta a Waaqa Sarupapeeli' daashe

²⁰ Leyoose oppaayyeew kuyyaata kunda lakki afrattatiiyyi, Waaqa ka erkanaadi a lammattati'i xuumampaytase Hake kapoopa erke ka kide,

²¹ “Ise' piita Yihuta' mukinno Sarupapeeli' lele ka kide, ‘Anti piita ka moontan lellehsha;

²² alka nuqussa mankistewwa'en alle karkalsha ka hupna mankistewwa samayta pila alle' pashsha ka sarakellaasso isho orra qara' kutiino ollin alle' karkalsha, fartadaasso ipiraman, orra fartada qara kulufno ka koraateta a mattaayshotin oli leysha.’”

²³ Waaqase we piisa ettaninno ikiini, “Oto orxaytiyyo Sarupaapeeli inna Salaatiyaali, akka saara koddito'e ana ke reexadeey, kuyyaase oppaayye ken qeeda ka akka maxxiyyon piisse' mukissa.”