Xuuma Hake 1 - Mataafa Qulqulloota

Ajaja Waaqa a akka tika qulqqulloota' qupamto' daassame

¹ A Taariyoosi' piita Faaresi' qara' nuqusumeeyye para lammattati, ka leya a lehatta oppa kuyaata a paayyotatiiyyi, Waaqa erkanaadi xuumampaytase Hake qudanne mukissampaytase a Yihuta Serupaapeli inna a Salaatiyaali isho Iyyaasu inna a Iyyosedeqi isase matta saara qeesewwa' koddino erke.

² Waaqase we piisa ettaninno ikiini, “Ha samaytose xayyo ikiini, ‘Ha ini etasene a oppaayye tika qulqqulloota a Waaqa' qupamto in kayne.’”

³ Waaqa xoori iHake' kide,

⁴ “Hela ini eta a oppa ishina tikka papaxxaara a' qupattane' kara' kallaattane'e? Tikiyyo a qulqqulloota a qitqitte ka nama tooyyo dapte?”

⁵ Semalla Waaqase we piisa ettaninno ikiini “Intoonno kallaata atta akka ishin qara kokkonnaatte tooyya!”

⁶ Ha ishina piita piisa' tupadesa aylaatten ma unta shakkayteetaawwe' feratten; damta iddammittan umma ishin kara kayni in kitto; ikkayta i'iknittan umma a' pakni a kittan; mehadda ikkalsannittan umma foola ishina' dakaanni in co; mushaara itteyyannittan ikka akkima qarateeta a kaamatte kara' xaayatten mina' koddite.”

⁷ Semalla Waaqase we piisa ettaninno ikiini “Intoonno wa malla sede piisa ishin qara' kayte oppa dikadaay!”

⁸ Semalla Waaqa ikiini “Amma nefo irroota qaropa fayada ka qora quura ka tikiyyo a qulqullootatin qupa, xasa ka ishin ana' dakaado anka kela' ulfeessamo!

⁹ Ha ishina unta kuttayteeta' feratta dikatten, ma xoori shakkayteetaaw koddite; anka a' tikopan kalten kulippa saka dawre ikka dapatte.” Waaqase we piisa ettaninno ikiini “Maana mallan asse kode ishina' pahata? Qoota ishina piisantiiyyi tikkasene xaayshin a mattaayshina' qupatta kamma pora hirrittan, tikiyyo a qulqqulloota a qitqitte ka nama tooyyo dapte malla.

¹⁰ Semmallaw roopa nefo roopni in kinnin, unta ka piitoppa' sakkatta tiitte.

¹¹ Sede qaran xaate anti ka wa piita ka irrowwa qara ca, unta ka dishma wayneeta ka a qora ekerta piisa alle' koksha ka ishin ka horeetaayshin isho pinaana akka' loosattan; wa harkan kodannittane' piisa ka patan.”

Samayta akka Waaqa' ajajame

¹² Sekkammaayye, Sarupapeeli inna a Selatiyaali ka Iyyaasu inna a Iyyosedeqi isase matta saara qeesewwa kodde isho samaytase' poojama kelaayye kale piisa ka erkanasene a Waaqa Poqallaassoti a Hake ishootta' lele dakaye, maana malla Waaqa Poqallaasso'e isha erkeey ikka owsade; ka Waaqa fuure.

¹³ Erkamampaytase a Waaqa Hake ka oori erkanasene a Waaqa ishootta' lele ka kide, “Waaqa ikiini, ‘Anti ishin ollin ca.’”

¹⁴ Waaqa ka mukissampaytase a Yihuta Sarupaapeeli inna a Salaatiyaali ka isase matta saarra qeesewwa' kodde Iyyaasu inna a Iyyosedeqi isho orra poojama kela kale piisa koda a tikaaditi xaxxaashe. Ishootta ka de'en ka tikase a qulqqulloota a Waaqase we piisa ettaninno a Poqallaassoti qupeeta paayyen.

¹⁵ Qupeese' nefo a Taariyoosi nuqusumeeyye, para lammattati, leya a lehatta oppa kuyyaata kunda lakki afrattati paayyen.