Xuuma Aptiyu 1 - Mataafa Qulqulloota

¹ Keleshaata Aptiyu akkaade; Waaqase piisa qara qapo ete Etoomi akkeeyye, Aptiyu erke; erkana Aptiyu isha kapa dakaye ikiini, “Samayta akkima aano ka Etoomi qara' oranna qishsho'e, ana Waaqa samayta qaropa erkana erke.”

² Tin anti Etoomi'in kiini, “Samayta piita oppaayye, makkeelayta'en ke koda; akka orroppaayye akata puyatamta.

³ Ha atti isi peepaatti ke sassapade; atti tikaayti a kallaata irrowwa qara arxashsha kare' qupatte ka eyye kalta; ka issi peepni ka kiini, ‘Ata ayno are qara ana lekkissa ettansha?

⁴ Ha kadi punu a xooxayta' mina moontandela xa'atta, ka illi otanta hiikka oppa' tika qupattaayye, anti eyyen ke lekkisha; sede ana Waaqa asse haasawade.

⁵ Kadi xolma tooma isho kereeta hatanta' de'aneeyye, anan a ishootta kayto patta qeedanni ka alle' anni; taaki orra fera ferroow, anan patteeta duloppa hattinni; ma xoori paarkaalaatti, alle'e ke pashshan.

⁶ Ishina' sanynyeeta Eesaawiiyyi, hela atta tikkaassin poqorqorshen, ka wa a' qaptane' piisa ishin tura saren.

⁷ Orra olli kodayteeta qapto piisa ke sassapade; ka piitaaytippa alle' ke daane; moottadaatti nefo ka paarkaala ke' kodden; orra harkaaytippa dame kuli ka turuuraaw ke' qaasni; a sede piisa ke qara' koonaaneeyye, atti a' upnaanne.”

⁸ Waaqa ikiini “Anti kuyyaasetiiyyi, Etoomi karaayyen ookka ka irroota Eesaawi qaraayye orra upna qapo alle'en pashsha.

⁹ Orra Etoomi kara kalo piisa alle'e leysama; xormewwa a piita Teemaani ka hapuqpuqan.”

Etoomi wa malla qatta'amta

¹⁰ Qoota karpaan sanynyeeta innaassina a Yayqoopi lesse malla, ijeerta ka haka paraparati' dapatta.

¹¹ Kuyyaata paarakaala xarra Yursaalami moojnaaneeyye, ka wa a' qapta' piisa sarraneeyye, atti olliiyyiiwwi' kitta; semmalla atti' nefo orroose Yursaalami qara' qoyritta katade ka qootade qara a' qapto.

¹² Rakkoota a hellaassina a Yihuta' qara kayte desa, allu xasoonni a' heenne; ka a pirammaaneeyye, allu' xasa ke' dakaanni in heenne, kuyyaata payyahnaneeyye, ishootta qara pajaqqatta haasawanni a' heenne.

¹³ Ha allu kuyyaata a rakkannaaneeyye, samaytiyyo qaropa kullini a' henne; ka kuyyaata payyahnaaneeyye pateettaayshotin xasootta'e, oppa' daasanni a' heenne; ka kuyyaata pirammaaneeyyeew, wa qapane' tura sarri a' heenne.

¹⁴ Ka orraaysho a qahano lessaata'e, ollimmaqqaappa asanni a' heenne; umma peellasene' xaaysho' rakkootoppa ca, paarkaala'e daanni a' henne.

Waaqa akkima samayta piita' qara' farato

¹⁵ Waaqa ikiini, “Kuyyaatan oppa samayta piita' qara' farato ikayte; atti Etoomi! Akkima kodaayti' mina'e, mushshaaraayti akkatta; kodoose' xaayti neeqa a' koonitto ke qaropaaw oora.

¹⁶ Samaytiyyo irrootase' xayyo qulqullaawte qara'e rakkoota teyyade; samayta piita a kapandesa co piisa ka a sede qaran qapto' rakkada; orra a rakkoose' qara kayte piisa ka piitoppa dapada.

Isira'eeli akkima putto

¹⁷ Orra leeta kela pahe ka irroota Siyyooni' qara' teyada; irroota Siyyooni' nefo a qulqullaawte koddita; wa hellaa Yayqoopi qara' qeedame' piisa ka ishootta' ooran.

¹⁸ Ana Waaqa asse haasawade ka kide, Hellaa Yayqoopi akka apitta, hellaa Yoosefiiw akka hapulpula apitta' mina'e koddan; hellaa Eesaawi ka akka kajja' mina koddan; akka apitta kajja kupno mina'e, hellaa Yayqoopi isho a Yoosefi ka hellaa Eesaawi alle' kupan ka piran.

¹⁹ Orra Yihuta a kara kammatin co piita Etoomi'i lehada; a qinda dumaatatin irrowwa kelandesa lakoppa kaloow, piita Filisteemi' qara pira; ka piita Efreemi ka a Samaariya kuli qeedada; orra Piniyaamiw, piita a Kele'adi lehada.

²⁰ Samaytase a Isira'eeli' poojame ka qinda qutattatin kalo, i'oora ka piitase a Kene'aani haka Sarabtaati' kitto lehada; orra Yursaalami a poojame ka piita Sefaratiimiti kalo paleewwasene qinda tupattatin ca' qara pira.

²¹ Orrase a Isira'eeli putaymaan kale, irroota Siyyooni' qaraxata piita Etoomi' pidda; mankisteese' nefo Waaqa muksha.”