Xuuma Amoosi 9 - Mataafa Qulqulloota

Firteeta Waaqa

¹ A Waaqa porase qara' kalisoota kalinnaan kapa' qa'aden akke, ikka kide, “Akka tika qulqulloota kela qapaya xerere'ane'e, kelaayye tuudda tottoome ikka orra piisa qara' qitto, anti a kela hase'en koraatetan pira; umma nama takka nefo ishootta oppa qaha in ettansho; umma nama kelaayye passado in caado.

² Kadi punu qaawwa qotadan ka xati Si'ooli kara' dekadaneeyye, harkiyyonnen kara ishootta tita; kadi punu moontopa fayyadaneeyye, arepaxatan ishootta lekkisha.

³ Kadi punu irroota Qermeloosi' qara' dekadaneeyye, eeyye nefo ishootta an diisho; kadi punu xati pakateeta kelopa ana tura dekadaneeyye, pofa pakateeta'en qaropa erka ikka ishootta loqa.

⁴ Kadi punu paarkaala ishootta poojaneeyye, akka eyye'ew koraatetan piramane'en koda; anti assen ishin rakkacciisa disheey wa paxaara ana kapa a' teytan.”

⁵ Waaqa Poqalla isase piisa ettaninno, piita qappada ikka liilta; orra qaraayye kalo piisa ka pooya; piita piisa ka akka kirra Appaayi' moontandela fajaqno ka oto xata oorrooyye yaqyaaqno mina' yaqyaaqta.

⁶ A moonteeyye kalo; ka piita qaropeela moonta uume; ise' pisha pakateeta ajajno ka akka piita qarandesa urqane' koono ha maxxaadi Waaqa.

⁷ Waaqa ikiini, “Samayta a Isira'eelitiiyyi, a xayya desa ishina isho hellaa Toobbiya olqara a' qaptan. Akkan piita Kipsi' kara Isira'eeleta sookshe mina'en, Filisteemeta piita Qerteesi kara sookshe ka Soorrata piita Qiiri kara sookshe.”

⁸ Waaqa ikiini “Anti ana Waaqase piisa qara qapo mankisteetase a Isira'eeli akka juppootan immakaatte in upaay, alle'en piita qara isheetta pashsha; ma xoori, sanynyeeta Yayqoopi piisa alle an qishsho.

⁹ Akka ukkashsha untoppa xayyinnaan mina'en samayta Isira'eeli orra piita piisa oppaayye alle' xayyisha; umma uqqinteeta takka nefo ishoottoppaayye in patto.

¹⁰ Juppoolaya a samaytiyyo kara ca ka kiina'e, ‘Wa neeqa ino qara in' de'an taakki ino quda in kayan’ Piisa, orannaanne le'an.”

Kippeeta tiitaawa a samayta Isira'eeli

¹¹ Waaqa ikiini, “Kuyyaatan oppa mankisteetase a Taawwiti a pi'ite xaasho de'a, anka kawwattaadi a qitte dawa ka isase' pootamte harmisha; ka a turan kitto pahanaysha.

¹² Peellasene piita Etoomi kela' hasa isho samayta maxxiyyon halaame piisa ka lehada” Waaqase sede kodo isha asse kiini.

¹³ Waaqa ikiini, “Parra a oppa a opani jaaha in dikkinnin mali, oppa ayla kayto de'a. Parra a oppa a opani dalta wayneeta diipa in dikkinnin mali, dishma wayneeta' dalo ka qara poha kayo de'a; awsetiiyyi, irrowwa ka taadeta wayneeta a marmaddaawnitto tojaan, kunkunnawwa piisa ka mina xata taadeta wayneeta'ew aykan.

¹⁴ Anti samaytiyyo a Isira'eeli'in piitaaysho oppopa oorsha; ikka katamaddasene' xaaysho qitqite amma piiteeyye qupadan ka oppa' kallaadan; ka dishma wayneeta' dishadan ka taadetaadi ikan; ka qora dalta dalla' dishadan ka qara luukkata daman.

¹⁵ Ana akka dishma' mina Isira'eeli disha, umma nama lamatta' piisse an ishootta' daashe oppa ishootta shukko in caado” Sede Waaqa Poqallaassina asse kiini.