Xuuma Amoosi 8 - Mataafa Qulqulloota

Satara a luukkata oopnaate oppa immakaatte

¹ Waaqase piisa qara qapo satara a luukkata oopnaate oppa immakaatte keleshaatoppan ana akkishe.

² Ka kide, “Amoosi maana akkini?” Anka kide, “Satara a luukkata oopnaatte oppa immakaatten akkini.” Sekkammaayye Waaqa ka ana' kide, “Samaytiyyo a Isira'eeli piraampiraaysho'e kayteey, anti arepa desa hakan ishootta qatta'o mali an diisho.”

³ Waaqase piisa qara qapo ikiini “Kuyyaasetiiyyi, masmuureta a tika qulqulloota' kara dawannaan pooyta'e oorta; orra le'e ka koopa, pukkadaasso ka porra heente oppa' dakkaman, umma nama afaappa qoj kido in caado.”

Pateetta a Isira'eeli

⁴ Ishina a rakkatampaya iskelopa diinna ka teekolaya piita qara alle' pira faana' piisantiiyyi, dakkaysada!

⁵ Ha ishina ikiinittane, “Kaata kuyyawwosen a xaysonessuma isho a sampata aytami tarpan? Anka urmalaappa unta katanna! Ka taasa an ishin kanninno shakkisanna ka hera padaawanna? Ka oton kurrinno kara' taffanna ka orra sassapanna.

⁶ Ka kuturna qitteeta kappa' mina kanna ka teekolaya kaajaan piddanna ka rakkatampaya nefo kuura xopa' kapa karpishshuma' teyyanna.”

⁷ Waaqase a Yayqoopi isho a sanynyeetaadi peepannaan, isha' maxxaadin xaxade ka kide, “Dapoose' xaaysho a koden piisa an teymo.

⁸ Hela sede minan piita in lelleehto? Orra a qara kalo piisa ka pora in pooyo? Akka kirra Appaayi moontandela fajaqno ka oto xata oorrooyye yaaqyaaqno mina'e, piita kuli asseew yaqyaaqta.”

⁹ Waaqase piisa qara qapo ikkini “Awse akka letta ayaassa oppa dumto'en koda, piita ka tukkantaawta.

¹⁰ Kuyyawwosen a xaysonessuma a oppaayye xasoonnittane'en nyarrahataapa pursha ka masmuuretaayshin piisa pooyta' oorsha ka akka toola inna takkan patta qapo ikka tura to'en mina'e, akka pora pooytan ka matta kooshattan ka daptisattan, kuyyaatose ka dikke ishin qara' hammaatta.”

¹¹ Waaqase piisa qara qapo ikiini, “Sapana an oppa loota piita qara' qeedo de'a; sede nefo orra qaaleta Waaqa dakaya'e loosada diisheey damta taaki ikkayta in loosado.

¹² Ha orra qinda piirtotati desa a dumaata opa anta' payyaha ka qinda qutattati xata qinda tupatta opa qaaleta Waaqa' fada kamma anta' payyaha umma in teyo.

¹³ Kuyyaasetiiyyi, tuparra papaxxaara isho xayyoolaya a hamiyya ka deepota pishaatin makkan.

¹⁴ Orra killootase a Samaariya ka a Taaniti isho a Persapehiti' kiino, ‘Atti a waaqa’ Ka ishin xaxanno piisa ipi'a umma lammatta in xa'o.”