Xuuma Amoosi 7 - Mataafa Qulqulloota

Akkima torrayta de'o

¹ Wa Waaqase piisa qara qapo ana' akkishe, a unta para isase a nuqusa aylade' feramte kammaayye, hakaytase' fujuqa paayye oppa'e Waaqa torrayta qishshe.

² Eten akka torraytase wa piita qara ilaawa' piisa dame ka pire akkeeyye, in qinsade ka kide, “Oo Waaqa! Ke a piisa qara qapo samaytaayti a Isira'eeli hupna a ishin rakkoose' duupatta ettansho in qapooy, dapaaysho ishootta' diishe.”

³ Waaqa nefo ka ishootta' nyarrahe ka ana' kide, “Wossen a akkite ishootta qara'en kayan.”

Akka apitta a miira Waaqa' de'o

⁴ Waaqase piisa qara qapo ka wa pila ana akkisheew, Waaqase piisa qara qapo ka qitaatese akkissa'e, apitta erke; apittase ete pakateeta laaw kiishe ka kokshe kammaayye, piita kuli kupa paayye.

⁵ Sitiiyyi anka qinsade ka kide, “Waaqqo! Ke a piisa qara qapo samaytaayti a isra'eli hupna a ishin rakkoose' duupatta ettansho in qapooy, dapaaysho ishootta' diishe.”

⁶ Waaqa ka ishootta' nyarrahe; Waaqase piisa qara qapo ka ana' kide, “Sede nefo ishootta qara in kayto.”

Tumpeeta a qussan qajeelinnaan

⁷ Waaqa ka wa pila ana akkisheew; anka a Poqalla kawwatta a tumpeetan qupen kapa qa'ade akke; ikka tumpeeta harkoppa' qapade.

⁸ Waaqa ka ana' kide, “Ata Amoosi maana akkini?” Anka oorshe ka kide, “Tumpeetan akkini.” Harmitta a qupeeta a tumpeetan(pinkoota) ekkaysanno. Waaqa ka ana' kide, “Qoota samaytase' xayya a Isira'eeli akkima kawwatta a tumpeeta mali dawamte mina'e, tonqolqola kodde malla; pahanoosen a tumpeeta neequmtaysho'e akkinniiy, hakan ishootta qatta'o mali an diisho.

⁹ Porra sakatatta a Yayqoopi isho sanynyeetaadi oppa sakkattinnaan tura alle qitqishsha ka porrasene qulqullaawe a isira'eli alle' pashsha ikka onan; mankisteeta a Iyyorpi'ami nefo orannaannen alle' pashsha.”

Amoosi isho Amesiyaasi

¹⁰ Sekkammayye isase qeesitta peteli' kodde Amesiyaasi, Iyyorpi'ami nuqusase a Isira'eeliti erkana erke ka kide, “Ha Amoosi samayta Isira'eeli oppopa kale ka wa neeqa ke qara' haasawanni; samayta kuli ka torroosen xaadi duupatta malaale.

¹¹ Ha Amoosi ikiini, ‘Iyyorpi'ami orannaappa'e to'a; samayta Isira'eeli ka piitaaysho oppa alle' poojama.’”

¹² Amesiyaasi ka Amoosi' kide, “Keleshaatampayto, wa' damta a' daptooy, piita Yihuta opa aane ka eeyye' xuuma haasawado.

¹³ Diisheey Peteli' qoota pora oppa' nuqusa' sakatanno isho tika a qulqulloota a samayta' koddite malla, areeyye xuuma in haasawadan.”

¹⁴ Amoosi ka Ameesiyaasi' oorshe ka kide, “Ha anti an sikmayta horeeta siksanno ka qora luukkata' dishanno diisheey, an xuumampaytan; taaki an inna xuumampayta'en.

¹⁵ Ma Waaqa kaharra kamma ana qeede ka ana ajaje ka kide, ‘Aane ka samaytiyyo a Isira'eeliti' xuuma haasawado.’

¹⁶ Amma nefo wa Waaqa kiina' dakkayssado! ‘Ha atti i'ana dawrini ka kiini, Orra Isira'eeli' qara' xuuma an haasawadan; umma sanynyeeta Hisaaqi'i, qaaleta Waaqa in torraan.’

¹⁷ Semmalla Amesiyaasi! ha Waaqa ike' kiini, ‘Iskatteetaayti katamaappandesa pora dahalsatta; hellaatti a diira isho a tuparra orannaappa'e le'an, dullaatti nefo orra pila'e teepaan qootada; atti' nefo piita orra a Waaqa amanni in kinnin oppa'e' toota; samayta Isira'eeliiw piitaaysho oppaayye alle'e' poojama.’”