Xuuma Amoosi 6 - Mataafa Qulqulloota

Isira'eeli akka qatta'amto

¹ Ishina' saarra samayta Isira'eeli' koddeetiiyyi, ha orra qaarqaarsa akkatta'e ishin kapopa deeni; ishina' xoori i'ishina ettante, akka Siyyooni qara naalaan kallaannitan ka irroota Samaariya' qara wa ino qappada in caan kiinittaneey, oo ishin kido!

² Intoonno katama Kalne opa aana ka ishootta tooyyaay! Ka oppan tarpaaw ka katamaasene kutta ‘Hamaati’ Kidamma isho katamasene a Filisteemi ‘Kaati’ Kidamma opa lekkada ka tooyya; hela ishina' ishootta qara' qaptane? Moon piitaayshina piitaaysho' qara palduma' qapa?

³ Ha ishina idikannittan ka kiinittane, “Kuyyaata neeqa tapo in deeto” Ka koda karpa'eew koonittan.

⁴ Ishina loshsha hirta arpatin sirene' qara' muknittan ka kahirraappa a kakappa ka horeetoppa mudukdukkaawwa dammittan ka ishin loshsha nukkulla' qara kankalaannittan.

⁵ Ka kehaytan kirpada a in pahanini' kirpinittan ka a Taawwiti mina'e, ishin saara pora saarinnittan.

⁶ Ishina taadeta wayneeta' shuubbaan ika kapa oktaanne' iknittan ka shittoota katetaadi akata kokkoka' fidannittan, umma pateeta samayta Isira'eeliti desa pakkanna nyarrahata ishina' dakaanni in kittooy, oo ishin kido!

⁷ Semmalla poojama ishin qara paayyada, akka kallaatase' xaayshin a naala' isho a seesa' daptan.

⁸ Waaqase piisa qara qapo maxxaadinni xaxade. Waaqase we piisa ettaninno ka kide, “Isi peepa a samayta Isira'eeli i'ana' tiiten, tikkaasso a papaxxaara' kuli tooyeeta ana'en aako; sede qaran xaate'e, katamaasso isho orra kara kalo piisan paarkaala' daasha.

⁹ Kadi punu nama kudan tika takka kara hasaayye, toota ishootta qara in oolto.

¹⁰ Nama daltayta a orra le'eeti' kodde, pukka tika kara sooksha ka hawlada ka sitiiyyi, nama tikoppa pahe takka hala ka kaassada ka kida, “Hela nama a pila a ke olliiyyi pahe ica?” Namase ka ishi' oorsha ka kida, “Inna'i! Nama pahe in co.” Namase isha kaassanno ka kida, “Maxxa Waaqa' hala ino parpaaccisni in cooy, alle' jaw kide.”

¹¹ Ajaja Waaqatinni, tikka a kutkutta iqitqitan, a shashakka' nefo ka alle' pootaman.

¹² Hela nama ifartan shilalla qaran desa kulufa ettaninni? Taakiti iqotiyyowwaan pakateetoppan desa qota ettaninni? Ishina' xoori dukaata' dartan purissen ka hanqeeta arkayta' kooten.

¹³ Ha ishina' qoota katama ‘Lodapaari’ Kidamma putten malla, ixxasootten ka peepannittan ka kiinittane, “Ha hupninnonnen katamasen ‘Qarnaaymi’ Kidamma qara pirre.”

¹⁴ Ma Waaqa Poqalla a we' piisa ettaninno ikiini, “Samayta Isira'eelitiiyyi! anti samayta pila'en ishin qara' xaasha, ikka qinda qutattatiiyyi xarra katama Hamaatiti paayyan ka qinda tupattati haka koommayta Arapaati ishin rakkacciisan.”