Xuuma Amoosi 5 - Mataafa Qulqulloota

Samayta Isira'eeli akka juppootoppa oora' halaame

¹ Samayta Isira'eelitiiyyi, saara a pooyta an ishina' saarsha dakkayssada!

² Ha enentase a issin kitto a Isira'eeli ipi'ite; umma lammatta'e, xaana in ettanisso qoota nama isheetta xaasho in qapnin malla, eeyye piita' deraatte.

³ Waaqase piisa qara qapo ikiini, “Isira'eeli karaayye katama a kara nama kuma oranna' tuula oppaayye, nama dippa patta kelaayye hasa; katama a pila a karaayye nama dippa oranna' tuula oppaayye, nama kudani patta kela hasa.”

⁴ Waaqa ikiini, “Samayta a Isira'eelitiiyyi, anopa oora, icaattaneey;

⁵ Peteli iqitqittaay, eeyyepan aanan; samayta Kelkela'ew ipoojamaay, eeyyepa in aanan, umma katama Persaapehi' nefopa in aanan.”

⁶ Se kapa qinda Waaqa opa oora iccaattaneey; a taakati, isha akka apitta' mina'e ishin samayta Isira'eeli' kupa ka domohoshaay; orra Peteli kara kalo kuli ka apittosetinniiw kupada; umma nama ishootta qara apittose libbisho in caado.

⁷ Ishina hanqeeta a' kooni a kittan ka dukaata dartan purinnittaneey, oo ishin kido!

^8-9 Ha isha, hikkasene piisa ka arpadda kidamma'e uume; ka halkeetta kuyyaatopa ka kuyyaata halkeettopa oorinni, ka pisha pakateeta' ajajni ikka piita qara' roopni; isase xormewwa mishshikewwaasso ollin patinno, ha isha' Waaqa.

¹⁰ Ha ishina, taanynyada firteeta daanna inneddannittan umma nama dukaata maakkummo a' jaalanni a' kittan.

¹¹ Ka teekolaya irreetan piddinittan ka qaraayye untaaysho irreetan pohannittan ka dakadda xefameetin tikka qupatten, ma xoori kara'e a kallaattan ka dishma wayneeta a paxaara dishatten, ma xoori taadeta a wayneese oppa kodammitto a iktan.

¹² Ha anti dapaayshin atta akka koope, juppootayshin' nefo ka akata kutti in upa; ishina orra hanqeeta koono' rakkacciisnittan ka nooddota teyyannittan ka hiyyeessa' dukaata mura diinnittan.

¹³ Semmalla xeltoose qoota neeqi malla, nama matte oorsatta qapo di'i kida.

¹⁴ Akka' caattane'e, wa paxaara' koda diisheey, wa neeqa'en kodan; oton asse' kootaneeyye, akkimose a' kiinittane, “Waaqase we piisa ettaninno ino olli ca” Mina'e, isha ishin olli caada.

¹⁵ Takka punu Waaqa Poqalla a we piisa ettaninno hellaa a Isira'eeli'i suraysada kodditaay, ishina wa neeqa needdada ka wa paxaara' jaalada ka porra a firteeta farannaan oppaayye, dukaata haasawada.

¹⁶ Semmalla Waaqa Poqalla a we piisa ettaninno ikiini, “Porraappa isho xarrada katama piisa oppa nessa ullupitta ka a pooyta'e xa'a; orra dulla qotanno ihalaama ka orra saara pooyta saho olliiyyi, orrase' le'e pooya.

¹⁷ Waaqa ikiini “Pora oppa dulla a wayneeta caan pisa oppaayye pooyta xa'a; sede piisa wa malla asse koddita, qootan anti' de'o ka ishin qara' farato malla.

¹⁸ Ishina kuyyaatase a Waaqa oppa firteeta farato asannaatiiyyi, oo ishin kido! Ha kuyyaatose a Waaqa kuyyaata tukkanta' diisheey kuyyaata la'ayta'enneey, maana'e asannittan?

¹⁹ Ha kuyyaatose akka nama takka kasarta tura qahano ka karma mina kayno ka ete tikopa kale ka qussa quda qapadeeyye, maaka ka tupa harka qaniinna' mina'e ishin qara' koddita.

²⁰ Kuyyaatose a Waaqa oppa firteeta farato, kuyyaata tukkanta' diisheey a la'ayta ishina'en koddito; kuyyaase kuyyaata oppa la'ayta akkaanni in kinnin ka tukkante ka a nan kiite ishin qara' koddita.

²¹ Waaqa ikiini, “Xaysonessuma a' paroppa kodannittane' piisa i'ana' tiiten anka needdade; sede a ana Waaqaysatta ollopa deenittan' nefo ana xasanni in kitto.

²² Kadi' punu kalisoota a kupannitto isho a unta ana kalinnittan' nefooyye, ishin qara an teyyado; kadi punu kalisoota a kalataati' horeeta kakappa ana' dehannittan' nefooyye, anti opa an tooyyado.

²³ Masmuureta a' dawannittan ana kapa alle' sekaysha; kehayta a' dawannittan' nefo dakaya an heeno;

²⁴ sede kapaayye firteeta dukaata akka pisha urqina' mina'e ka hanqeellumaaw, akka pisha kirra a kuuni in kinnin mina'e a karittaayshin kareela paaden.

²⁵ Ishina' samayta Isira'eelitiiyyi, a' koommaytoppa para kunda afuri pirteneeyye, hela akka' kalisoota isho daassata ana' dehassane'e in ishin qara fade?

²⁶ Ha killootase ‘Saakuti’ kiinaane' nuqusa issi kodatten ka asseew killootase a hikkitta ‘Kewaan’ Kidammitto pora haadannittan.”

²⁷ Semmalla Waaqase a maxxaadi Waaqa we piisa ettaninno kodde ikiini, “Akka' piita Tamaasqo' tulandesa poojamtane'en koda.”