Xuuma Amoosi 4 - Mataafa Qulqulloota

¹ Ishina iskatta Samarya' kodde ka okkaya a meere a piita Paasaani' mina kakappadeetiiyyi! Ha rakkatampaya' miiddinittan ka teekolaya juurtinittan ka diirraassin akka kuyyaata piisa ikkayta orra maashshanno ishina' daashane ishootta payyahinnittan.

² Semmalla Waaqase piisa qara qapo qulqullumaadinni xaxade ka kide, “Ha ishina kuyyaata oppa akka miissa shenqeran tinnaan mina titamtane de'a; a ishin quda hase kuli akka shenqeran murkuja qapnaan mina'e qapaman ka qeedaman.

³ Akka matta mattan qussadaappan titamtan ka qinda irroota Harmooni opa alle' dakkamtan.”

Samayta Isira'eeli' dapaadi oppa in oorre

⁴ Waaqa ikiini “Ishina' samayta Isira'eelitiiyyi! Juppoota koda kamma'e' kamteneey, kaata Petelipa xooya ka juppoose'ew kodan. Ka kelkela kulipa xooyaaw ka juppoota a sede qaran qapto kodaaw! Ka teykanta piisa mina' kalisootaayshin kuli kalsha! Ka kuyyaata a sessatta' piisa mina'e, kuma kundatta' daasada.

⁵ Ishina' qoota sede koda jaalannittan malla, kalata'e, daassatase a laaqqota dehaaysha ka kalisootase a' heenattaayshina qara' kodannittanen issi peepa ka pora leladan kaata.”

⁶ Waaqa ikiini, “Katamaddaassin piisa akka loosadane'en kode akka wa afaappa damtane kuli dapten; umma ishina' sedde nefo kammaayye anopa a' tiitaawne.

⁷ Anka untaayshin a kaldaytoppa kitto qara roopa dawre ka katama takkan qara' roopa roopshe ka takkan qara roopa dawre ka dulla a oppa' roopa in roopinin ka kupaden.

⁸ Semmalla orra ka pisha afaappa ikka' malla katamadda lakki taakki sessaappaayye xaani ka katama takkan opa anni; ma xoori' qoota pisha kara in kinnin malla, ishootta qaraayye deepota in' nakanne; umma ishina' sede nefooyye anopan a' tiitaawne.

⁹ Untaayshin akka shaartootto ka raammootton kode; torrayta ka dishmaayshin ka wayneetayshin ka qorasene a hilteeta isho a ekerta' piisa dame; sede nefooyye umma ishina anopa a' tiitaawne.

¹⁰ Anka erkannaata an piita Kipsi' qaropa erke pahato ishin oppopa erke ka xayyoolaytaayshin orannaappa' pire ka fartadaassin' nefo alle' poojacciise ka akka pukka paleetaayshin piisa oppa xaccado kode; sede nefooyye umma ishina anopa a' tiitaawne.

¹¹ Anka akka katama Sottoomi isho a Kamoora alle pashshe mina'e, ishin oppaayye kara kutta alle' pashshe; ishina are' hase' nefo akka torrayta oktaappa qahano ka pahano mina'e' pahaten; ma xoori sede piisa kammaayye ishina anopa a' tiitaawne.

¹² Semmalla samayta a Isira'eelitiiyyi! wossen an ke qara' koda' malla, harmisado ka ana Waaqaayti turopa sooke.

¹³ A irrowwa kode, ka xayxayta uume, ka wa a dikade' nama' lello, ka kuyyaata tukkanta' koono, ka irrowwa qarandesa anno, ha maxxaadi Waaqa Waaqase a we piisa ettaninno.